Ads by Google Ads by Google

Pasia tulafono e fa’asa ai ona inu pia i paka fa’asao

Ua pasia e le Maota o Sui se tulafono taufa’aofi, e fa’asa ai ona taumafa le 'ava malosi i nofoaga o lo o i ai paka fa’asao, sei vagana ai lava nofoaga ua fa’atagaina i le tulafono, ua ta’oto atu ai ma se fautuaga mai molimau a le malo, ina ia i ai se auala e fa’aleleia ma siitia ai le fa’amalosiga o le tulafono, mo i latou o lo o tagofia le ‘ava malosi i nofoaga nei e aofia ai ma fanau laiti.

Na pasia e Faipule lenei tulafono, i lona faitauga fa’atolu i le vaiaso na te’a nei.

Na auai le susuga i le Loia Sili ia Fepulea’i A. Ripley, ma le sui o le Komiti Fa’afoe o lo o mata’ituina mata’upu tau i le ‘ava malosi, le tofa Le’i Sonny Thompson, i se iloiloga sa fa’ataunu’u a Faipule.

Na fa’amanino e Le’i e fa’apea, e le tele ni nofoaga e tafafao i ai le atunu’u, sei vagana ai le paka i Utulei ma le paka liona i Tafuna, peitai o le fa’afitauli lea o lo o tula’i mai, e le o lelei le fa’amalosia o le tulafono, mo le mataituina o tagata o lo o tagofia le ‘ava malosi i nofoaga nei, ina ia taofi ma avee’se, pe afai ua sili atu ma le taimi fa’atapula’a evaga o lo o faia ai.

Na fa’aalia e ni isi o Faipule e fa’apea, ua mafua lenei tulafono taufa’aofi, ona o le tele o fa’asea mai i ni isi o le atunu’u, ona o le tele o tagata e inu pia solo i paka.

Na fa’amatala e le susuga Tapumanaia Galu Satele Jr, se tasi o aso sa ia tau atu ai i se inugapia o lo o faia i le itu i tai o le paka liona i Tafuna, i le vaega tonu lea o lo o i ai nofoaga e ta’a’alo ai le fanau laiti.

Sa ia taua, o ituaiga gaioiga ia e le tatau ona fa’atagaina i nofoaga ia e agai i ai fanau ma aiga.

Sa ia fesiligia le tulaga o le kalapu o le ‘Fau Tree Club’, lea o lo o i ai sa latou fale tapoleni i le itu i tai o le paka liona, pe o i ai se laisene e fa’ataga ai ona fa’atau atu ‘ava malosi i tagata, ae na toe fa’amanino e Le'i, e le o fa’atauina atu e lea kalapu ni pia i tagata.

Na toe fa’atepa e Le'i le komiti i se mata’upu sa tofu atu i luma o le fa’amasinoga e fa’asaga i sui o le kalapu lea a le Fau Tree pe a ma le tolu tausaga talu ai, ma ua mae’a ona toe fautuaina e le Komiti o le Ava malosi le kalapu, e le fa’atagaina lo latou fa’atauina atu o le ‘ava malosi, ona e le o i ai sa latou laisene.

Na ta’ua foi e Le’i se tasi o faleaiga o lo o i le maketi fou i Fagatogo, lea foi sa latou talosagaina se leisene ina ia mafai ai ona latou fa’atauina atu le ‘ava malosi, peitai e fa’atolu ona te’ena e le Komiti la latou talosaga.

Saunoa Lei, e le tatau ona i ai se avanoa e taumafa ai e le atunu’u le ‘ava malosi i nofoaga faitele o lo o lolofi atu i ai matua ma aiga.