Ads by Google Ads by Google

Tala mai le Fono Faitulafono

AISEA FA’ATUPE AI FEMALAGAAIGA MANU’A MAI POLOKALAME FAAPITOA?

O le tulai soo mai o faafitauli i femalagaaiga i le motu o Manu’a faapea ai ma Swains i le tele o taimi, na mafua ai ona tulai se tasi o alii faipule mai Manu’a ia Toeaina Faufano Autele ma ia fesiligia le Fofoga Fetalai, pe aisea e ala ai ona faatupe femalagaaiga mo motu nei i tupe mai lalo o Polokalame Faapitoa, ae ua le faatupe i lalo o Paketi a soo se Ofisa poo se Matagaluega a le malo.

Na saunoa Toeaina, e le’i malamalama lelei lona sui i le mafua’aga e ala ai ona faatupe femalagaaiga a Manua ma Swains Island i tupe mai Polokalame Faapitoa, peitai ua i ai sana fuafuaga i le lumanai, i le fuafua lea o se talosaga e tuuina atu i le fono e tuu atu ai le faatupeina o femalagaaiga mo motu ia e lua i lalo o le Paketi a le Ofisa o Taulaga ma Malaevaalele, aua o le latou matafaioi tonu lea.

Saunoa Savali Talavou Ale, i tausaga ua mavae sa faatupe mai ai femalagaaiga mo motu ia e lua i le Paketi a le Ofisa o Taulaga ma Malaevaalele, ae talu ai o faafitauli sa masani ona tulai mai, i le toe saili atu o tupe sa faaagaaga mo femalagaaiga ua uma ona faaaoga i isi fuafuaga, na mafua ai loa ona fai le manatu e tuu sao loa le faatupeina o femalagaaiga mo motu o e lua i lalo o polokalame faapitoa.

Saunoa le afioga i le fofoga fetalai e faapea, e le o se isi mafuaaga na ala ai ona faia lenei suiga, ae ona o le manatu ina ia aua nei toe faaletonu tupe e faaagaaga mo femalagaaiga mo Manu’a.

O le taeao nei lea ua faamoemoe e faitau tolu ai e le maota o sui le latou pili tupe e faasoasoa atu ai le aofaiga e $35,000 e faatupe ai femalagaaiga mo le motu o Swains.

I le paketi o  le 2012 a le malo lea na pasia e le Fono, sa tuuina mai ai le $35,000 mai lalo o tupe mo Polokalame Faapitoa e faatupe ai femalagaaiga mo Swains, peitai o suiga sa faia e le fono lea na teena e le kovana, na faaletonu atoa atu ai ma le tupe lea e $35,000 mo Swains.

O le pili tupe la lea na pasia e le maota o sui i le faitauga faalua i le aso ananafi, ma ua faamoemoe e faitau tolu i le taeao nei, o le a mafai ai ona toe faasoasoa atu lea aofaiga mo le motu o Swains.

SAUNI FAIPULE E TU’I FESILI LE FAATONUSILI OFISA GALUEGA MALO

O le taeao nei le 8:30 ua faamoemoe afioga i alii faipule o le a o latou tu’i fesiliina ai le Faatonusili o le Matagaluega o Galuega a le malo, ona o le mafuaaga ua ala ai ona tele faafitauli i vaega eseese o alatele a le malo e aunoa ma se gaioiga o faia i ai.

Talu lava ona nofoia mai le Tauaofiaga lenei a le Fono, ua le masino le tele o faasea ua oo atu i luma o le maota o sui e faatatau i le tele o vaega o le atunuu o loo faaletonu auala.

Ua oo lava i luga o le polokalame a le alii kovana ia Togiola Tulafono i taeao o Aso Toonai, ma le alii faipule ia Faleomavaega Eni i afiafi o Aso Lulu ua faaleo ai e le atunuu o latou lagona le fiafia ona o le omoomo ma le patupatu solo o vaega o le alatele.

O nisi o faasea mai faipule e aofia ai le faaaoga o asuemu e tanu ai omoomo o le auala, ae a oo foi ona tetele timuga ona toe tafea ese foi lea, ma ua avea lea tulaga ma itu ua faaaoga ai e nisi o afioaga ma’a e tau faatutumu ai omoomo, ona o le manumanu i le faaleagaina ai o taavale a tagata lautele.

PASIA SUIGA TULAFONO FAATULAGA AI TAUSAGA O LE TEINE FAAIPOIPO

O le taeao nei lea ua faamoemoe e faitau tolu ai le tulafono taufaaofi o loo i luma o le maota o sui, lea ua faatulaga ai suiga i tausaga e tatau ai ona faaipoipo le tamaitai.

O le tulafono o loo i ai nei, e mafai ona faaipoipo le tamaitai i le 14 tausaga, pe afai ua ma’itaga o ia ma ua malilie foi ona matua e faaipoipo, peitai o suiga e pei ona faaulu i le tulafono taufaaofi lea e pei ona pasia e le maota o sui ananafi, o le a sui mai ai le 14 tausaga i le 18 tausaga.

O lea suiga sa faia ina ua maea ona fautuaina e nisi o molimau mai le malo le komiti sa gafa ma le iloiloina o lenei tulafono taufaaofi, faatoa sauni lelei le mafaufau o le teine e fai sona aiga pe afai e 21 ona tausaga.

Saunoa le afiogai le alii faipule ia Lemapu Suiaunoa Talo, o ia lea na faaulufaleina lenei tulafono taufaaofi, o le mafuaaga o suiga i le tulafono, ona o le 14 tausaga e pei ona taua i le tulafono o loo i ai nei, o ni tausaga ua laiti tele pe a faatusatusa i le matutua lea ua tele ina faaipoipo ai tamaitai i ona po nei.