Ads by Google Ads by Google

Teena Faipule suiga a le Senate i le pili o le paketi a le malo


Afioga i Faipule i le taimi o felafolafoaiga e teena ai suiga a le Senate i le latou pili o le paketi a le malo. [ata AF]
ausage@samoanews.com

O le itula e 8:30 i le taeao nei lea ua fa’atulaga e nofoia ai Komiti Teuteu a maota e lua a le Fono Faitulafono, mo le talanoaina o suiga a le Senate e fa’atatau i le pili o le paketi a le maota o sui, lea na teena e afioga i Faipule taeao ananafi.

 

O suiga a le Senate ua mae’a ona latou pasia i le faitauga fa’atolu o le tulafono tau fa’aofi a le maota o sui, o le fa’aopoopo lea o le $500,000 i le paketi a le Fono Faitulafono na tuuina atu e le faigamalo i le aofaiga e $6,916,500, ina ia atoa ai le aofaiga sa’o e tatau ona i ai e $7,416,500.

 

O le $500,000 e pei ona pasia e le Senate, o le a aveese mai i vaega e 3 o le Polokalame Fa’apitoa a le Kovana.

 

Ua manatu le Senate e aveese mai le $200,000 mai le $1 miliona lea o lo o fa’atulaga e fa’aleleia ai auala; $200,000 e aveese mai i le $900,000 lea ua fuafua e amata ai le galuega mo le fausiaina o le Fale Taalo mo Tupulaga i le Falelima i Sisifo; ma le $100,000 e aveese mai i le $200,000 lea ua fa’atulaga mo le Ofisa o Leoleo e fesoasoani ai i le fa’amalosia o tulafono.

 

O le aso Gafua na te’a nei na pasia ai e le maota maualuga i le faitauina fa’atolu le pili o le paketi a le maota o sui fa’atasi ai ma suiga. Na auina atu e le Failautusi a le Senate se fa’aaliga i le Failautusi o le maota o sui, e fa’ailoa atu ai le pili o le paketi a le maota o sui ua pasia e le Senate fa’atasi ma suiga.

 

I le taimi o folafolaga a le maota o sui ananafi, na tula’i ai le afioga i le ali’i Faipule ia Vailiuama Steve Leasiolagi ma fa’atula’i le mau ina ia teena e le maota o sui suiga a le Senate i le latou pili o le paketi, lea fo’i na fulisia uma i ai le maota.

 

Na taofia le tauaofiaga a le maota o sui mo sina taimi, ae fetufaa’i afioga i Faipule e fa’atatau i suiga a le maota maualuga i le latou pili o le paketi.

 

I le taimi o le fetufaaiga a afioga i Faipule, na fa’amanino auiliili ai e Vailiuama vaega eseese o le Polokalame Faapitoa a le Kovana ua finagalo le Senate e maua mai ai le $500,000 e fa’aopoopo i le paketi a le Fono.

 

Na faamanino atili fo’i e le afioga a Vailiuama i afioga i Faipule e fa’apea, e $700,000 le vaega o le paketi a le Fono o lo o i totonu o le Paketi Faaopoopo (supplemental budget) a le faigamalo mo le tausaga tupe fou 2018, lea e le i iloiloina e le Fono i le taimi nei, ae foliga mai ua finagalo afioga i Senatoa e aveese mai na o le $500,000 mai lalo o le Polokalame Faapitoa, e fa’aopoopo i le paketi a le Fono.

 

Na taua e le afioga a Gafatasi Afalava lona le lagolagoina o suiga a le Senate, ona o lea ua fa’aitiitia ai tupe ua faatulaga e le Kovana mo isi galuega aoga. Mo se fa’ata’ita’iga o auala, saunoa Gafatasi e fa’apea, e le taitai lava le $1 miliona o lo o fa’atulaga e fa’aleleia ai auala.

 

Na lagolagoina e Faimealelei Anthony Fu’e Allen le finagalo o Gafatasi. Saunoa Faimealelei e fa’apea, e taua tele le Fale Taalo lea ua fuafua le faigamalo e fausia mo tupulaga talavou i le Falelima i Sisifo, o se auala lea e maua ai e tupulaga talavou le avanoa e mafuta fa’atasi ai, ma taofia mai ai i latou mai aafiaga o fualaau fa’asaina lea ua sasao fa’aafi i le taimi nei.

 

Saunoa Toeaina Faufano Autele e fa’apea, na te le lagolagoina le toe fa’aopoopo o lenei $500,000 i le paketi a le Fono. I lona taofi, afai ae faaopoopo lenei vaega tupe tele, o le a maua ai fo’i le avanoa e fa’a faigaluega ai isi tagata faigaluega e to’atele i le Fono, ma atili ai le o atu ma nofonofo solo i tafatafa o maota fono e leai ma ni galuega e faia.

 

I le faaiuga o felafolafoaiga a le maota o sui, na pasia ai loa le mau ina ia Komiti Aoao le talanoaga a le Komiti Teuteu lea ua fa’amoemoe e fa’atulaga i le taeao nei, i luma o le maota fono a le Senate.