Ads by Google Ads by Google

Lagolagoina Maota o Sui pili si’i ai tau o totogi i luga o le uafu


Afioga i Faipule i le taimi o a latou felafolafoaiga i le taeao ananafi i pili tupe a le faigamalo. [ata AF]
ausage@samoanews.com

Mai le tele o pili tupe a le faigamalo a Lolo ma Lemanu sa iloiloina e le maota o sui, e tasi le pili tupe lea ua fa’ailoa e afioga i Faipule lo latou lagolagoina, o le pili tupe lea e si’i ai le tau o totogi i luga o le uafu i Fagatogo.

 

Pau suiga a le maota o sui ua faia i le tulafono, o le ave’ese atoa lea o le vaega o le tulafono o lo o taua ai le ta’i 5 tausaga ma iloilo tau fa’aee i luga o le uafu, e pei ona fa’aupuina e fa’apea: “O totogi o lo o taua i luga e mafai ona iloilo pe a uma le 5 tausaga. E iloilo e le Fa’atonu o le Taulaga totogi e pei ona taua e ta’ilima tausaga ma, afai e tatau ai, ia amata le suia o totogi i lalo o lenei mataupu ina ia tusa ai ma le Tulafono o Taualumaga o Galuega 4.1001 ma isi e mulimuli mai ai”.

 

O le mae’a ai o se iloiloga umi e lata i le 2 itula na alo atu i ai le maota o sui i le taeao ananafi, na pasia ai loa i le faitauina fa’alua le pili e sii ai le tau o totogi i luga o le uafu, ma le fa’amoemoe, o le taeao nei e faitau fa’atolu ai lenei tulafono.

 

O le taitaifono o le Komiti o le Paketi a le maota o sui, afioga Vailiuama S. Leasiolagi na fa’afoeina le iloiloga.

 

E 2 pili tupe na aofia i le fetufaaiga a le maota o sui i le taeao ananafi, o le pili e sii ai le tau o totogi i luga o le uafu e pei ona pasia i le faitauga fa’alua fa’atasi ma suiga, ma le pili e aiaia ai lafoga fou mo meainu suamalie e le aava, ma le fa’amoemoe e fa’asolosolo ai ona soloia le lafoga oloa e 5% ma suiga o le lafoga o oloa ua uma ona fa’aaoga.

 

Ae talu ai le tele o fautuaga, fesili, atoa ai ma finagalo fa’aalia i le tulaga tonu e tatau ona taoto ai le pili o le lafoga oloa e 5% i luga o le uafu, na pasia ai loa le mau ina ia toe taoto le talanoaina o lenei tulafono seia aulia se isi taeao fou.

 

Na fa’aalia manino e le afioga a Vailiuama i luma o le maota o sui e fa’apea, e na o le pau lava ia o pili tupe ua finagalo le Komiti e talanoaina ma fai i ai se fa’aiuga, ae o isi pili tupe uma o lo o i ai, o le a ta’atia ai pea seia i ai se isi taimi o i luma.

 

O isi pili tupe e aofia ai le lafoga mo pisinisi e 1%; lafoga o oloa e 7%, pili e sui ai le fua fa’atatau o lafoga ina ia tutusa ma le fua o lafoga a le Ofisa o Lafoga a le malo tele (IRS).

 

Saunoa atili le afioga a Vailiuama e fa’apea, e le faigofie le fa’aiuga a le Komiti e fa’atatau i le tele o pili tupe na afua mai i le faigamalo, ona o lea ua mae’a ona fesiligia sui o le Komiti Tupe a le Kovana e fa’atatau i tulaga manuia e oo i ai le malo pe a pasia tulafono tupe nei, a o lea fo’i ua mae’a ona fesiligia le aufai pisinisi e tusa ai o a latou finagalo fa’aalia e fa’atatau i a’afiaga o pisinisi ma le atunu’u pe afai ae pasia nei mau lafoga.

 

O se tasi o mataupu na lalafo i ai Faipule i le taimi o a latou felafolafoaiga e fa’atatau i lenei tulafono, o le malosi e fai to’atasi ai e le Fa’atonsuili o le Pulega o Uafu o suiga i le tau o totogi i luga o le uafu, atoa ai ma totogi mo le fa’aaogaina o le masini fou a le malo, tusa lava pe le o lelei le masini ae o lo o fa’aauau pea ona totogi e le aufai pisinisi le tau.

 

Na lagolagoina e Timau Tini Lam Yuen le finagalo o Kitara Vaiau, e tu’u ai pea le vaega o le pili lea ua finagalo le maota e aveese, ona e le mafai e le Fa’atonusili o Uafu ma Malaevaalele ona ia faia to’atasi ni suiga i totogi o tau o tautua.

 

Na saunoa Vesi Talalelei Fautanu Jr e fa’apea, o lo o manino i le tulafono, e leai se malosi o le Fa’atonusili na te faia ai ni suiga fou i le tau o totogi o tautua i luga o le uafu. Ona o lea tulaga, na ia fautuaina ai le tatau lea ona pasia pea le tulafono i lona tino na ulufale mai ai i le Kovana.

 

I le maota maualuga a le Senate, e na o le tasi lava le pili tupe a le faigamalo ua mae’a ona latou pasia, o le pili e sui ai le fua o lafoga a Amerika Samoa, ina ia tutusa ma le fua o lafoga a le Ofisa o Lafoga a le Feterale (IRS).

 

Mo isi pili tupe, ua sauni le Senate e palota a latou suiga ua faia i le pili e sii ai le tau o totogi i luga o le uafu. O le suiga e pei ona talanoaina e le maota maualuga ananafi, e aofia ai le si’i o le lafoga oloa mai le 5% i le 10%.

 

O le fautuaga e pei ona talanoaina, ia fa’atumau pea le lafoga oloa e 5% o lo o i ai, ona fa’aopoopo lea i ai o le 3% i luga, fa’aopoopo atu i ai ma le 2% o le lafoga lea ua aveese mai tagata faigaluega, ina ia maua atoa ai le aofaiga o le lafoga oloa i luga o le uafu e 10%.

 

Ua sauni atu nei le maota maualuga mo le palotaina o a latou suiga e pei ona taua mo le pasiaina.