Ads by Google Ads by Google

Fia taga’i le Fono i le fa’asoasoaina o tupe a le LBJ

O le fesiligia ai e le Fono Faitulafono o totogi o lo o maua e fa’auluuluga o le LBJ, na afua ai ona tu’uina atu e Senatoa Alo Dr. Paul Stevenson le tatau ona fai o se su’esu’ega mae’ae’a a le Fono, i le fa’asoasoaina o tupe a le falemai, ona e i ai le talitonuga e i ai le vaega o lo o mafua mai ai tulaga faaletonu tau tupe.

I fa’amaumauga o lo o taulimaina nei e le Fono, ua fa’ailoa mai ai tulaga o totogi a le pulega a le LBJ.  E $120,000 le pule, $100,000 le teutupe, ae $91,000 le totogi o le loia o lo o i ai, e ui o le Loia Sili e gafa ma le taulimaina o mataupu tau fa’amasinoga pe afai e alia’e mai ni tagi fa’asaga i le falemai.

Na saunoa Alo, toeitiiti lava ta’i lima tausaga, ma tagi mai le falemai i le malo ma le Fono mo se $15 miliona e fesoasoani ai i ana galuega fa’atino. Na taua e le alii Senatoa e fa’apea, e ui ua mae’a ona faia nisi o su’esu’ega a le Fono e fa’atatau i le falemai, peitai e i ai lona talitonuga e le’i lava ia su’esu’ega, e le o loloto foi le silasila a le fono i auala e tatau ona uia.

Na taua e Alo, o lo o i ai fa’aletonu o lo o tula’i mai i le puleaina o tupe a le falemai, o  le mafua’aga foi lena e ala ai ona tagi so’o atu i le fono ma le malo mo se tupe.

“Na avea muamua foi i ai e le Fono le nonogatupe e $10 miliona e fesoasoani ai i lana tautua, toe avatu i ai ma le $5 miliona mulimuli ane  ai, ae o lea foi ua toe fai mai ua leai se tupe, e foliga mai e i ai le faafitauli o loo tulai mai i le faaaogaina o tupe a le falemai,” o le saunoaga lea a Alo.

Na saunoa fo’i le alii Senatoa, e le mafai e le fono ona fa’atonutonu gaioiga a le falemai i le taimi nei, aua o lo o maliliu pea tagata ona o le fa’aletonu.

Saunoa le alii Senatoa ia Fuata Dr. I’atala e fa’apea, e le iloa e ia pe aisea e aumai ai e le falemai tagata mai fafo e galulue i le falemai, e o’o lava foi i fomai, ae o lea o lo o i ai alo ma fanau a Samoa ua i ai le tomai ma le agava’a i le faatinoga o galuega nei.

Na taua e le alii Senatoa, o ia foi o se foma’i sa galue i le falemai mo le tele o tausaga, o le totogi lea e maua e le fomai mai fafo e toatasi o loo aumai e le LBJ, e mafai ona totogi ai fomai Samoa e toatolu latou te faatinoina le galuega lava lea e tasi.

Na saunoa fo’i Fuata, e le fa’ailoga lanu ona manatu, ae o le alofa i le atunuu e mafua ai ona ia fautuaina le fono ina ia ave se fautuaga i le falemai ina ia silasila totoa i tulaga ia.

O le finagalo lava foi lea e tasi na fesiligia e le alii faipule ia Toeaina Faufano Autele ina ua talanoaina i le maota o sui le mataupu lava lenei e uiga i le falemai i le aso ananafi.

Na saunoa le alii faipule ia Taotasi A. Soliai, e le iloa po o fea e oso mai ai le $15 miliona lea o lo o tagi mai ai le falemai e avatu e le fono ma le malo e faatino ai ana galuega, ae o lea e lei o’o mai se talosaga i le Fono.

E lei mautu mai se isi gaioiga a le Fono pe toe fa’atulaga nisi a latou iloiloga ma le pulega a le falemai, e uiga i le mataupu i siitaga o totogi lea na  amata i le vaiaso nei.