Sauni afioga Faipule fesiligia Pulesili Ofisa o Fesootaiga a AS


Le afioga i le Pulesili o le Ofisa o Fesootaiga a Amerika Samoa (ASTCA), Puleleiite Tufele Li’amatua Jr. [ata AF]
ausage@samoanews.com

O le aso Tofi o le vaiaso fou lea ua fa’atulaga e fa’ataunu’u aloaia ai le iloiloga a le Komiti o Fesootaiga a le maota o sui, mo le fa’amoemoe e fesiligia ai le Pulesili o le Ofisa o Fesootaiga a Amerika Samoa (ASTCA), mo le fa’amaninoina o mataupu o lo o fiamalamalama i ai ni isi o afioga i Faipule.

 

O le afioga i le ali’i faipule ia Vailoata E. Amituana’i, o ia fo’i lea o le ta’ita’ifono o le Komiti, na ia fa’alauiloa le fa’ataunu’uina o le iloiloga, ona o le tele o mataupu ua fesiligia e afioga i Faipule e fa’atatau i le tautua a le ASTCA i le atunu’u.

 

O le afioga i le ali’i faipule ia Sataua Dr. Mataese Samuelu na ia talosagaina se iloiloga ma le afioga a Puleleiite, a o avea ai pea o ia ma Faipule o le itumalo o Sua, ona o le fiamalamalama i le tele o suiga ua faia i totonu o le ASTCA talu ona tofia o ia e avea ma Pulesili le tumau i ni nai masina e le i mamao atu.

 

Na taua e Sataua e fa’apea, e to’atele tagata o lona itumalo aemaise ai ni isi o le atunu’u o lo o fia malamalama, i le mafu’aaga o suiga ua faia fa’asaga i ni isi o tagata faiagleuga a le ASTCA, e pei o le fautuaina lea o ni isi o i latou e fa’amavae mai a latou galuega.

 

E talitonu le afioga ia Sataua, e tatau ona malamalama le Fono ma le atunu’u, o fa’aiuga ua faia e le Pulesili fou a le ASTCA, o fa’aiuga e manuia ai le atunu’u aemaise ai tagata faigaluega.

 

Sa ia taua atili le i ai o ni isi o tagata faigaluega ua fa’asea ona o suiga fa’afuase’i ua faia, lea ua mafua ai ona vave fa’amuta la latou tautua mai galuega ua tele tausaga o latou galulue ai.

 

O le masina na te’a nei na aloaia ai i luma o le maota o sui le fa’amavaega a le afioga a Puleleiite mai le nofoa o lona itumalo, ona o lea ua alo atu o ia e fa’atino ona tiute tauave fou e pei ona filifilia i ai o ia e le afioga i le ali’i kovana, tofa Lolo Matalasi Moliga.

 

O le aloaia ai o le fa’amavaega a le afioga a Puleleiite mai le nofoa o le itumalo o Sua, na tu’u aloaia mai ai loa e le Komesina o le Ofisa o Palota se poloaiga, e fa’alauiloa aloaia ai le Faiga Palota Laititi a le itumalo, mo le toe sailiina o se tasi na te nofoia le nofoa o le itumalo ua avanoa.

 

O le aso, Setema 21, 2017 i le itula e 4:00 i le afiafi ua fa’atulaga e tapunia aloaia ai le lesitalaina o suafa o i latou ua filifili e tausinio mo le sailiga tofi a le itumalo.

 

Ae tusa ai o se ripoti fa’atuatuaina na tauaaoina mai i le Samoa News i le vaiaso nei, e to’a 9 sui tauva ua mae’a ona se’i a latou pepa mo le fa’amoemoe, ae na o le to’alua ua mae’a ona lesitala aloaia.

Comment Here