Ads by Google Ads by Google

Tala I Vaifanua

FOA’I BLUESKY $2,000 I LE HOPE HOUSE I FATUOAIGA

 

O le aso Faraile na te'a na matua o'o atu ai le Pulega a le kamupani a le Bluesky Communications ina ia molioo atu le latou foa'i tupe e $2,000 ina ia fesoasoani i le Hope House, nofoaga o lo'o tausia ai matua matutua, ae maise o i latou ua tausia fa'apitoa ona o gasegase tumau o le tino ma le mafaufau.

 

Ona o lenei ua savalia le vaiaso na fa'atulaga e fa'amanatuina ai le atoaga o le 30 tausaga o le Hope House, o le isi fo'i lea ala o le foa'i a lenei Kamupani, aua o lo ua fa'atatuaia fo'i sailiga tupe i lenei vaiaso e ala i Ta'amilosaga Tapolo e faia i le fa'aiuga o le vaiaso o lumanai, ina ia fa'amautu ai le seleni e fa'atupe ai le tautua a lea nofoaga mo e o tausia fa'apitoa ai.

 

O le susuga Larry Sanitoa sa lauga fa'afeiloa'ia le paega o itu na lua o le feiloa'iga. Sa fa'atasi atu fo'i le afioga le Epikopo Peter Brown mo le taliaina o le foa'i ma le fa'afetai tele.

 

Na masi'i mai le Fa'atonu Sili o le Blue Sky i lona lala i Amerika Samoa, Raj Deo, le susuga fo'i Joseph Tuiteleleapaga o le fa'atonu o Tupe, le tamaita'i le Pule o Fefa'ataua'iga Marilyn Pua, le Fa'atonu o Tagata Fagaluega o Liza Gebauer, ali'i Inisinia Mohan Rajimohan, Stuart Fong ma James Aulava, ae maise tama'ita'o o Josephine Ieremia ma Sherry Sele. O i latou na sa latou maimoaina le nofoaga atoa ina ua mae'a le foa'i taua.

 

I le saunoaga fa'afetai a Epikopo Peter Brown sa ia maua'i fa'ailoa ai le agaga o le fa'afetai mai ia i latou uma i le fa'auluuluga o le Ekalesia se'ia o'o mai i le Komiti Fa'afoe o le Maota o Fa'amoemoega, le Pulega ma le Aufaigaluega fa'atasi ai ma gasegase uma o tausia fa'apitoa ai, ona o le agaga alofa ua tula'i ma foa'i mo le fa'amoemoe, ia fa'aauau lenei tautua le fa'atuaoia.

 

"O le ala lenei ua mafai ai ona fa'atupe lenei nofoaga, o foa'i lava ma le agaga fesoasoani mai. O le uiga tonu lea o le fa'aupuga Iupeli, o le foa'i ma le agaga atoa ona o le alofa."

 

O le susuga Ta'afano Joe Tavale sa tula'i e fa'ailoa fo'i le agaga fa'afetai o le Komiti Fa'afoe o tutula'i nei, aua e le tasi ae ua lasi taimi ua foa'i atu ai fo'i le Bluesky i le Hope House.

 

FAIAOGA FILIFILIA MO A’OGA TULAGA MUAMUA

 

E ui ina o loo loma pea le toe la'asaga e iloga ai pe manuia le taumafaiga a Avau Va'a Alii i le avea ai ma Faia'oga o le Tausaga, ae o le la'asaga muamua fo'i e le'i faigofie lava.

 

O lea ua filifilia nei Avau e fai ma sui o faia'oga uma o aoga tulaga muamua e tauva ma le faia'oga filifilia mai A'oga Maualuluga poo ai o i la'ua o le a mauaina le "Faia'oga o le Tausaga 2017-2018."

 

E tusa ai o lona filifilia e le Teacher Quality a le DOE e avea ma sui o le a toe fa'amasino fa'alua mo lea fa'aeaga sili sa fa'aalia ai lona taofi e fa'apea, "Ou te le'i iluilu talutalu o le a ou mauaina lenei tulaga, aua e to'atele sui agava'a sa ou iloa na matou o fa'atasi i lenei tausinioga, ma e le'i faigofie lava fo'i mea uma na tapena i ai, ia maua se avanoa fa'apenei. O lea fo'i e le'i a'ea le toe olo o lenei fa'amoemoe, ae o le fa'afetai i le avanoa ua aumaia mo se taumafaiga, o se mea sili lea ua tupu mai mo a'u, a'o avea ai ma faia'oga!"

 

O Avau o le faia'oga o le Level K5 i le Matafao Elementary. Ua atoa fo'i le 21 tausaga talu mai ona avea ma faia'oga, o lana galuega muamua fo'i i lona soifua taumafai e tausia nai ona matua.

 

"Sa ou mana'o e avea a'u ma faia'oga, ina ia lava le taimi e maua ai i le fale mo le tausiga o nai o'u matua. Sa fuafua e lo'u mafaufau a'o talavou, e amata i le faia'oga, ae a toeititi loa, ona suia lea i se isi galuega. Peita'i, ua atoa ane le tolu i le fa tausaga, ua le toe manatu ia suia le galuega. Ua ou fiafia lava e aoao ma fetaufa'i ma fanau talavou, ua avea ma se fiafiaga uiga ese i lo'u fo'i tama'ita'i talavou i na vaitau, ua o'o mai lava i le taimi nei."

 

Ua umia e ia le fa'ailoga o le Bachelor of Education sa ia sailia a'o avea lava ma faia'oga i le atunu'u e fa'aaogaina ai le avanoa matagofie sa fa'atulaga mo faia'oga e sailia ai fa'ailoga maualuluga i le maliliega a le ASCC ma le University of Hawaii Manoa - CO-HORT 19 lea na fa'au'u i le 2009.

 

Na amata mai lona avea ma faia'oga i le A'oga tulaga muamua a Gov. Uifa'atali Peter Coleman i Pago Pago, ma sa amata lava o se faia'oga i le Level 8, Level 7, Level 5, Level 2 & Level 1.

 

"O le taumafaiga lea ua toe vala'auina ai Avau e amata mai le Level K5, aua e mautu le talitonuga, o le amataga lava o le olaga a'oga o le fanau, a lelei ona tapuia, e fa'apena lava ona sologa lelei lana a'oa'oga i le fa'asolo mai ina talavou matua ma o'o i a'oga maualuluga,” o se fa'asoa mai lea a le tama'ita'i Pule A'oga i Matafao, Dr Tino Roberts.

 

Ua fa'atulaga o le aso 4 Oketopa, 2017 e toe asiasia atu ai le potu a'oga o Avau e le Teacher Qulaity, ina ia latou makaina ana galuega fa'atino mo le a'o'aoga o fanau, ona fa'atusalia lea i le fo'i maka o le faia'oga ua mae'a flifilia mai le A'oga Maualuluga, ma maua ai le sui e toina ia te ia le pale o le manumalo i le Faia'oga o le Tausaga.

 

O le fa'afetai a le tama'ita'i faia'oga, ona o le avanoa ua ia maua e tauva ai mo lenei tofi taua, ma ia faailoa mai, "E taumafai lava le mea sili, ae o le fa'afetai o le lagolagosua a le tama o le aiga ma le fanau i lenei taumafaiga, ae maise le pulega o le matou aoga ma le vasega o uso ma tuagane faia'oga, i le latou fa'amalosi'au fo'i ma fa'amanuiaga e fa'ae'e mai ina ia mautu ai le fa'amoemoe ma una'ia malosi le loto e faia le mea sili."

 

TOE FA’AFO’I I HONOLULU TAGATANU’U O INDONESIA

 

Ona ua matua fa'amamaluina le tatau ona fa'ataga atu e le ofisa o le Loia Sili o se tasi e fia ulufale mai i Amerika Samoa ae ua leai sona ID Amerika Samoa po'o se Pemita e ulufale mai ai a'o le'i oso i le Hawaiian Air i Honolulu, lea na taofia ai se tasi iloga o le Malo o Initonesia, sa fia uia mai le tatou malo nei.

 

O le tala moni, sa usita'ia lava e le sui mamalu lea lona toe fo'i i Honolulu i le va'alele na sau ai, peita'i, ua ia tusi mai i le Kovana sili o le tatou Malo, ma fa'asea mai ona o lea faiga sa faia ia te ia i le tatou malae va'alele.

 

O lo'o fa'ataunu'uina lava le galuega a le ali'i Ofisa o le Ofisa o Femalaga'iga, peita'i ua le taga'i toto'a i le afuaga fo'i o le fia ulufale mai o lea sui mamalu, aua o lea le malo sa mafua ai ona fa'atuina le Faleta'alo tele i Pago Pago, ona o le foa'i a lea Malo, Initonesia.

 

Ua fa'ailoa mai na talanoaina lea tulaga i le fonotaga a ta'ita'i o Matagaluega a le Malo fa'atasi ai ma le Kovana Sili ina ia sailia le sui tonu lava na fa'apogaia le fa'afitauli, ma talanoa fo'i se vaifofo e ao ina nofouta i ai le aufaigaluega i malae vaalele pe a toe alia'i mai ni mea fa'apea i le lumana'i.