Ads by Google Ads by Google

Talosaga Faipule i le LBJ e toe tolopo a latou siitaga o totogi

O le taeao ananafi na pasia ai e le maota o sui sa latou Iugafono Malilie Faatasi, e talosagaina ai le komiti faafoe o le LBJ i Fagaalu, ina ia toe tolopo pe fa’aagafua le latou siitaga ua fuafua e amata fa’amalosia i le Aso Gafua o le vaiaso fou.

O lea fa’aiuga na faia e le komiti faafoe ma le pulega a le falemai, ina ua silia i le 60 aso talu ona mae’a talanoaga sa faia ma taitai o le malo e uiga i se tupe e fesoasoani ai i le falema’i, peitai e o’o mai lava i le taimi nei, e leai lava se mea, e pei ona saunoa Moananu Va  i lana tusi ia Togiola Tulafono, i le aso 27 o Ianuari.

Fai mai le iugafono a faipule, e lua lava mea taua e filifili i ai le tagata pe afai e asiasi i le falemai, o se to’omaga mai tiga, manu’a po o le oti foi, po’o le totogi foi o le tautua.

“E le mama lea ituaiga filifiliga, aemaise lava pe afai o lo o i ai le fefe i le oti, ona ua iloa lelei e tagata, o le tau o le kesi o le taavale, pasi, po o le  totogiina foi o se taavale la’upasese e alu ai i le falemai, totogi le $10 poo le $20 i le falemai pe afai e tuana’i itula faigaluega, totogi le $10-$30 mo le tuiina o le toto, $10 le totogi o le fualaau e tasi ua faatonuina e le fomai, $10 pe $20 mo isi fualaau atoa ai ma isi togafitiga, ua le  iloa e le tagata le mea o le a fai,” o se vaega lea o le iugafono malilie faatasi.

Fai mai le iugafono, i le Vaega 13.0602 o le Tulafono Toe Teuteuina a Amerika Samoa, o lo o manino mai ai le agava’a o tagata e aumau i Amerika Samoa e fai fua talavai, po o le mafai foi e le falemai ona fuafua se totogi lelei.

“E  matua le fetaui lava le faia o siitaga e oo atu  le 400%, pe afai e mafaufau Amerika Samoa i le tulaga o loo faavasega mai ai le laina mo tagata matitiva ma le le tagolima, ma o se tulaga e tatau ona magafagafa lelei i ai ma ia fai ma le alofa.”

O le taimi nei, ua toatele alo o le atunuu ua iu mai aoga ma o loo malolo mai galuega ma aoaoga i le atunuu, o le toatele foi o le atunuu ua maitauina le nonofo ai pea i fafo mo le tele o tausaga, ina ua mumusu e toe foi mai i Amerika Samoa, ona o le tulaga maualalo i le tausiga a le falema’i ma ana tautua.

“O siitaga fuafuaina e foliga mai ua le lelei mo i latou ua toe taliu mai i le atunuu, faapea ai foi ma le tagata ua nofomau, ona o le tulaga maualuga ua i ai nei siitaga,”o se vaega lea o le iugafono malilie faatasi.

Fai mai le fono, o se fofo ina ia mafai ai e le falemai ona foia faafitauli e pei ona tulai mai, o le pasia lea e le fono o se lafoga falema’i, lea e tipi mai i totogi o tagata faigaluega, ina ia mautinoa le i ai o se vaega tupe e patino tonu lava lea i le falemai.

O le taimi nei, o le faaauau pea ona galulue le fono mo le sailia o ni tupe maua e fesoasoani ai i le faafitauli o loo tulai mai i le falemai.

O lenei iugafono o loo sainia uma ai suafa o afioga i faipule  ma ua faamoemoe e tatau ona faitau muamua i le Senate i le taeao nei, ma tuuina atu ai loa i le pulega a le falemai.