Ads by Google Ads by Google

SU’A: TAUAU INA MOU ATU LE MAMALU MA LE TAUA MAMANU A SAMOA

O le soona ta solo o mamanu a Samoa i vaega o le tino e pei o ogavae ma tauau, aemaise ai foi le lolomi i mitiafu, o ni isi ia o auala e manatu ni isi o tufuga ta tatau, ua atagia mai ai le manatu mama o ni isi o tagata i le taua ma le mamalu o mamanu a Samoa, ma ua agai foi ina mou atu le faataua e nisi o ia tulaga.

E talitonu le Aiga Sa Sua o lo o fitoi tonu i ai le galuega o le taina o tatau e faaaoga i ai mamanu a Samoa, e tasi lava le auala e ala ai ona ta mamanu i le tino o le tagata, pe afai o lea tagata o lo o laei i le soga’imiti po o le malu.

“E le o se mea sa’o le ta o le soga’imiti i le ogavae, tauau poo le lolomi foi i mitiafu, e le atagia mai ai le mamalu o le soga’imiti pe afai e fai faapena, o le soga’imiti lava ia o le laei lea a tama tane, e onomea ai foi le tama tane pe afai e taoto sa’o le laei i le vaega tonu o le tino e tatau ona ta ai,” o le saunoaga lea a le susuga Su’a Vaofusi Pogisa Su’a, o se tasi o tufuga ta tatau mai Samoa na malaga mai e auai i le tauvaga ta tatau, lea o le a faatautaia i Alega i le “Tisa’s Barefoot Bar”  i le aso a taeao mo le tolu aso.

O Su’a, o lona uso o Su’a Faumuina Tupou Su’a ma le la tausoga o Pogia Aiulu Faumuina, o i latou ia e o mai i le Aiga Sa Sua o Gagaifovao Lefaga, se tasi o Aiga ta tatau i Samoa, ua malaga faapitoa mai e avea ma ni isi o tufuga iloga o le a auai i le tauvaga ta pe’a o lenei tausaga, e atoa i ai le 8 o tausaga talu ona faia lenei tauvaga.

O le agaga autu e pei ona taua e Tisa ina ua fesiligia e tusa ai o lenei faamoemoe, o le maua lea e le atunuu o le avanoa e maimoa ai i ni isi o tufuga ta tatau e tupuga mai i Aiga ta tatau iloga o le atunuu, e malaga mai e auai i lenei faamoemoe taua.

“Ua ou manatu e aumai le aiga Sa Sua mai Lefaga, e faasoa mai foi lo latou silafia e faatatau i lenei galuega,” o le saunoaga lea a Tisa.

Na taua e Su’a i se faatalatalanoaga ma le Samoa News ananafi, e iloa le tatau moni pe afai na ta i ‘au o lo o faatino ai le galuega, ae afai o se tatau na ta i se masini, o lona talitonuga e le o se tatau lena mea.

Saunoa Su’a, o ‘au e tolu e faaaoga e soo se tufuga e ta ai le tatau e aofia ai le ‘ta pulu’; ‘togi ‘aso’ ma le ‘au mono’, poo le ‘au teu’.

Fai mai lana mau, “e tofu lava ‘au nei e tolu ma le aoga, e eseese foi taimi e faaaoga ai pe a ta le tatau, e le mafai la ona faapea mai le tufuga ta tatau sa faaaoga le masini e tapulu ai le pe’a pe tusi ai fo’i le ata, aua e ese le ‘au tapulu ese le ‘au teu.”

Saunoa Su’a, o le taua o mamanu a Samoa o lo o atagia i lana tatau, o lo o faailoa atu ai tu ma agaifanua a le atunuu i le lalolagi, e tatau foi la ona faataua ma puipui malu i ai Samoa uma, e pei foi ona naunau Aiga ta tatau a le atunuu e puipui ma faataua.