O le taeao nei ua fa’amoemoe e toe feiloa’i ai le Komiti Teuteu, o sui ta’ito’a ono a maota e lua, aua le soalaupeina o se fesoasoani mo le falema’i, ona ua lagona le oi o le atunu’u i si’itaga o pili a le falema’i.

O susuga i Senatoa ia Alo Dr. Paul Stevenson, Velega Savali Jr. ma Lualemaga Faoa, o lo o ta’ita’ia le komiti a le maota maualuga, ae o afioga Faipule ia Vailiuama Steve Leasiolagi, Talia Fa’afetai Iaulualo ma Puleleiite LIamatua Tufele, o lo o ta’ita’ia mai sui mo le Maota o Sui.

O pili tupe e lua a le Senate lea o lo o fete’ena’i ai maota e lua, ona sa pasia e le Senate le tu’u sa’o atu o le $3 miliona mai teugatupe o Taui mo Tagata Faigaluega, ma le tupe e maua mai i le lafoga e 2%, mo le falemai, ae na suia e Faipule, ina ia avea le $3 miliona, o se nonogatupe, ae fa’aaoga le lafoga 2% lea ua pasia e le Senate, e toe totogi ai le nonogatupe lea, o le tupe e totoe mai ai, o le a ave le isi 50% i le teugatupe tele a le malo, ae ave le isi 50% e fesoasoani ai i le polokalama e auina atu ai gasegase i fafo mo togafitiga.

Na fa’ailoa e le komiti a Faipule e fa’apea, e le tatau ona ave’ese mai e le Fono le tupe mai le polokalama o Taui mo Tagata Faigaluega e fesoasoani ai i le falema’i, ona o lo o fa’amoemoe le fa’atupeina o lea polokalama i le vaega tupe o lo o i ai.

Na saunoa Talia, ua mae’a ona fesiligia e le komiti a Faipule ia sui o le Vaega o Taui mo Tagata Faigaluega e uiga i le latou teugatupe, lea sa latou ta’ua ai le o’o atu i le $300,000 tagi o lo o fa’agasolo pea e lei mae’a, ma le silia i le $600,000 sa totogi atu i tagi a tagata na manunu’a i le taimi o le galulolo.

Sa latou ta’ua foi e fa’apea, e ui i le faigata o le mataupu i le 2% lea ua pasia e le Senate, ona o le tausaga palota lenei ma ua pagatia foi le atunu’u i le faaletonu o le tamaoaiga o lo o i ai nei le malo.

Na saunoa Senatoa Velega, “E le aumaia polokiki e faasao ai ola o tagata, e le aumaia foi le toe fia oo mai i le maota ma itu e taofi ai le oti o tagata”.

Na ta’ua e Faipule lo latou pasia o pili tupe e fa a le Senate ua uma na fa’aulu, e aofia ai ma pili tupe e lua e fa’asoasoa ai le $253,000 ma le $1.6 miliona mo le falema’i, ae peita’i, sa tumau le finau a le Senate ina ia te’ena suiga a Faipule.

Na saunoa Lualemaga e fa’apea, e le mana’omia se pili e pasia, ona tau toe ao lea o le tupe, ae o le pili lea ua pasia e le Senate, o le taimi lava e pasia ai ma saini e le kovana, o le taimi foi lena e o’o ai le tupe i le falemai.

E ui i lea, na mae’a lava le feiloa’iga a komiti e lua, ae e le’i maua se tasi i lenei mata’upu.

O le komiti teuteu a le maota o sui lea ua tofia e faaopoopo i le toatolu na tofia muamua e aofia Taotasi Archie Soliai, Tapumanaia Galu Satele Jr ma Lemapu Suiaunoa Talo, ae o le isi toatolu lea ua faaopoopo a le maota maualuga e aofia ai Lemanu Peleti Mauga, Malepeai Setu ma Fuata Dr. I’atala.