Ads by Google Ads by Google

Alofa: Fa'avae ai Aiga— Vaega 110

E lele le toloa ae ma’au i le vai

So’o se mea lava e i ai le lelei, e i ai fo’i ma le leaga, po’o a fo’i mea lelei e taumafai le tagata e fa’atino aua le aga’i i luma o le soifuaga, e le ‘asa lava ma ona leaga na te lepetia, peita’i, e le mafai e le leaga ona fa’aumatia le lelei.

 Ua fa’apena le tulaga ua i ai nei le agia o Tagiilima, ma le mataupu na o latou soalaupule ai. O masalosaloga o le loto ua le mafai ai ona maua se malologa filemu, ma sa toe fa’ailoa e le lo’omatua o Sunema le to’alua o Tovi’o i a Tagiilima ma ona tuagane, ia mea na o la fafau ma le lo’omatua o Faiane, ma lona to’alua o Lopati, o lea ua mafua ai ona ala usu i le taeao le lo’omatua ma alu i le fale Fa’amasino e fa’aulu ai lana tagi.

 E ofo le loto ma le mafaufau, atonu na lilo i manatu o le aiga o le a o’o i se tulaga fa’apea le latou fetufa’aiga ma le fa’atasiga peita’i, o lea ua tula’i mai le tulaga lea, ma ua lagona ai le loto o’otia ma le tiga.

Ina ua ma’ea ona fa’ailoa ane e Sunema i a Tagiilima ma ona tuagane le mea na o la faia ma Faiane, na va’aia e tuagane o le lo’omatua uiga filemu, ma le to’afimalie o lo latou tuafafine. E leai lava se popole po’o nisi tulaga e ono fa’apea ai ua le taofiofia ma ua taumafai ina ia fai le mea e sili atu ona leaga i a Faiane, e leai. Na mateia gata i toeaiina uiga ia o lo latou tuafafine i lea taimi. E o’o fo’i i se upu e tasi na tautala ane ai ia Sunema e tusa ai ma lana mea leaga ua fai, e leai lava se upu na gagana ai Tagiilima i lea taimi.

“Tagiilima, ou te fa’amaualalo atu ia te oe lo’u tuafafine ia e alofagia la’u aioi atu i a te oe, ia e alofa fa’amagalo mai ma’ua ma Sunema i lou loto alofa ma lou agaga fa’apalepale. O Sunema, o a’u fo’i lea, ia e alofa Tagiilima, o a ni masei a lenei fafine leaga ua e tiga ai, ia e alofa Tagiilima si o’u tuafafine, ia e fa’amagalo mai ma’ua ma lenei fafine, e leai se aoga i totonu o le aiga, ae ua na o mea masei ma mea leaga na te faia. Ia e alofa mai lo’u tuafafine, ia e alofa i mata o si a’u fanau, fa’amolemole Tagiilima. O a ni ma leaga ma si a ma fanau i totonu o le aiga, lafo ia i foga va’atele ma fa’agoto atu i le moana sausau, sau se aso ao se taimi, o le a maua ai se suiga lelei.”

Na fa’alogoina i lea taimi le tutulu o le lo’omatua, o ona loimata, ua na o le tafe fa’avai ifo i ona alafau. E leai se upu e tasi na tali atu ai i lona tuagane, ae ua na o le maligi ifo o ona loimata i lea taimi.

Na fa’aetia le fale atoa ina ua fa’apea ane Loimata. “Tina, ta toe o ia i lo tatou aiga, va’ai oe, ai loga e iloa e lou aiga, le tulaga na e o’o i ai ina ua e talanoa i lo’u tama, ma e tagi tagi i lou fia o’o mai e asi lou aiga, ailoga e i ai se tagata o lou aiga e alofa ia te oe, ta toe o Tina, ua lava fo’i lea, ma ou te le toe o’o mai i lou aiga Tina. O le mea sili ua va’ai o’u mata ma ua fa’alogo o’u taliga, ta o ia i lo tatou aiga, o lo’o fa’atali mai Tama ma tama. Ua ou le fia nofo fo’i i lenei mea, na o mea masei ma mea leaga ia ou te va’ai i ai ma ua pupula fo’i i ai o’u mata. Ou te le toe fia o’o mai i lou aiga, o tagata e nonofo mai, a’o loto ua silisili ona leaga, loto ‘ele’ele, letioa fo’i ae naunau i lou fia sau i lou aiga. Ina ia e va’ai ma e fa’alogo i mea ia e tutupu mai nei, tu i luga ta o Tina.”

Ua na o le tagi aue ue, nei o le lo’omatua i lea taimi. O tagata uma sa i ai, ua leai se tasi na toe talia se upu. Ua na o le tilotilo ane nei i a Tagiilima ma lana tagi i lea taimi, e aunoa ma se tala na toe tautala mai ai le lo’omatua. Na tu a’e nei i luga le teine o Loimata ma savali atu i lona tina.