Ads by Google Ads by Google

FA’AFETAI TUILAEPA IA TOGIOLA MO LANA NOFOAIGA

E ui o lea ua toe o ni nai masina ona faasifo lea o le taitaiga a le afioga i le matua ia Togiola Tulafono mo le Sa o Tutuila ma Manu’a, peitai na faaaoga e le afioga i le alii Palemia a le malo o Samoa, susuga Tuilaepa Lupesoliai Sailele Malielegaoi le avanoa na ia maua i le fonotaga a malo e lua i le vaiaso nei, e momoli aloaia atu ai lana faafetai ia Togiola e tusa ai o lona taitaiina o le Sa o Amerika mo tausaga e tele.

O le faaiuga o le fonotaga i le va o taitai o malo e lua ma a laua taupulega i le aso Gafua na te’a nei, na maua ai loa le avanoa o le alii Palemia e saunoa faafetai ai ia Togiola e tusa ai o lana nofoaiga, aemaise ai o lana faamanuiaga i se taitai fou o le a tulai mai, ina ia mulimulita’i i alafua ua faataoto e le kovana ina ia manuia ai malo e lua m a ona tagata.

Saunoa Tuilaepa, o Togiola o se tasi o taitai sa taulamua i le unaia o talanoaga i le va o Samoa e lua, ina ia faatumauina ai le galulue soosoo tauau o malo e lua, ma ia faaleleia tulaga o felauaiga ma fesootaiga i ona tagata.

Fai mai Tuilaepa, o le taitai e galue faamaoni i le valaauina o ia e le Atua e fai ma taitai, faatoa uma lava lana galuega ina ua valaau le Atua ia te ia, ae le faatalitali sei oo i le taimi o le palota, e pei foi ona tuuaia ai lana vaega faaupufai i Samoa e le atunuu, faatoa laga lava i luga a latou galuega pe a latalata mai le palota.

Sa ia taua foi e faapea, afai e toe to manatu i le uluai taimi na amata mai ai talanoaga nei, ona ia maitauina lea o le tulaga manuia ua i ai le galulue soosoo tauau o malo e lua.

“Masalo toe pau lenei o le tatou feiloaiga ona oo lea i le taimi e faaiu ai lau nofoaiga Togiola, ae avea ai lenei avanoa e momoli atu ai la’u faafetai e fai ai a’u ma sui o Samoa ma ona tagata, e tusa ai o lau tautua i lenei itu o le atunuu aemaise ai o tausaga e tele sa tatou galulue soosoo tauau ai mo se manuia o Samoa e lua, o faamanuiaga mo lau afioga ma le faletua, ia faasino atu e le Atua se isi auala lua te toe auauna ai mo Amerika Samoa,” o le saunoaga lea a Tuilaepa.

Fai mai Tuilaepa, o le malo o Amerika, o le malo pito sili lea ona paoa i le lalolagi, e le gata i lona malosi tau pulega, ae faapena foi i lona tamaoaiga ma tulaga tau fefaatauaiga, o le mea lea e le tatau ai ia Amerika Samoa ona tuu lafoa’i lo la sootaga vavalalata ma Amerika.

Na talosagaina e Tuilaepa le malo o Amerika Samoa ina ia aua nei o latou tuu lafoaia lo latou faiga paaga masani ma le malo o Amerika o loo i ai i le taimi nei, a ia faaauau pea ma faaleleia ona o iina o loo tafe mai ai lona manuia, lea foi e manuia atu ai ma Samoa.

“O la’u talosaga i lau afioga i le kovana sili atoa ai ma nisi taitai o loo fou fou mai i le lumana’i, aua le tuu lafoaia la outou faiga paaga ma le malo tele o Amerika a ia outou mafuta lelei pea i ai, o a mea e tulai mai i lo outou va poo nisi foi o tulaga e tau afaina ai la outou faiga paaga, o la matou tatalo, ia saga tafe mai pea le susu ma le meli iinei ia Amerika Samoa, aua e malolo puupuu iinei le tamaoaiga ae faai’u uma atu ia matou, o le ala lena matou te naunau ai pea ia faamausailiina pea la outou va nonofo ma Amerika, aua e lelei outou tou te tua i le vao ola a’o matou, matou te tua i le nonu la le, a alu alu fo’i ua le taulia la matou nonu o loo ave i fafo ona matou nofonofo fo’i lea ma tau saili se isi auala e maua ai se isi tupe mo matou,” o le saunoaga lea a Tuilaepa ma tali e ai le fonotaga.