Gaoi apa susu e 56 e fafaga ai lana pepe


[ata: SN]
ausage@samoanews.com

O le Tina e 42 tausaga le matua lea na tu’uaia i lona ave fa’agaoi o apa susu e 56 mai totonu o se faleoloa Asia, e le gata ua ia ta’utino e fa’amaonia tu’uaiga fa’asaga ia te ia, ae sa ia taua fo’i, sa ia fa’aaoga apa susu ia e fafaga ai lana pepe.

 

Na ulua’i tu’uaia e le malo ia Oketi Polevia i le moliaga mamafa o le gaoi, o se solitulafono e mafai ona fa’asala ai se tasi i le toese mo le umi e le silia i le 7 tausaga, pe fa’asala foi i le salatupe e le silia i le $5,000.

 

Ae i lalo o se maliliega na sainia e le ua molia ma le malo, lea fo’i ua talia e le Fa’amasinoga Maualuga, ua malie ai le itu a le malo latou te toe faia se teuteuga i le ulua’i moliaga sa latou faila fa’asaga ia Polevia, ina ia suia ai mai le moliaga mamafa o le gaoi, ae tali ioe o ia i le moliaga mama o le gaoi.

 

O le moliaga mama o le gaoi, e mafai ona fa’asala ai se tasi i le toese mo le umi e le silia i le tausaga, pe fa’asala foi i le salatupe e le silia i le $1,000 poo le fa’asala fo’i i fa’asalaga uma ia e lua.

 

I le tali ioe ai o Polevia i le moliaga e pei ona ta’usala ai o ia e le Fa’amasinoga Maualuga, sa ia ta’utino ai e fa’apea, i le va o le aso 22 Aokuso e oo atu i le aso 15 Setema 2017 i Amerika Samoa, sa ia gaoia ai ni apa susu se 56 o le ituaiga o le Similac mai se faleoloa i Iliili, e tusa lona tau aofa’i ma le $1,232.

 

Na fesili le afioga i le ali’i fa’amasino sili ia Michael Kruse ia Polevia poo a mea sa fa’aaoga ai apa susu e 56 na ia gaoia, ae na tali le ua molia, sa fa’aaoga e fafaga ai lana pepe.

 

Ua talosaga loia a itu e lua ina ia faasala le ua molia i se fa’asalaga faanofovaavaaia, e aofia ai lona toe totogiina o le tau atoa o apa susu na ia gaoia. Na faamaonia e Polevia i luma o le Fa’amasinoga, ua uma ona ia totogiina le $300 i le pule o le faleoloa na a’afia, mo se vaega o le tau o apa susu na ia gaoia.

 

Talu mai le aso 22 Oketopa na taofia mai ai Polevia e Leoleo, e le i toe tatalaina lava o ia i tua ina ua le mafai ona ia totogi le tupe e $5,000 na fa’atulaga e tatala ai o ia i tua.

 

O le mae’a ai o lana iloiloga i le vaiaso nei, na faia ai loa e le Fa’amasino Sili le poloaiga, e tatala ai o ia i tua e aunoa ma se tupe e totogi, e fa’atali ai le aso Faraile o le vaiaso fou lea ua fa’atulagae lau ai lana fa’asalaga.

 

O tuutuuga faapitoa e 2 ua tatala ai o ia i tua, e le gata ua fa’asa ona toe alu i le faleoloa Asia lea na tula’i mai ai le fa’alavelave, ae ua fa’asa fo’i ona ia toe alu ma ni ato fa’atau tetele i totonu o soo se faleoloa pe a alu e fa’atau, se’i vagana ai lava lana ato tupe.

 

E pei ona taua i fa’amaumauga a le fa’amasinoga, o le mataupu fa’asaga ia Polevia na alia’e mai ina ua maua e le pule o le faleoloa i le masini pu’eata gaioiga fa’asolitulafono sa faia e le ua molia i le tele o taimi e alu atu ai e fa’atau, i lona tuu lea o se apa susu i totonu o se ato tele e alu atu ma ia ma le fa’amoemoe ia le mafai ona iloa e le pule o le faleoloa.

Comment Here