Ads by Google Ads by Google

Suia Atoa Faia’oga - LA Miramonte Elementary

Ua matua mafuli matua e solo tete’e e fa’ailo lo latou naunau ina ia mautinoa le saogalemu o latou fanauiti o lo’o a’oa’oina i le a’oga tulaga lua a Miramonte i Los Angeles, Kalefonia.

I a latou laupapa fa’ailo, ua tusia ai e i latou upu nei: “Ia mautinoa le Saogalemu o Fanauiti!”

Ua fa’aalia mai i tala tusia i le aso ananafi, e fa’apea, “E silia ma mle 120 faia’oga ma le aufaigaluega i le a’oga tulaga lua a Miramonte  ua fa’amalolo mai a latou galuega, ma ua le toe i ai se isi faia’oga po’o se tagata galue i lea a’oga atoa, o toe masalomia nei.”

O ali’i faia’oga e to’alua Mark Berndt ma Martin Springer na saisaitia i le vaiaso ua te’a i o la’ua moliga o le ‘fa’asauaina o fanauiti fa’aleituaiga.’

E silia ma le kuata o le aofa’iga o le fanau a’oga i lea a’oga e le’i a’o’oga mai i le aso Gafua na te’a nei, ona ua masalosalo agaga o matua uma, e tauau o lo’o afaina fo’i latou fanau i nei ituaiga faiga fa’asotoma ua alia’i nei, o faia e nei faia’oga i le fanauiti.

O i latou uma na a’o’oga i lea aso, sa latou molimauina le o atu o i latou i le latou lotoa i Miramonte, ae ua fa’asoloatoa le tapu’eina o latou ata e televise tetele ma le anoanoa’i o matua o lo’o faia le latou solo tete’e e fa’ailo o latou lagona o’otia ona o le afaina ua molia ai nei ali’i faia’oga, atoa ai ma fita o le moliga o lo’o ua a’afia ai, ua atili ai fo’i ona fa’afesiligia e i latou le saogalemu a’ia’i o latou fanau i lea a’oga tulaga lua i le a’ao o Los Angeles.

O lo ua fa’ailoa mai o le a le tatalaina lea a’oga i le aso Lua ma le aso Lulu, ae ua mautinoa lava e faia le a’oga i le aso Tofi- ae o le a i ai ma le aoaoga fa’apitoa a le Matagaluega o le Tausiga Lelei o Fanauiti e fa’atautaia lea i potu uma lava o lea a’oga i Miramonte.

Ua fa’ailoa mai, o nei faia’oga ma tagata faigaluega uma i le a’oga lea ua fa’amalolo, e maua lava latou totogi, peita’i, pe afai o le a mae’a sailiga ma su’esu’ega uma, e tauau e toe fa’afaigaluegaina i latou, pe suia fo’i a’oga e auina i latou i ai e faigaluega ai.

O le fa’asalalauga lea ua tu’uina mai e le ali’i o John Deasy, le ali’i Leoleo mo a’oga uma i lea itu o le a’ai tele o Los Angeles, i le taimi na fa’atautaia ai se fonotaga i le va o matua ma le Aufaigaluega, fa’apea le vasega o leoleo,  i se tasi o a’oga tulaga ane i le Miramonte Elementary.

I lea lava fonotaga, ua fa’ailoa atu ai e Deasy i matua, e ‘aua lava ne’i latou popole i le tulaga o le tupe fa’asoa a le a’oga, ae o le vasega atoa o faia’oga ua sailia nei ma toe suitulaga i faia’oga uma ua fa’amalolo, o lo’o ua matua sailia lelei o latou tafatafa i ni fa’afitauli o lo’o i ai i o latou faila i le Malo e ala i ni tu’ua’iga ma ni solitulafono a’o talavou e o’o mai i le taimi nei.

I se saunoaga a Deasy i le vaega fa’asalalau, ua ia fa’ailoa ai, “Ua matua ou galue lava ina ia matua mama lo’u mafaufau ma se tamaititi a’oga e toe fa’apea mai ua fefe e toe sau i le a’oga.”

O le to’atele o tagata faigaluega i lea a’oga ua matua le mautonu ona o le so’ona fa’asoloatoa o le fa’asalaga ua faia nei mo i latou uma, ae na’o le to’alua lava faia’oga sa faia lenei faiga leaga. O nei ali’i faia’oga e to’alua, o ni faia’oga ua loa ona faia’oga i Miramonte.

O le mea e leaga ai, ona o lo’o to’atele lava faia’oga o lo’o faia o latou tiute ma le agaga fa’amaoni, e alolofa fo’i i tamaiti, ae o le mea ua alia’i mai, ua avea lea ma se mea e tiga uma ai o latou lagona, ae maise o le galuega e pele fo’i ia i latou, peita’i, ua malamalama fo’i i latou i le tiga ua i ai i matua ma le fefefe fo’i o i ai i le fanauiti ona o le fa’alogo i mea ua faia i nisi tamaiti laiti, ma o ni solitulafono e ono fa’amaasiasia ai fanau, ma le toe tonu ai o latou mafaufau mulimuli ane i le soifuaga.

O le Iuni fo’i a Faia’oga i le a’ai atoa o Los Angeles sa mafai ona fa’aalia o latou lagona e tusa o le mataupu, ma ua latou fa’atoga i le Ofisa o leoleo su’esu’e ina ia sailiili mae’ae’a lava lenei fa’afitauli, ina ia le toe tupu mai ni mea mataga i se olaga galue o se isi faia’oga i le lumana’i.

O se mea e fita ai lenei mataupu, ona ua silia ma le 20 tausaga o lagona pea e matua le tele o faitioaga a le fanau a’oga e fa’atatau ia Mr. Berndt, ae sa le amana’ia e se tasi, aua ua loa ona faia’oga o ia i le a’oga, ma e lelei fo’i ona uiga i matua i le taimi e asiasi ane ai ia i latou.

saunia: Leua Aiono Frost