Pasia e le Fono mataupu a le Kovana mo lana Fono Faapitoa

ausage@samoanews.com

O le taeao nei lea ua faamoemoe e mae’a aloaia ai galuega a le Fono mo le Fono Faapitoa lona lua sa valaauina e le afioga i le ali’i Kovana mo le umi e 10 aso, ina ua pasia e maota e lua mataupu e 2 sa fa’atulaga e Lolo Matalasi Moliga mo lana Fono Fa’apitoa.

 

O ia mataupu e aofia ai le suiga i le Tulafono sa fa’avae ai le Faletupe a le malo, le Territorial Bank of American Samoa, atoa ai ma le faamaonia o le afioga i le alii Senatoa ia Paepae Iosefa Faiai e avea ma Fa’amasino Lagolago o le Fa’amasinoga Maualuga a le atunu’u.

 

O le taeao ananafi na pasia ai e le maota maualuga i le faitauga fa’atolu le pili a le maota o sui, mo le suiga o le tulafono sa fa’avae ai le Faletupe a le malo. O le vaiaso na te’a nei na fa’amaonia ai e le Senate tofiga a le Kovana mo Paepae e avea ai o ia ma Faamasino Lagolago, i le mae’a ai lea o se iloiloga sa valaauina e fesiligia ai agava’a o le afioga i le ali’i Senatoa o lenei tofiga.

 

I le taimi o le iloiloga, e le gata sa fa’aalia ai lagona fiafia ona o le avanoa ua maua e Paepae e tautua ai i le isi vaega o le Faigamalo, ae sa faapea fo’i ona fa’aalia ai lagona fa’anoanoa o afioga i Senatoa, i le misia ai lea o le ali’i Senatoa mai galuega masani a le maota.

 

Mo le maota o sui, o le taeao ananafi na tapunia aloaia ai a latou galuega mo le Fono Fa’apitoa, i le mae’a ai lea ona latou pasia o le suiga i le tulafono sa fa’atula’i ai le Faletupe a le malo, lea na pasia e le Senate i le faitauga fa’atolu i le taeao ananafi.

 

O le mae’a ai o galuega fa’atino a le maota o sui i le taeao ananafi, na aga’i atu ai loa afioga i Faipule mo le asiasiga a le Komiti o le Puipuiga o le Saogalemu Lautele i le toese i Tafuna, i lalo o le ta’ita’iga a le afioga i le ali’i Faipule ia Manumaua Wayne Wilson.

 

O lea asiasiga na fa’avae mai lea i se fautauga sa fa’atula’i e le afioga a Manumaua, ona o tulaga fa’aletonu e pei ona alia’e mai ai le tele o fa’asea mai le atunu’u, fa’asaga i le tulaga o lo o i ai le falepuipui i le taimi nei.

 

O le 2 vaiaso talu ai na lomia ai e le Samoa News se ripoti e faatatau i fa’asea mai ni isi o aiga o lo o taofia a latou tagata i le falepuipui, i le le lelei lea o le tausiaina o i latou i totonu o le toese, i le tulaga o meaai aemaise ai o mea e momoe ma nonofo ai i latou.

 

Na taua e ni isi o aiga o pagota i le Samoa News e fa’apea, o ni isi o vaiaso e ta’i fa’alua ona latou sapalai taumafa mo tagata o latou aiga o lo o taofia i le falepuipui, ona e talosaga mai i latou mo ni meaai, e mafua mai i le le lava o meaai mo pagota.

 

E le i maua mai lava se fa’amatalaga mai le Komesina o Leoleo e uiga i lenei mataupu, i le taumafai lea e fa’amanino pe fa’amaonia tulaga e pei ona aga’i i ai fa’asea a ni isi o le atunu’u.

 

Na taua e ni molimau i le Samoa News e aofia ai Leoleo o le toese, tulaga fa’aletonu i meaai a pagota, e aofia ai le leai o ni sapalai i ni isi o masina.

Comment Here