Ads by Google Ads by Google

“Aloali’i, toe taliu mai i Aiga!” - Fa’asuafa Matai

O ia o se alo o Samoa ua lauiloa i le lalolagi i lana taleni o le “Tusi Solo,” Tusitala” ma le Atisi. O ia o se atali’i o le atunu’u e naunauta’i ina ia saili le atamai fa’aonaponei ma ua o’o i tusi pasi o se Polofesa, peita’i, e le’i galo ia te ia lona vala’auina, e toe fo’i mai i Aiga ma fanua, e avea ma se Matai.

I se tasi o ana tusi na tusia, “Atali’i e toe taliu mai i Aiga” o lea lana manulauti. O lana tusia lea sa tusia a’o avea ma Pule A’oga i le Kolisi o Samoa, a’o le’i avea ma se polofesa i le Iunivesite o le Pasefika i Saute i Suva, Fiti, ma o se ‘au’au ua le galo ia te ia ona fa’ataunu’u.

O le afioaga ua tautua ai nei o ia, i le suafa o lona aiga, “Maualaivao” o le afio’aga lea o Malie, Samoa. “o le fa’amoemoe o le pulega a Ali’i ma Faipule, o se tasi o alo o le afioaga ma aiga ua loa ona fa’alele e saili tomai fa’aonaponei, ae ua toe taliu mai e fesoasoani e atina’e atili le nu’u, ma fa’amalosia so’otaga o aiga, na iloga lava ona talisapaia e i latou le aso To’ona’i ua te’a, lea sa fotuali’i ai lana afioga Maualaivao  Albert Wendt i lona itumalo ma le afio’aga.

“Ua atoa nei le 72 tausaga o le olaga, peita’i e le’i i ai ma se fuafuaga a lo’u nei tagata ou te manatu e avea ai a’u o se matai o lo’u aiga, ae maise o le fa’ae’e mai o se suafa maualuga a lo’u aiga, “Maualaivao” ia te a’u o se sui fa’atauva’a lava i le aganu’u ma totonu o lo’u aiga.”

“E ui la ina ou te le’i manatu lava e fai sa’u saofa’i, aua ou te le’i fa’ananau lava i ai, ae o se mea ua manana’o lo’u aiga ou te faia. O se mea ou te iloa e matua mamafa ma e le gafatia e so’u tomai o i ai ona tau’avea na’o a’u! Ae ou te fa’amoemoe i le fesoasoani mai a lo’u aiga, e fautuaina ai a’u ou te faia!”

O lana ta’utinoga e tusa o le olaga fa’asamoa ae maise i le taimi lenei ua tino matua, sa ia fa’apea ai, “E matua sili ona faigata ia te a’u ona ola ma tau’ave se mea ou te iloa ou te le gafatia i so’u tomai o i ai, e matua mo’omia le tausoa mai a lo’u aiga.”

“E le o se taimi muamua lenei ua taumafai ai le aiga ina ia fa’amata’i lo’u sui fa’atauva’a, “O si o’u tina matua sa fai ma matou to’omaga i lenei nu’u o Malie, e asiasi mai loa, fa’alala mai lona fanoga e fa’amatai a’u, o le taimi lava lena ou te sola ese ai, toe fo’i i fafo nofonofo mai ai. Ua ou toe tepa atu nei i ai, talofa, ua maliu lava o ia, a’o lona lea fanoga sa fa’ailoa mai ia te a’u i le tele o taimi e o’o mai ai i aiga, lea ua fa’ato’a fa’ataunu’u i le aso lenei.”

O le auaiga lenei o ‘Sa Maualaivao’ mai Malie, o le tupuga lea o le aiga ‘Sa Wendt’ i le afioaga o Malie, ma ua fa’ailoa mai e le afioga le Maualaivao Alapati, “O i matou e tupuga mai ia Maualaivao Fili o Malie lava. Peita’i ua silia ma le 10 tausaga o le nofoia le suafa a le matou fo’i faletama. O le sa nofo, ma o lea fo’i e gata mai ai le matou Maualaivao, o lo’u tausoga lea, Maualaivao John Wendt.”

E ui la ina le mautonu lava le mafaufau o le afioga le Polofesa i lona avea o ia ma Maualaivao mo lona aiga, ae maise le latou faletama, ae ua mafua ona o’o mai i Samoa i lenei vaitau, ona ua mae’a le talanoaga a le latou faletama, ua autasia i latou uma, ina ia o’o mai le ali’i Polofesa e tau’avea le suafa mo le latou faletama atoa, ina ia mafai ona toe atina’e le latou fo’i itu o le aiga potopoto i Malie, Samoa e tautuaina ai le afio’aga fa’apea le itumalo, ekalesia ma le atunu’u.

“O lenei se amataga lelei mo le toe fa’aa’e o si o’u aiga po’o le matou fo’i faletama i totonu o le matou Aiga Potopoto ma le Afio’aga.” O lona manatu fa’aalia lea.

O se saunoaga a le afioga Maualaivao Pepe, sa saunoa mo le pa’ia o le aiga potopoto o Sa Maualaivao, na ia fa’apea ai, “O le filifiliga o se tasi e tau’avea le suafa Maualaivao mo lea fo’i faletama e le faigofie, aua e le fa’apea e so’o se tasi lava o suli e o’o mai e fia nofo i le suafa a aiga ona nofo lea.”

“O le filifiliga o le afioga le Polofesa Maualaivao Alapati, o se isi lea fa’aea a le pa’ia o Aiga i lana afioga i lona fa’aea Aiga fo’i e ala i isi tautua ua mae’a ausia e ia e ala i lona sailimalo.”

“Afai fo’i e fa’ae’e atu ma lea fa’aeaga a aiga ia te ia, e mautinoa o se fa’aea fo’i lea a le afio’aga ma le atunu’u mo ia, aua o ia o se alo o Samoa ua lauiloa ai Samoa i ana tusitusiga ma le tofasaili i le atamai fa’aneionapo.”

“Na matou filifili lava e ala i le malosi o lana tofasaili, tofamau ma le tofamamao ua fa’autufia ai o ia e le Atua, aua o le mata’u lava ia Ieova o le amataga lea o le poto i so’o se mea o lenei lalolagi!”

“E ui ina popo’e lava lona sui i ana saunoaga, ae ua mautinoa e lona aiga potopoto, e faata’eta’ealuga lea popolega ia te ia, ua mae’a fa’ao’aina o ia e le Silisili Ese i le tofasaili ma le filiga, e maua’a lona fa’amoemoe ua fia matai e tautua aiga, ua i ai fo’i lona loto atoa ma lona fa’amoemoe e fagaina o ia e lona aiga ma lona Atua i lea atamai o le tofasaili fa’asamoa moni.”

O le afioga Maualaivao Alapati o le lona tolu lea o le fanau e to’a 22 a ona matua  ma o lo’o ua malaga mai o ia i Samoa mo lana saofa’i ma lana fanau e to’atolu: Sina, Mele ma Michael fa’atasi ai ma lana pa’aga o Reina Whaitiri.