Ads by Google Ads by Google

Tuuaia leoleo po Pago Plaza i le fa’atau atu o mariuana

O le alii Sikulati (Security) o le Pago Plaza lea o lo o tu’ua’ia na maua i ai e leoleo mariuana i le vaiaso na tea nei, ua toe taofia nei i le  falepuipu i Tafuna e faatali ai lana uluai iloiloga lea ua faatulaga e faia lea i le aso Lulu o le vaiaso fou, i luma o le alii faamasino o John Ward II.

I faamaumauga a le faamasinoga o loo taua ai e faapea, e 5 sikaleti mariuana ua uma ona taai na maua e leoleo i totonu o le taga o le ofu a le leoleopo sa fai, ma isi sikaleti mariuana e 10 sa maua i totonu o lana ato ta’ita’i.

O le osofaiga a leoleo faasaga i le alii o Matafua Mataipule na faia lea ina ua maua e leoleo se telefoni mai se latou molimau faatuatuaina i le aso 18 o Ianuari, e faailoa atu ai lona faatauina mai lea o se sikaleti mariuana mai le ua molia.

Na aga’i atu le alii leoleo suesue o Det. Paselio ma piki mai le sikaleti mariuana mai le molimau i le nofoaga o le Pago Plaza, ma faia loa i ai se suega i lea sikaleti, ma faamaoia ai o lea sikaleti, o se sikaleti mariuana.

Sa i ai foi le isi molimau sa ia taua i leoleo e faapea, sa la talanoa ma Mataipule i le aso 18 Ianuari, lea na faailoa atu ai e le ua molia ia te ia, o loo i ai ana mariuana faatau, ae talu ai e lei i ai se tupe a le molimau i le taimi lea, na la tuu tala ai loa ma Mataipule o le a alu atu ma le tupe e faatau mai ai mariuana i le aso e sosoo ai, le aso  19 lea o Ianauri.

I le aso 19 Ianuari, na faatau mai ai e le molimau lona lua lea sikaleti mariuana e lua mai ia Mataipule e pei ona taua i faamaumauga a le faamasinoga, ma ia tuuina atu ai sikaleti ia i le alii leoleo o Det. Paselio, lea foi na faia i ai suesuega ma faamaonia mai ai,  o sikaleti ia o sikaleti mariuana.

Ina ua sainia e le alii faamasino ia John Ward II se poloaiga a le faamasinoga e saili ai le tino ma meatotino a le alii o Mataipule, na toe faatulaga ai loa foi e leoleo le isi a latou osofaiga, o le faatolu ai loa, i le aso 24 Ianuari, mo le faatauina mai o nisi mariuana mai le ua molia, ma, ina ua maea le gaioiga lona tolu lea, na agai atu ai loa i totonu o le Pago Plaza le alii leoleo o Det. Fatuesi ma fesiligia le ua molia e tusa ai o lona oo atu, e aofia ai le faailoaina i ai o ia o le leoleo, atoa ai ma le mana’omia o se talanoaga ma ia.

Ina ua faailoa e Det. Fatuesi ia Mataipule faamatalaga e faatatau i lona faatauina atu lea o mariuana, sa teena e le ua molia lea, tala, peitai ina ua faaauau le suesuega, sa maua ai i totonu o se tasi o taga o lona ofu sa fai se tamai taga pepa sa i ai sikaleti e 5, sa fesili leoleo ia Mataipule poo a mea ia, na tali le ua molia, “o mealele”.

Sa faaauau le suesuega i lana ato sa taatia i tafatafa o le laulau sa i totonu o le ofisa, ma maua ai i totonu o le ato se taga pepa iila sa i ai sikaleti e 10, sa faia se suega i sikaleti ia ma faamaonia ai, o sikaleti mariuana.

Sa faapea foi ona faia se suega i sikaleti e 4 ia na maua mai e tagata e toatolu sa faaaoga latou te faia faatau mai le ua molia, ma faamaonia ai o mariuana  uma sikaleti ia.

Ua teena e Mataipule moliaga e lua faasaga ia te ia, o lona umia faasolitulafono lea o mariuana, atoa ai ma lona umia ma le faamoemoe e tulei ma faatau atu i isi tagata.

E $40,000 le tupe lea ua faatulaga e tatala ai lenei alii i tua mai le toese, ma afai ae mafai ona tatala o ia i tua mai le  toese, ua poloaina e le faamasinoga o ia e aua nei ona toe umia ni fualaau faasaina, pe taumafai foi e tuua le teritori, a ia tuuina atu ona pepa malaga e taofi e le malo sei maea lana mataupu ona toe tuuina atu lea ia te ia.

I faamaumauga a le faamasinoga o loo taua ai, o le fa ai lenei o tausaga talu ona avea Mataipule ma leoleopo mo le Pago Plaza, le nofoaga na maua ma taofia faapagota ai o ia e leoleo i le aso 24 Ianuari, ma maua i ai mariuana ia te ia e pei ona tuuaia ai o ia e le malo.

Na faailoa e le ua molia i leoleo e faapea, o le 5 ai lenei o tausaga talu ona ia faia lenei galuega o le tuleiina atu lea o mariuana i ana uo ma isi tagata, e ala i le faaaogaina lea o le nofoaga o loo faigaluega ai.

E tai $5 sa ia faatauina atu ai le  sikelati mariuana e tasi, ma e tusa ma le $25 le tupe na te maua i le aso e tasi mai le faatauina atu o mariuana.

O le uta mariuana mulimuli lava sa ia faatauina, na maua mai ina ua alu atu se tasi o ana uo ma avatu ia te ia se afiafi i le aso 22 Ianuari, ma e tusa ma le 30 sikaleti sa maua mai ai.