O Emani le tama lona lua, e le o ano ane lava ia i se mea e fai, pau lava le tulaga na i ai ia, o le alo atu lea i lana su’ega lea e mafai ai ona malaga i Niu Sila mo a’oa’oga mo le ono masina. E le i ta’uina e Emani le tulaga lea i lona tama, ona ua ia iloa lelei, se i taunu’u manuia ane le malaga a lona tina ona ta’u lea i ai. O le isi itu sa manatu i ai le tama, ia fa’atalitali se i maua mai le fa’aiuga o le su’ega pe manuia pe leai.

O le fale telefoni o lo’o galue ai Emani, ma o se tama e fa’amoemoe i ai galuega uma a lea matagaluega a le malo. O lona poto masani i ona tiute, ona ua leva ona galue i totonu o le Matagaluega lea a le Malo, fa’atasi ai ma ana a’oa’oga na maua mai i ali’i papalagi na malaga mai i Ni’u Sila, lea ua maua ai e Emani le isi atamai e sili atu na i lo le tulaga sa i ai muamua. O mea uma o lenei olaga, o a’oa’oga uma lava, ma o mea fo’i ia na foa’i mai e le Atua, ia o tatou iloa ona tausi lelei, ma sa’ili’ili pea, ina ia o tatou iloa ai nisi fuafuaga lelei mo i tatou lava.

O le tama o Eteuati lea e alu ma fai i tagata o lona igoa o ‘Cindyrose’ ua sili atu ona faigata i le faitau a le toeaina o Lameko. Ua fiu e tau gagau le amio fa’a’afa’afa a Eteuati, ae ua le mafai lava. O aso na tu’ua ai e Tagiilima i a Lameko ma le la fanau tama, o aso uma ia na iloa ai e le toeaina o Lameko uiga ia o lona atali’i, ua ta mau ai nei i le loto o le toeaina, ona o le tele o taimi e maua ai e Lameko ia Eteuati o fai ona ofu teine, ma fai ana siva i totonu o lona potu. O le isi itu ua mautinoa ai e le toeaina, ona ua i ai tagata ua o latou ta’ua, o Eteuati o lo’o feiloa’i ma lona uso la’ititi o Lipine. Ua matua Lipine, ae o mea uma sa ia faia a’o talavou, lea ua maua e Eteuati (Cindy Rose) na te tauaveina. Ua sauni nei mo le tauvaga fa’afafine, ua fai le tonu a Queen Charlotte (Lipine)  ma Cindy Rose, o le a o e fa’aulu le ioga o Cindy Rose e alu ai i le tauvaaga, ma ua fa’apena lava ona fai.

Ina ua taunu’u ane le malaga a Tagiilima ma Loimata i lo latou aiga i le taulaga, na fa’amatalatala uma e le lo’omatua le tulaga na o’o i ai le talanoaga ma le feiloa’iga a lona aiga. E fai lava fa’amatalaga a le lo’omatua, ae ua na o le nofo o le teine o Loimata e le tautala, ua na o le fa’alogologo o ona taliga, a’o fa’amatala e lona tina le talanoaga a lona aiga i tua. E le i umi, ae fa’ateia Lameko ma lana fanau tama ina ua oso ane le tala a le teine, “Tama, ou te le toe fia o’o i le aiga o Tina. E ‘ese le fe’aina’i o tagata o lea aiga, e nonofo mai, a’o loto e fai fai loto o tagifa fea’i o le sami e le maua ia ituaiga loto.”

“Loimataoapaula, na o lou malolo lava, e le o ni mea ia e te tautala i ai. Se ua fiu fo’i e fa’atonu oe se, ai ana fa’atonu se tama’ipusi ua atamai, malolo la’ia, e sa ona e tautala mai i mea ia ma te talanoa ai ma lou tama. A e le fia alu i lo’u aiga, o lou lava lea faitalia. Ou te le toe tauanauina oe ta te o i lo’u aiga. E pule lava le tagata latou pe fia alu i tua pe leai. E tu’u atu i le loto faitalia o le tagata, ae maise ai o outou tama, a fai lava tou te fia o i lo’u aiga, ou te le taofia outou, ae a leai, ia e pule lava le tagata ia ma le ogasami e alo i ai si ona va’a, ae tau lava o lenei, ia outou iloa lelei  a’u tala e lafo so’o atu ia te outou, o le tagata ma si ona aiga, aua e leai se tasi e tu fa’amauga i aso uma o lona olaga, ia outou manatua pea la’u upu lena.”