Tala otooto mai le Fono Faitulafono

ausage@samoanews.com

FESILIGIA POO FEA E TOTOGI AGA’I I AI LE SALA A LE STARKIST

 

O le salatupe e silia i le $6 miliona lea ua malie le kamupani a le StarKist na te totogiina atu i le Matagaluega o le Siosiomaga a le malo tele, e mafua mai i lona le usitaia o tulafono e fa’atatau i le puipuiga o le si’osi’omaga, na mafua ai ona tula’i le afioga i le ali’i Senatoa ia Tuaolo M. Fruean i le vaiaso na te’a nei na fesiligia le Peresetene o le Senate, pe maua ai se vaega tupe a Amerika Samoa i lenei tupe tele ua fuafua le kamupani i’a e totogi.

 

Saunoa Tuaolo i le taimi o folafolaga a le Senate e fa’apea, afai e le o maua ai se vaega tupe a Amerika Samoa i lenei tupe tele ua sauni le kamupani i’a e totogi, lona uiga e matua leai lava se uiga o lenei mataupu.

 

“E fa’afefea ona tupu lenei ituaiga fa’aiuga, e fa’aotaota le StarKist i Amerika Samoa ae alu uma le tupe i Amerika. Afai e le o maua se tupe a le tatou malo i lenei vaega tupe tele, e tatau la ona fesiligia la tatou Sui Aoao i Uosigitone e silasila toto’a i lenei mataupu. E mana’omia e lo tatou malo tupe nei,” o le saunoaga lea a Tuaolo.

 

Sa ia taua atili lona fa’afetaia o le afioga i le ali’i kovana ia Lolo Matalasi Moliga, ona o le mataupu na tuuina atu i le fa’amasinoga i Amerika e fesiligia ai le Feagaiga na osia e Amerika ma Amerika Samoa i tausaga ua mavae.

 

Na taua e Tuaolo le tele o va’a na pa’ulia solo i luga o ‘aau i vaega eseese o le atunu’u, ae leai ma se tupe a le malo na maua mai ai.

 

“O le mea lea e vaavaai atu i ai, na ona avatu lava o tupe nei ma tufatufa e vaega eseese a le feterale e pei o le NOAA ma le US Coast Guard, ae leai ma se tupe a Tutuila ma Manu’a e maua mai ai. Pau lava le tulaga lea e vaavaai atu i ai, na o le o mai e fa’aotaota i o tatou ogasami ae a maua tupe ona totogi uma lea i le feterale,” o le isi lea saunoaga a Tuaolo.

 

Na fa’afetaia e le peresetene o le Senate, afioga i le Tama’ita’i o le Ao ia Gaoteote Tofau Palaie le finagalo fa’aalia o Tuaolo, ona o le tulaga tonu lea o lo o maitauina i le tele o tausaga, e tutupu fa’aletonu i Amerika Samoa ae ave uma i Amerika fa’amanuiga tau tupe e maua mai ai.

 

Ua sauni le Peresetene mo le sailiina o se tali o lenei mataupu, ona toe fofogaina ai lea o afioga i Senatoa i le vaiaso nei.

 

AISEA UA LE MAFAI AI ONA TOE FA’ALELEIA VA’A TOSO VA’A I AS?

 

O le fesili pe aisea na le mafai ai ona toe fa’aleleia i Amerika Samoa va’a toso va’a e 2 a le malo, lea ua fa’atau atu e le Pulega o Kamupaniva’a a le malo o Samoa, o le autu lena o le iloiloga a le Senate lea ua fa’atulaga mo le itula e 8:30 i le taeao nei.

 

O le Fa’atonusili o le Pulega o Uafu ma Malaeva’alele ia Taimalelagi Dr. Claire Poumele, Pulesili o le Ofisa o le Vaega Tosova’a, atoa ai ma le sui o le US Coast Guard, o molimau ia o le a fesiligia e le Komiti o Pulega o Uafu ma Malaeva’alele a le Senate, lea o lo o ta’ita’ifono ai le afioga i le ali’i Senatoa ia Paepae Iosefa Faiai.

 

Na taua e le afioga a Paepae i le vaiaso na te’a nei e fa’apea, e le iloa pe aisea ua le mafai ai ona lipea ma toe fa’aleleia va’a toso va’a e lua a le malo lea na fa’atau i Samoa, ae foliga mai o lea ua toe ola va’a ma ua fa’aaoga fo’i e le malo o Samoa i le taimi nei.

 

E le o se taimi muamua lea ua fesiligia ai e le Fono lenei mataupu. Na ulua’i fesiligia e le afioga a Toeaina Faufano Autele i le masina na te’a nei, lea fo’i na toe fesiligia e le afioga i le ali’i Senatoa ia Fa’amausili Mau Jr i le taimi na iloilo ai le paketi a le Ofisa o Pulega o Uafu ma Taulaga.

 

Na taua e le afioga a Toeaina lona fa’anoanoa tele, i le tele o tupe a le malo na alu e fa’atau mai ai va’a toso va’a atoa ai ma Lagisi e 2 na aumai i le taimi o le nofoaiga a Togiola ma Faoa, ao lea ua toe fa’atau ese atu i se tau maualalo.

 

Ona o lea tulaga fa’aletonu, sa ia talosagaina ai loa le tatau lea ona Fa’avae le Komiti Su’esu’e a le Senate (SIC), ina ia mafai ai ona fa’atulaga se su’esu’ega e fesiligia ai le mafua’aga ua fa’atau tia’i ai fa’apea meatotino a le malo.

 

Ae na taua e le afioga i le ali’i Senatoa ia Fa’amausili e fa’apea, e ofo lona loto i le le mafai ona lipea iinei va’a toso va’a ma lagisi, a o lea sa ia molimauina i sana malaga i Samoa le ola uma o va’a ma ua fa’aaoga fo’i e le malo o Samoa.

 

E ripoti na tuuina mai i le Samoa News, o va’a toso va’a e lua o le Tatoso ma le Tautua, fa’apea ai ma Lagisi e 2 e pei ona fesiligia, na fa’atau uma e le Ofisa o Va’a a le malo o Samoa i le taimi o le fa’atautu’i a le malo ia Iulai o le tausaga nei.

 

E silia i le ta’i $1,000 na fa’atau ai va’a toso va’a ae tusa ma le $10,000 le tau na fa’atau ai Lagisi e 2.

Comment Here