Molia Kelemete i le umia fa’asolitulafono o fualaau faasaina


[ata: SN]
ausage@samoanews.com

E 2 moliaga mamafa ua tu’uaia ai nei e le malo se ali’i mai Iliili, e mafua mai i tu’uaiga i lona umia fa’asolitulafono lea o vaega o fualaau fa’asaina o le aisa.

 

O moliaga ua molia ai e le malo ia Sonny “Mu” Kelemete e aofia ai lona umia fa’asolitulafono o vaega o le pauta fa’asaina o le aisa; fa’apea ai ma le moliaga o lona umia fa’asolitulafono o vaega o le pauta o le aisa, ma le fa’amoemoe e tulei ma fa’atau atu isi tagata.

 

O moliaga ua tu’uaia ai e le malo ia Kelemete na alia’e mai i le taimi na taofia ai e Leoleo lana ta’avale i le aso 5 Setema 2017 i Iliili, ina ua molimauina e Leoleo se tulaga le talafeagai i le leo o le mafa o lana ta’avale.

 

O sui o le Vaega Faapitoa a Leoleo o loo sailia fualaau fa’asaina (Vice & Narcotics Tactical Unit) na latou taofia le ta’avale a Kelemete, ma tu’uaia ai le maua o fualaau ia te ia, ma mafua ai loa ona molia o ia e le malo i moliaga mamafa e 2.

 

O le mae’a ai o le ulua’i iloiloga a Kelemete sa faia i luma o le afioga i le ali’i Fa’amasino ia Fiti Sunia i le vaiaso na te’a nei, e sailia ai pe lava mau a le malo e lagolago tu’uaiga fa’asaga ia Kelemete, na faia ai loa le fa’aiuga a le Fa’amasinoga Fa’aitumalo, ina ia tuu atu le mataupu a le ua molia e fa’aauau i luma o le fa’amasinoga maualuga.

 

O le ali’i leoleo ia Justin Thomsen, o ia fo’i lea na fa’auluulu i ai le suesuega a Leoleo e uiga i lenei mataupu, na molimau mo le itu a le malo i le ulua’i iloiloga sa faia.

 

O le tama’ita’i loia fautua ia Kate Hannaher o lo o tula’i mo Kelemete, lea o lo o tatala i tua ina ua ia totogiina le $30,000 na fa’atulaga e le fa’amasinoga, ae o le tama’ita’i loia ia Christy Dunn o lo o tula’i mo le itu a le malo.

 

Na taua e le ali’i Leoleo ia Thomsen i lana molimau e fa’apea, a o fa’agasolo tiute masani a sui o le Vaega Faapitoa i le aso e pei ona taua, sa fa’afuase’i ai ona latou vaaia le aga’i atu o le ta’avale a Kelemete i Iliili, i le vaega tonu e fa’afesaga’i ma le Aoga a Iakina Adventist Academy.

 

O le pao leotele o le leo o le mafa o le ta’avae a le ua molia, na mafua ai ona taofi e Leoleo lana ta’avale, ona o le ituaiga leo lea e fa’asa i lalo o le tulafono tau ta’avale.

 

Na taumafai le Ta’ita’i o le Vaega Faapitoa a Leoleo, ia Capt. Lima Togia e fa’amalamalama ia Kelemete le mafua’aga ua taofi ai lana ta’avale, peita’i na finau atu fo’i le ua molia i Leoleo, e leai se mea o fa’aletonu i le leo o le mafa o lana ta’avale, o lo o lelei lava.

 

A o fa’aauau pea talanoaga i le va o Kelemete ma Catp. Togia, sa fautuaina ai loa e le ali’i Leoleo ia Kelemete e oso i fafo ma lana ta’avale, ona o puipuiga lava i lona saogalemu.

 

Na toe fa’aauau talanoaga a Leoleo ma Kelemete i le taimi na oso ai i fafo mai lana ta’avale le ua molia, ae o le taimi fo’i lea na vaaia ai le aga’i atu o le ta’ifau a Leoleo (K-9) ma ta’amilo fa’asolo i le tino o le ta’avale, ma vaaia ai loa e Leoleo suiga i amioga a le ta’ifau, e fa’ailoa atu ai e i ai le fa’aaliga ua ia iloaina.

 

O le suiga i amioga a le ta’ifau na mafua ai loa ona maua le avanoa o Leoleo e su’e ai le ta’avale a Kelemete, e aofia ai ma le sailia o lona tino atoa, ma tu’uaia ai le maua o ni tama’i taga pepa iila se 9 o lo o i ai pauta papa’e i totonu o le taga o le ofuvae a le ua molia sa ofu i le aso lea.

 

Na faia se suega faapitoa i pauta papa’e sa i totonu o pepa iila nei, ma fa’amaonia ai, o ia pauta papa’e o vaega ia o le pauta fa’asaina o le aisa (methamphetamine). O isi mea na maua e Leoleo e aofia ni taga pepa iila laiti, fa’apea ai ma se tino i tupe e $90.

 

Na fesili le loia a Kelemete i le molimau, pe aisea na latou taofia ai fua le ta’avale a Kelemete. Ae aisea fo’i na faaaoga ai e Leoleo ta’avale e 3, to’a 7 Leoleo ma le ta’ifau i le taimi na taofia ai le ta’avale a le ua molia.

 

Ae na taua e le molimau e fa’apea, o faiga masani lava a Leoleo i le fa’atinoina o a latou tiute.

 

Na toe fesili le loia a Kelemete i le molimau a le malo, pe moni lona manatu na mafua ona latou taofia le ta’avale a le ua molia, ona o lo o masalomia o ia i lona umia o fualaau fa’asaina, na tali le molimau e leai, na mafua ona taofi e leoleo lana ta’avale, ona ua fai lava si leotele o le leo o le mafa o lana ta’avale.

 

Na teena e Kelemete tuuaiga a le malo fa’asaga ia te ia, ma ua toe tolopo lana mataupu e toe valaauina i le fa’aiuga o le masina fou o Oketopa. O lo o tumau fo’i tuutuuga o lo o tatala ai o ia i tua e fa’atali ai le isi aso o lana iloiloga.

Comment Here