Ads by Google Ads by Google

Faasala e le Fa’amasinoga i le ta’i 14 masina toese ni ali’i talavou

ausage@samoanews.com

E ta’i 14 masina i le toese lea ua fa’asala ai e le Fa’amasinoga Maualuga ni ali’i talavou se to’alua, ina ua ta’usala i laua i le moliaga mamafa o lo la taliaina lea o ni oloa sa ave fa’agaoi mai se fale o se aiga.

 

O le fa’asalaga fa’a falepuipui ua tuuina atu ia Fuavai Sua ma Lualima Taliu, o se tasi lea o tuutuuga o le la nofovaavaaia e 5 tausaga na tuuina atu e le fa’amasinoga maualuga i le vaiaso na te’a nei.

 

Na ulua’i tuuaia e le malo ia Sua i le moliaga mamafa o lona taliaina lea o ni oloa sa ave fa’agaoi, peita’i i lalo o se maliliega sa ia sainia ma le malo, na ia malie ai e tali ioe i le moliaga na toe teuteu e le malo, ina ia faailoa ai le solitulafono o lona fesoasoani lea i se isi tagata e talia ni oloa sa gaoi.

 

I le tali ioe ai o Sua i le moliaga e pei ona ta’usala ai o ia, na ia ta’utino ai e fa’apea, i se taimi o le aso 8 o Iulai 2017, na ia malie ai e fesoasoani ia Taliu i le fa’atau ese ina atu lea o ni oloa sa gaoi e aofia ai se DVD player, DVDs, o se pea seevae i se tasi o ona aiga i Faleniu.

 

Na ta’utino atili Sua e fa’apea, sa ia iloa lelei lava, o oloa na la faatauina atu ma Taliu, sa gaoia mai i se fale i Nuuui. O ia fo’i oloa e silia i le $100 le tau aofa’i.

 

O Taliu na ulua’i tuuaia e le malo i moliaga e aofia ai le talepe fale i le tulaga lua, gaoi, talia o ni oloa sa ave faagaoi, fa’apea ai ma le tu fua i le fanua poo le fale o le isi tagata e aunoa ma se fa’atanaga.

 

Ae i lalo o se maliliega na latou sainia ma le malo, na ia malie ai e tali ioe i le moliaga o le taliaina lea o oloa sa ave fa’agaoi. I le taliaina ai e le fa’amasinoga o le maliliega a Taliu ma le malo, na solofua ai loa e le fa’amasinoga isi moliaga sa totoe ai i le tagi sa fa’aulu e le malo.

 

I le tali ioe ai o Taliu i le moliaga e pei ona ta’usala ai o ia, sa ia ta’utino ai e fa’apea, i se taimi o le aso 8 Iulai o le tausaga na te’a nei, na la aga’i atu ai ma Sua ma fa’atau atu i se isi tagata i Faleniu ni oloa sa gaoia mai i se fale i Nuuuli. O ia oloa e aofia ai se DVD player, DVDs, faapea ai ma se pea seevae. Sa ia taua atili e fa’apea, o oloa na fa’atau atu e silia i le $100 lo latou tau aofa’i.

 

Ina ua maua le avanoa e fa’aleo ai ni a laua fa’amatalaga fa’ai’u i le fa’amasinoga, na fa’ailoa ai e Sua ma Taliu lo la salamo moni e tusa ai o le solitulafono e pei ona ta’usala ai i laua, ma ua la mana’omia se isi avanoa e toe fo’i atu ai i o la aiga e tautua matua, nu’u ma le ekalesia.

 

Na taua e i laua nei e fa’apea, o le 13 masina lea na taofia ai i laua i le toese, ua mafai ai ona la aoaoina se lesona taua mo le lumana’i. Na faatoese i laua i le fa’amasinoga ma tagatanu’u o Amerika Samoa e tusa ai o le la solitulafono. E lei fa’atoese i laua i le aiga  sa a’afia i le la solitulafono.

 

Na tutu fa’atasi le la loia ia Michael White ma le loia a le malo ia Woodrow Pengelly ina ia fa’asala i laua i se fa’asalaga faanofovaavaaia. Na taua e White e faapea, o Sua ma Taliu, o ni ali’i talavou fa’atoa molia lava lea i ni solitulafono.

 

Saunoa le afioga i le ali’i Fa’amasino Sili Lagolago ia Elvis P Patea e fa’apea, e atagia mai i ripoti ua i luma o le fa’amasinoga, o le mafua’aga atoa na ala ai ona fa’atau atu e Sua ma Taliu oloa na gaoia mai, ona o le manatu ia maua ai se tupe e fa’atau ai a laua pia.

 

E 5 tausaga lea ua faanofovaavaaia ai Sua ma Taliu i lalo o tuutuuga e ao ona la usita’i i ai. O ni isi o ia tuutuuga e aofia ai lo la tuliina lea o masina e 20 i le falepuipui, peita’i, o le a tuli na o masina e 14, ae o le umi o loo totoe ai o le a fa’amalumalu. Ua fautuaina i laua e le fa’amasinoga ina ia saili ni la galuega ma aua nei o la toe solia se tulafono a le malo.