Ads by Google Ads by Google

Tala I Vaifanua


Fa'ailoga na taua'aoina fa'apitoa mo le tautua a Tama'ita'i Ituaiga Sa o le Sisters of Nazareth i le amataga o le Hope House. L-R Ta'afano Joe Tavale, Taitaifono Komiti Faafoe Hope House, Pule o le Hope House Beatrice Block, Sister Sheila ma Epikopo Peter Brown Fa'auluuluga o le Pule'aga Samoa Pago Pago. [ata: Leua Aiono Frost]

Peresetene o le GHCReid & Co., ma le Lealaifuaneva Peter Reid Sr Foundation, Olivia Reids Gillet, mo le tautua i le Hope House. [ata: Leua Aiono Frost]

Kalapu a le BAOA, Kolisi Tuufaatasi a Amerika Samoa. [ata: Leua Aiono Frost]

‘AIGA FA’AFETAI HOPE HOUSE I PA’AGA

 

O le ‘aiga fiafia o le fa'afetai sa tapena e afioga Epikopo Peter Brown o le Pule'aga Samoa Pago Pago, ma le Komiti Fa'afoe a le Hope House, ma le Aufaigaluega, sa fa'afiafiaina ai latou pa'aga sa foa'i ma le agaga fa'afetai mo le fa'aauauga o le tatua a le Hope House mo le 30 tausaga.

 

Sa vala'aulia le to'atele i sui  o le malo, Kamupani, Pisinisi, ma Fa'alapotopotoga, i lea fa’atasiga i le afiafi o le aso Tofi ua te’a i Fatuoaiga

 

"O le po lenei, ua tapena ina ia mafai ona matou fa'ao'o atu le agaga o le fa'afetai, fa'afetai tele. Aua o lo outou a'ao foa'i mo tausaga e tele, ua le motusia ai lenei auaunaga aoga mo Matua Matutua ua mana'omia ona tausia fa'apitoa, le vasega o gasegase ua i ai afaina tumau o le tino ma le mafaufau, ae maise o i latou e ao ina tausia fa'apitoa. Ana leai lo outou foa'i mai, e le mafaia ona fa'ataunu'u lea galuega mo'omia e i latou. Fa'afetai tele le agaalofa ma ua foa'i ai ma le loto,” o se tautalaga lea a Epikopo Peter Brown.

 

I lea afiafi, e fa fa'ailoga na tapena, e Epikopo Peter Brown, ma le ta'ita'ifono o le Komiti Fa'afoe o le Hope House Ta'afano Tavale, e taualoa ai nisi ua loa sa latou tautua mo le Hope House, e pei o le Sisters of Nazareth lea sa suia e le tamaita'i sa muaimalae i le fa'atuina o le Hope House, Sister Sheila mai Peretania.

 

O le fa'ailoga mo le malo Amerika Samoa sa tuuina atu i le Fa'atonusili o Tautua ma Alamanuia mo Tagata Lautele Taeaoafua Dr Meki Solomona. O le isi fa’ailoga mo le  Lealaifuaneva Peter Reid Sr. Foundation ma Pisinisi a le GHC Reids i Amerika Samoa, sa talia e le Peresetene o GHC Reid, Olivia Reids Gillet.

 

O le fa’ailoga mulimuli i le Bank of Hawaii lea e silia i le $25,000 i tausaga ta'itasi le foai i le Hope House.

 

E le gata i nei fa'ailoga na tapena e le Hope House, ua latou va'ai fo'i i le tele o tautua sa mafai ona fa'atinoa le tausiga o gasegase ma tagata matutua i le nofoaga. O i latou o lo'o faigaluega pea i lenei nofoaga mai le amataga ona fa'atu mai se'ia o'o mai i lenei tausaga ua latou taualoaina fo'i.

 

Na saunia tusi e taualoa ai le tautua a Efrenia Ursolino LPN mo le 30 tasuaga o faigaluega pea i le Hope House. O Fane Ofa LPN ua atoa le 25 tausaga o lana tautua.  O Susitina Maiava ua atoa le 18 tausaga o lana tautua. O Ema Leautuli ua 17 tausaga o le tautua, Leti Va'a ua 15 tausaga o le tautua. Fealoai Telovae ua atoa le 12 tausaga o le tautua ma Ana Foseta ua atoa le 10 tausaga o lana tautua i le Hope House.

 

Peita'i, e to'alua isi sui na taualoa la'ua tautua peita'i o le alii e fa'amoemoe tele i ai le Hope House ma lona pulega i tulaga o galuega fa'atino tau le toe fa'aleleia o le nofoaga: Ioane Jennings, o le supavaisa o le vaega a le Maintenance e 15 tausaga o lana tautua ma Fa'atau Kome ua atoa le 10 tausaga o lana tautua.

 

"E pau le mea e mautinoa ai le toe ausia o le isi 10 i le 20 pe tolusefulu o tausaga o lenei tautua, o le tatou galulue fa'atasi pea, i le agaga o le foa'i ma le tausoa fa'atasi o le tausiga o tatou matua matutua ua tausia fa'apitoa, le vaega o le fanau ua po'ia i gasegase tumau ona ua le atoatoa le malosi o le tino ma le mafaufau,” o se i'umaea lea o le saunoaga a Epikopo Peter Brown.

 

VASEGA MATAUPU FA’APISINISI ASCC

 

Na fa'atasia fanau a'oga o lo ua tau'avea Mataupu Fa'apisinisi i le Kolisi Tu'ufa'atasi i le aso Faraile i le latou potu a'oga ma sa fa'afofogaina fo'i e i latou tima'iga ina ia latou fa'autagia mo le tausaga a'oga atoa lenei o le a savalia.

 

E afua mai i fautuaga tau la'ei ma foliga mai o le tagata faipisinisi, sa matua fa'amamafa fo'i i ai le tautalaga a le tama'ita'i e fa'auluulu i ai le Vaega o A'oa'oga Fa'apisinisi a le Kolisi, Dr Faofua Va'apu'u Fa'atoafe.

 

"E ao i le faipisinisi ona la'ei e tusa o le tofi Faipisinisi. Laei mama ma fa'aatagia ai se pisinisi mama ma le solgoa lelei, e lauolaola ma e i ai tomai fa'apitoa e ono mau fa'atuatuaina e tagata ana oloa gaosi, po'o oloa fa'atau atu. E ao ina matua mama lona lauao ma e ia foliga mama i taimi uma ina ia le upuia lau tautua lautele i so'o se vapanoa o le va'aiga lautele fa'aletagata soifua."

 

"Pe afai ua ia te oe le fa'anaunauta'iga e te fia avea ma tagata faipisinisi iloga o le tatou atunu'u, e te la'ei ma e savali ma foliga mai o le tagata faipisinisi taualoa i lou malo,” o a Dr. Fa'atoafe lea.

 

Na fa'amanino atili, "Ua outou iloa, matou te iloa lelei pe afai ae kopi e oe meaaoga ma tali o fesili mai le isi tamatiti o lau vasega, afai e toe tupu lena mea, e matua saili po'o ai na kopi, ae solofua lona togi, se'iloga lava e te toe taumafai lava oe e faia lau galuega e togia ai oe i au mataupu.”

 

Ua fa'asa fo'i ona toe maua atu se tasi i nofonofo ma talanoa ma talie, ae le faia galuega e fa'aaogaina ai masini komipiuta i totonu o le potu a'oga mo nei masini. "E le maimau le 'auro i uli! O aga na a le tagata e le o i ai sana taunu'uga ua mae'a fa'atulaga, o le fa'amaumau taimi lelei. Ia iloa lelei, e maua lava e oe le fua sa e luluina, e maua togi maualuluga e i latou e mana'o ia mae'a lelei taumafaiga ma i'u lalei e taumafai se pisinisi ma lona aiga e fa'atautaia ia aoga i ai lana a'oa'oga  na tausuai ai."

 

Ua faatulaga le Uokafoni ia Oketopa 14 a le  Asosi a le BAOA e fa'atupe ai polokalame i le lumanai.

 

Ua taua'aoina fo'i kopi tusitusia a le fanau, ua lisia ai aiaiga o togi o le a fa'aaogaina e faia'oga e maka aga'i i ai galuega fa'atino i lenei tausaga a'oga. "O le iloa fo'i e outou o ala e maka ai outou galuega, o le tou taumafai atili lea ina ia outou tausaili i ala e maua ai togi lelei mo outou e fa'au'u ai a outou kosi fa'apisinisi iinei. Manatua e le pasi se tasi o le Mataupu lenei ma se C- aua  o le togi lena ua D lava i le lipoti. E le aoga lea ia te outou pe afai e toe soso'o a outou aoga i Iunivesite i fafo atu o Amerika Samoa,” o le toe tautalaga lea a Dr Fa'atoafe.