Pasia Faipule le Pili e suia ai lafoga maualalo mo pisinisi i le atunu’u

ausage@samoanews.com

E 14-3 le palota na pasia ai e afioga i Faipule o le maota o sui i le aso Faraile na te’a nei, le pili e suia ai lafoga maualalo e 1% mo pisinisi i Amerika Samoa, fa’atasi ai ma suiga.

 

O Faipule na palota tete’e i lenei tulafono e aofia ai le afioga a Toeaina Faufano Autele; afioga Vui Florence Saulo, ma le afioga Timusa Tini Lam Yuen.

 

O suiga e 2 a le maota o sui i le tulafono taufaaofi lenei sa talosagaina e le faigamalo, e le gata ua fa’atulaga ai le 50% o tupe e maua mai i lenei lafoga mo le falema’i o le LBJ, ae ua aofia ai fo’i ma le vaega e fa’aleaoga ai loa le lafoga o totogi e 2% sa totogi e tagata faigaluega i totonu o le atunu’u mo le tele o tausaga ua mavae.

 

O suiga e pei ona pasia e le maota o sui, ua fa’aopoopo i ai i totonu o le tulafono fa’aupuga e faa’pea, “O le 25% o le tupe e maua mai i lenei lafoga o le a tuuina atu mo le falema’i o le LBJ, e fesoasoani ai i le polokalame e auina atu ai gasegase i fafo mo togafitiga; ae o le isi 25% o le tupe e ao mai, o le a tuuina atu fo’i i le falema’i e fesoasoani ai i lana auaunaga. O lea vaega tupe e tatau ona teuina i totonu o se teugatupe faapitoa mo le Pulega a le Falema’i, ia le silia le aso 5 o masina ta’ita’i.”

 

E pei ona taua e le faigamalo i le fa’atomuaga o lenei tulafono, ua matua to’atele naua pisinisi i le atunu’u ua ‘alo mai le totogiina o a latou lafoga fa’atulaga e tatau mo pisinisi, fuafua lea i tupe maua a le pisinisi i le tausaga.

 

O lenei tulafono, o le a mafai ai ona talafeagai lafoga e totogi e pisinisi uma, fuafua i le tulaga o lona tamaoaiga sa maua i le tausaga.

 

O le a fa’aagafua i le tulafono lenei pisinisi uma fa’atoa amata i le tausaga tonu na amata fa’amaluluina ai lenei tulafono.

 

E le o aofia ai i lenei lafoga faalapotopotoga e le o galulue mo se tupe fa’asili, ae o lo o galulue lava i latou mo a latou auaunaga masani.

 

E ui i le tete’e o ni isi o le aufai pisinisi i lenei lafoga, ona o le a a’afia atu ai fua ma pisinisi o lo o fa’amaoni pea i le totogiina o le latou lafoga i le malo i tausaga ta’itasi, a o lea lava ua finagalo afioga i Faipule e pasia lenei tulafono, ina ia fesoasoani ai i tupe maua a le faigamalo.

 

O afioga i Faipule na palota ioe i lenei tulafono e aofia ai Fetui Fetu Jr; Vesi Talalelei Fautanu Jr; Lavea Fatulegae’e P. Mauga; Kitara Vaiau; Vailoata E. Amituana’i; Vailiuama S. Leasiolagi; Vaetasi Tuumolimoli S. Moliga; Faimealelei Anthony F. Allen; Manumaua W. Wilson; Sataua Dr. Mataese Samuelu; Samuel I. Meleisea; Gafatasi Afalava ma le afioga i le Fofoga Fetalai ia Savali Talavou Ale.

Comment Here