Ua tu’ua’ia nei Aaron Wisdom, i le moliaga mamafa o le umia fa’asolitulafono o mariuana, fa’apea moliaga mama e lua o le umia faasolitulafono o o pulafana ma fana e le’i lesitalaina.

Na afua mai moliaga o Wisdom, ina ua maua e sui o le Ofisa o Tiute i totonu o se koneteina sa ia aumaia i totonu o le teritori, ia ni mariuana, o fana e tolu ma ni pulufana.

Ina ua tula’i Wisdom i luma o le Fa’amasinoga Fa’aitumalo i le taeao ananafi, sa ia te’ena tu’uaiga uma a le malo fa’asaga ia te ia, ma ua fa’atulaga ai loa le isi ana iloiloga e faia i le Aso Gafua o le vaiaso fou, e su’esu’e pe fa’amaonia sa soli se vaega o le tulafono, ae pe o ia foi lea o lo o tu’ua’ia i le solia o lea vaega o le tulafono.

E tusa ai ma faamaumauga a le fa’amasinoga o lo o ta’ua ai e fa’apea, o mariuana, fana ma pulufana ua tu’ua’ia ai Wisdom, na maua e le alii Ofisa o Tiute ia Iuliano Falaniko a’o ia iloiloina se ‘container’ e 20 futu, i luga o le uafu tele i Fagatogo, i le vaiaso na tea nei.

O lea ‘container’ o lo o i ai meatotino a Wisdom ma lona aiga ona o lea fa’ato’a taunu’u mai ma lona aiga mai le setete o San Diego i Kalefonia sa nonofo ai.

Na i ai Wisdom i le taimi na su’esu’eina ai e sui o le Ofisa o Tiute ia le ‘container’, lea na maua ai se tama’i fagu na maua ai ni laula’au lanumeamata i totonu, e foliga mai o ni mariuana.  E le gata i lea, na maua ai fo’i i totonu o le’container’ ni paina mata’eta’e e masani ona fa’aaoga e ula ai mariuana, fa’atasi ai ma se tama’i pusa laupapa na i ai i luga se ata o se lau mariuana.

Ina ua fesiligia e sui o le Ofisa o Tiute ia Wisdom, na ia fa’amaonia, o mea uma na i totonu o le ‘container’, o ana mea totino ia.  O lea na auina mai ai loa Wisdom i le ofisa a leoleo mo le toe fa’aauauina o ana su’esu’ega.

O lo o ta’ua fo’i i totonu o fa’amaumauga a le fa’amasinoga, le fesiligia o Wisdom po o ai na teuina lana ‘container’, na tali o ia, o ia ma sana uo, i Amerika.  Ae na ta’ua e Wisdom, e na te le iloa pe na fa’afefea ona o’o le mariuana i totonu o le ‘container’.

Sa mafai ona su’esu’eina laula’au na maua i totonu o fagu mata’eta’e, ma fa’amaonia ai o mariuana.

Na taofia le su’esu’ega o le ‘container’ i lea aso, ina ua maua ai n i apogaleveleve.

O lo o ta’ua fo’i i totonu o fa’amaumauga e fa’apea, o le taeao o le Aso Tofi, Ianuari 19, 2012, na toe o’o atu ai sui o le Ofisa Tiute mo le toe fa’aauauina le su’esu’eina o lenei ‘container’, lea na aofia ai ma ta’ifau fa’apitoa a lea ofisa.

Na maua ai i lea su’esu’ega, i le pito i tua se fagu sa i totonu o se atigipusa o mea e fa’aaoga i le umukuka.  Na maua ai i totonu o lea pusa ia se atigi fanu e tumu i se mea e foliga mai o se siamu, ma na ta’ua e Wisdom, o se siamu na ia gaosia.  Ae ina ua taumafai sui o le Ofisa Tiute e tatala le fagu, na taumafai Wisdom e taofi, ma se fa’amatalaga, e ono fa’aletonu ai le siamu.

O le fagu siamu lea na maitau e sui o le Ofisa Tiute, e le i aofia i mea na tu’u i luga o le ta’avale mo le la’uina mai i le ofisa a leoleo.

Ina ua fesiligia e alii ofisa o Tiute le fagu, na tali Wisdom, ua alu ma lana uo teine, lea na tu’umuli atu loa sui o le malo e sa’ili ma maua atu i le McDonald’s.

Ina ua tatalaina e leoleo ia le fagu siamu, na maua ai i totonu ni tama’i ‘container’ u’amea lapotopoto.  Na fa’amaonia i su’esu’ega a leoleo, o le siamu ma mea na maua i totonu o ‘container’ u’amea sa i totonu o le siamu, o mariuana uma.

Na talia e le fa’amasinoga le fa’afinauga a le alii loia fautua lea o lo o tula’i mo Wisdom ina ia fa’aitiitia le tupe e tatala ai o ia, mai i le $30,000 i le $20,000.