3 pepe tausaga fou 2018 - maua meaalofa mai le PID


O le tama o David Troy Tausagafou Hines Pa'aga ma ona matua o Tiaina Maluafou ma Franklin Leti Pa'aga o Nuuuli. [ata: Leua Aiono Frost]

E tolu pepe fou o le tausaga fou ma ua fa'afiafiaina o latou matua ina ua avea i latou nei ma fa'amau fa'ailoga i o latou aiga, na soifua a'e i le ulua'i aso o le tausaga 2018.

 

"O se fiafiaga ia i ma'ua ua vave mai le ali'i o David Troy Tausagafou Hines Pa'aga i lenei olaga ma ua mafuta ma i ma'ua ma le to'afa o ona uso matutua. O lea sa matou tatalia o ia ia Fepuari 2018 ae peita'i, ua manatu o ia e asiasi vave mai, ma ua agava'a ai mo lenei ata i le nusipepa ae maise o le tala tusia i lona ola mai i le ulua'i aso o le tausaga. E le gata i lea o se fa'ate'iga o i matou i se meaalofa tele ua taua'aoina mai e le Pacific Independent Distributors. Fa'afetai lava!"

 

O se tala lea a lona tama Franklin Leti Pa'aga, o se tasi e faigaluega o le Governor Protecting Detail mo le Matagaluega o le Puipuiga o le Sagaolemu Lautele a le tatou malo po'o le Matagaluega o Leoleo.

 

O David o le lona lima lea o aloalii e fa'asino i le mafutaga a le tina o Tiaina Maluafou ma Franklin Leti Pa'aga, ma o i la'ua fo'i sa a'o'oga i le Bethal Bible Training a le susuga le Fa'afeagaiga Pr. Vaeao lea fo'i na tu'ua le atunu'u mo sana malaga i fafo ae ua mae'a fa'amanuia i le taunu'u mai o lea fo'i sui sili ona la'ititi i lana ekalesia Full Gosbel Peteli i Tafuna.

 

Mo le tausiga o si o la'ua aiga, e na'o le tama lava lea e faigaluega, peita'i e nofo lava le tina e tausia si fanau, peita'i ua mae'a faia le filifiliga a i la'ua, o le a alo le tina e fa'amae'a lona fa'ailoga na tausailia fa'atasi ma le tama i totonu o le a'oga fa'afaife'au, ona alo ane lea e saili se galuega e fesoasoani fo'i i le tausiga o le la'ua fatuaiga tausi.

 

I lona fanau mai e 6 pouna-7 aunese le mamafa o le tama o David, sa manatu fo'i foma'i e tauau o lo'o soifua mai o ia i le na'o le 8 masina, peita'i e leai ma se fa'aletonu o matauina ia pepe, ma ua mamafa fo'i o ia.

 

Ina ua to'ai taunu'u sui mamalu o le Kamupani a le Pacific Independent Distributors (PID) ma le meaalofa tele mo David, na avea ai le tama'ita'i o Tulili e fai ma sui o le latou vaega e taua'aoina le meaalofa fa'apitoa, "Ia o le lona lua ai lea o tausaga talu ona a'e se tofa a le Kamupani ia faimeaalofa i pepe uma lava e soifua mai i le tausaga fou ta'itasi. O lona uiga o le 2018 lea ua fa'alua i ai ona faia lenei foa'i, ae o oloa fo'i o aofia i lenei foa'i taua, o oloa uma o lo'o fa'atauina atu e le PID i so'o se faleoloa i totonu o le teritori. O oloa fo'i e fa'aaogaina i le tausiga o pepe ma isi fo'i fanau mo le aiga. O se meaalofa ua foa'ia mai e le fa'auluuluga o lenei Kamupani lana pulega fa'apea ma le aufaigaluega, e fa'amama avega ai i le tausiga o pepe David Troy."

 

Na auai fo'i ma si tama'ita'i talavou o Flo ma nisi o taulele'a o le aufaigaluega malolosi a le PID ina ia la'uina atu i totonu meaalofa mo Pepe fou o lo'o tausia pea i totonu o lea Ward a le falemai ma latou tina.

 

Na soifua mai le ali'i o David i le itula e 6:00 i le taeao po o le aso Gafua, Ianuari 01, 2018.

 

O Pepe numera lua na soifua a'e ia Ianuari 01, 2018 o le ali'i malosi ma le mamafa lea o Mathew Fa'alae Jr. Williams mai Mapusaga Fou. O ia lea sa soifua a'e i lona tina o Lina Williams ma o le ulua'i pepe lea a Lina.

 

"O si a'u tama o la'u meaalofa lava lea o le tausaga fou, e ui ina ou tigaina i lona taunu'u mai, ae ua ou fiafia ua ou si'isi'i i si a'u tama,” o le tala lea a Lina e tusa o si ana tama o Mathew Fa'alae Jr.

 

E le'o na'o Lina ua fa'afiafiaina, ae ua silisili ona mitamita ma fa'afetai le tina matua o Sue Williams ma lona uso o Val, lea ua le mafai ona tu'ua i lalo le ali'i o Mathew ae ua fa'asoloatoa ona si'isi'i ia te ia.

 

O lo'o auai le tina o Lina Williams i le Ekalesia a Iesu o le Au Pa'ia o Aso e Gata Ai i Mapusaga Fou lava. O le mamafa o le ali'i o Mathew e 8lbs 10oz. Na to'ai taunu'u mai lana malaga i lenei olaga i le itula e 8:00 i le taeao o Ianuari 01, 2018. E mautinoa lava e auai o ia i le Ekalesia Mamona lea fo'i e auai ai lona tina.

 

O le Pepe lona tolu ua fa'ailoa mai o Baby Mauga. Ma e le’i mautu mai fa’amaumauga mai le tina o Baby Mauga i le taimi o lenei lomiga a le Samoa News. O lo'o ua faao'o atu i ai le meaalofa mo pepe, o le ato o lo'o aofia ai diapers ma pepa solo mai le PID.

Comment Here