Saisaitia Sui Lona 5 - Moliga o le Megaupload

Mai Ueligitone i Niu Sila ua fa'ailoa mai ai le te'ena pea e le ali'i fa'amasino o Judge David McNaughton le mau e fia fa'atulaga se tinoitupe e totogia ona tatala lea i tua o le ali'i faipisinisi Uepesite o Kim Dotcom lea e lokaina ai ona o tu'ua'iga ma moliga e fa'asaga ia te ia i lona osofa'ia o uepesite a isi tagata ma fa'alauiloa nisi o fa'amaumauga o lo'o i ai, sa le tatau ona latou fa'ailoa atu i se tasi e aunoa ma lo latou malilie i ai.

Peita'i, ua molia mai nei le isi sui e to'alima i ai i latou ua molia i lenei lava faiga fa'afeso'ota'i o Uepesite i le Initeneti, ma o i latou nei sa galulue feso'ota'i lelei ma le Megaupload a Kim Dotcom, ma ua i ai fo'i latou a'afiaga o lenei solitulafono sa amatalia e Kim ma lana tautua fa'ainiteneti.

E ui la ina ua le faia e le ali'i fa'amasino se fa'ai'uga i le tinoitupe e ao ina totogia e tatala ai i tua Kim e tatalia ai lona fa'amasinoga, ae ua ia vave fa'atulagaina le aso e faia ai le fa'amasinoga o lea ali'i ia Fepuari 22 ina ia mafai ona toe fa'afo'ia ai o ia i Amerika e faia ai lona fa'amasinoga atoa, e tusa ai o lana solitulafono sa tulituliloaoina ai o ia.

Ua fa'ailoa e le Fa'amsino, "E afua ona le fa'atulagaina se tinoitupe e tatala ai i tua Kim Dotcom, ona e masalomia le toe sola ese mai o Kim i se isi atunu'u pe a uma ona totogia lea tinoitupe e tatala ai i tua.

Peita'i ua fa'ailoa e Kim, lea ua atoa le 38 tausaga o lona soifua, "E le o a'u o se tasi e sola ese mai lenei tu'ua'iga ua fa'asaga ia te a'u ma nisi o a'u pa'aga fa'apisinisi." O le tala mai, o lo'o ua fa'atau atu e le MegaUpload le tele o ata tifaga, pese ma nisi fo'i o tusitusiga e ao ina totogia muamua. O le tau aofa'i i nisi o nei mea ua fa'asalalau fa'alaua'itele ma fa'atau solo ae le'i mua'i totogia e le Megaupload e tusa ma le $500miliona."

I Uosigitone ua fa'ailoa fa'apitoa mai e le Matagaluega o Fa'amasinoga ua mae'a saisaitia mai le sui lona lima o lea vaega faipisinisi Uepesite ua molia fa'atasi i nei solitulafono, ma ua mae'a saisai mai e le vaega o Leoleo i Nouei, le ali'i o Andrus Nomm, e 32 ona tausaga, o se tagatanu'u o Estonia peita'i o lo'o alaala i Take ma Estonia. O lo'o ua le fa'aalia atoa mai nisi o fa'amaumauga o lea saisaitiaga, ona  o lo'o fa'aauau pea sailiga o le isi to'alua o lo'o totoe mo le to'afitu o sui o lo'o molia i nei faiga sese e ala i feso'ota'iga ma fefa'ataua'iga i luga o le Initeneti.

O nei tagata e to'afa ua saisaitia nei i Niu Sila, o le a avea fa'amalosi uma ane i Amerika e faia fa'atasi ai le latou fa'amasinoga, ae ave'esea mai fo'i ma Nomm mai lona malo i totonu o Amerika mo lea lava fa'amasinoga e tasi.

Mai Jakarta Initonesia, ua fa'ailoa mai ai, o latou elefane o maua i lea malo, e tauau e le toe i ai se elefane e totoe i lea malo i le isi 30 tausaga o lumana'i. O se mea e ao ina faia i ai se vaega a lea malo, ina ia mautinoa, e i ai pea ni elefane e ola i lo latou atunu'u.

Ua fa'amau le mana'oga, ina ia le toe taina le vaomatua, ma le toe gausia le vao e fa'atutu ai ni fale fa'aonapo nei, ae tu'u le vaega tele o le vaomaoa e fa'atata'a ai nei oloa o le atunu'u, ae le'i o'o ina le toe mafai ona faia se vaifofo i lea fa'afitauli fa'anatura.

Ua mae'a lisia le igoa o Elefane i le lisi o manu ua i ai le tulaga - tauau e mou atu, ma le toe maua i luga o le lau'ele'ele. O lona uiga, e ao ina matua taumafai atunu'u uma o lo'o maua ai Elefane i o latou laueleele ina ia fa'asao nei manu.

O le faitauga sa i ai i le tausaga e 1985 e 5,000 elefane i le lalolagi atoa, peita'i, ua totoe nei ua i ai le faitauga i le va o le 2,400 ma le 2,800.

O le tulaga maulalo o le faitau aofai, ona ua le toe faatauaina e malo o i ai nei manu le fa'asaoina o nofoaga mo elefane. Ua matele ina ta le vaomatua mo le laupapa i Sumatra, ua taina fo'i le pama mo le suau'u, ae o isi la'au fo'i e gaosia ai le pepa.

O le malo lea o Sumatra e matua tele ai lava le elefane i ona vaomaoa, ma e ese mai fo'i i Initia ma Sri Lanka ma e tele ai fo'i le taika ma rino po'o sua'a sami. I Initonesia, e tele ina o'o mai elefane i nofoaga o lo'o nonofo ai tagata, ona o le tau sailia o latou mea'ai, ma latou te fa'atama'ia ai latou fa'ato'aga ma fa'aoso ita i le vaega o tagata lea tulaga.

O nisi elefane ua tafana lava e tagata ae fa'atau atu nifo i le au fa'atau oa e fa'apea e fausia ai nifo fa'apipi'i ma iai oloa e i ai taulima, tautaliga ma isi oloa taugata fa'apena.

Lau le i'uga Tamaloa Fasia le Sui Molia Fa'atauma'oi Teineitiiti.

Mai le a'ai o San Jose, ua fa'ailoa mai ai se 'au uso tama ua lauina lo la'ua i'uga ina ua la fasia se tasi na asiasi ane i le latou fale,  ae ua la'ua iloaina lelei, o le sui lea sa molia i le fa'atauma'oia o se la'ua tei teine 8 tausaga le matua.

Ua fa'ailoa mai e le nusipepa a le San Jose Mercury o le ali'i o Miguel Cerda e tolu tausaga ae o lona uso o Erik e lua tausaga e nofo ai i le to'ese ona o le la'ua fa'ao'olima i le ali'i fa'amalosi teineitiiti o Avelino Rodriguez, o ia lea o lo'o tulia fo'i le 22 tausaga i le to'ese mo  ana solitulafono lea sa faia i le teineitiiti.

E tolu ituaiga moliga na fa'asaga i nei talavou na fa'ao'olima i le ali'i solaitulafono matuia o Avelino, peitai na toe fa'amatu'u ese e le fa'amasinoga isi moliga e lua mulimuli, ina ua le tete'e lava lea to'alua i o la'ua moliga mai le amataga o le la'ua iloiloga ia Oketopa 2011.

O se lipoti mai a ali'i leoleo su'esu'e sa fa'aalia ai, na fa'ato'a fa'ao'olima lava le to'alua lea i le ali'i fa'atauma'oi teineitiiti ina ua faia le molimau a si teineitititi lea, sa fa'afefe o ia ma fa'atape e le ali'i lea lona gutu ona fa'ato'a faia ai lea o amioga fa'aleituaiga ia te ia.

"O i'ina loa na fa'ato'a avea ai loa e le 'au uso lea le ali'i o Avelino i le fa'ato'aga i Gilroy ma fa'amo'amo'a ai loa i'ina, ma ua maua ai nai ona mata uli e lua, matua gau lele lava le 'auvae latou, ma ua to'ulu isi ona nito i le ta, ae le taulia ai le matua tele o totolia o lona tino o mea na taua ai kiki ma tu'i masasau lava! Ae na ta sasa fo'i!

Te'ena Tamaitiiti 10 Tausaga Moliga - Fasioti Tagata

Mai San Diego, ua fa'ailoa mai ai le tamaitiiti e na'o le 10 tausaga ua ia te'ena ona moliga o le fasioti tagata, ma le fa'ao'olima.

O lea tamaitiiti sa ia tuia lana e uo e na'o le 12 tausaga le matua, peita'i, na mua'i fa'aulua lea mataupu i le Fa'amasinoga mo le fanauiti, ae ua faatonuina e le fa'amasinoga mai lea vaega, ina ia fa'aulu i le fa'amasinoga maualuga lea mataupu e iloilo ai ma faia mai ai se fa'ai'uga i lea tamaitiiti solitulafono.

Ua fa'atonuina fo'i e le fa'amasinoga mo fanau iti, e tatau lava ona taofia pea lea tamaitiiti i le fa'amasinoga seia o'o mai i le aso ananafi, ae o le a fa'atautaia le fa'amasinoga e afua mai i le aso 23 Fepuari, 2012 e fa'amausali a'ia'i ai pe alagatatau ona faia se fa'amasinoga o lea tamaitiiti la'itiiti tele.

Na aofia ai ma le tina o lenei tamaititi i le iloiloga a le fa'amasinoga o lana tama, ma sa toe fa'atonuina fa'atasi i la'ua ma lona alo, ia toe o ane i le aso Tofi e fa'amae'a ai iloiloga e fa'asaga i lona alo.

O le tamaitiiti lea e 10 tausaga na saisaitia mai ina ua molimauina lona fasiotia o lana uo e so'ofale lava i latou i le aso Gafua na te'a nei i le vaia'ai i sasa'e o San Diego. Na ia tatuiina lana uo i luga o le alatava'ela o le fale o le ali'i 10 tausaga lea.

Ua fa'ailoa mai e le latou vai a'ai, o le ali'i lea e 10 tausaga, e iloga lava e i ai taimi e to'atama'i ai e matua e'e lava i luga, ae fiafia lava i ai tagata uma o le latou vai a'ai.