Tala I Vaifanua

FA’AFINAUGA PEMITA MO LE PISINISI A LE ‘TMO’ I TAFUNA

 

Ua fa'alua ina toe fo'i le ali'i faipinisi, Frank Gaisoa, i luma o le Komiti a le PNRS ona o le i ai pea o aiga o lo'o tete'e i le fa'atuina o lona faleoloa i le eleele i Tafuna ua mua'i fa'atutuina ai fale nofo o aiga, le vaega tonu lea e i ai le eleele o Afoa Moega Lutu, Abe & Faleosina Voight, Le Ekalesia a Word of Life i le isi ituala, ma le susuga James McGuire ma lona afafine lea fo'i e tete'e pea, ona e le'i avatua se latou tusi e saini ai ua malilie fausia se pisinisi i le latou vaia'ai.

 

O le ala o le te'ena muamua na fa'ao'o ia Gaisoa, ona o le “site plan” e le'i sa'o, ua mae'a taua'aoina mai le ‘site plan’ fou i le toe o'o fa'alua atu o le faipisinisi, ae toe fa'ailoa mai, sa tatau ona alu e saili i latou e ona eleele lea e le'i fa'atutuina ai ni fale, ina ia malilie e fausia ai se fale mo se pisinisi i le latou vaia'ai.

 

Ina ua mae'a talia le site plan fou na taua'aoina, ae faia loa le fa'aiuga fou, ia fa'ao'o fo'i le pepa e saini mai ai ma aiga nei e le'i saini aua o lo'o aofia i le 300 futu le mamao fa'ata'amilo e ao ina e fa'autagiaina, ia malilie i lau galuega o le a fa'atautaia.

 

Ina ua mae'a le iloiloga ma ua autasi e toe fa'asaini mai i latou o i ai le eleele lea e le'i fa'atuina ai se fale e Gaisoa, ona tu'u avanoa lea ia McGuire e fa'ailoa mai lana fa'asea.

 

Na ia fa'ailoa, "E tatau i so'o se faipisinisi ona mua'i tala'i i tagata uma e ono a'afia i lana pisinisi. Ua leva fo'i ona ia faia tusitusiga ma fa'ao'o atu i le Ofisa o Fefa'ataua'iga ina ia mataituina le aia tatau a tagata e ona fale lea o le a a'afia i lenei pisinisi e fia fa'atu. Muamua lava o le nofoaga lea o le vaia'ai o aiga ma fale nofo, ae o lea o le a fa'atuina ai le pisinisi e pisi ma tele ta'avale ma feoa'iga o le a fegasoloa'i ai. O le aia tatau a tagata lautele o lo'o nonofo i le vaia'ai lea e ao ina taga'i toto'a i ai le malo, aua o le isi lea vala o le tulafono tau vaia'ai e nofoia e aiga ma le vaia'ai o pisinisi."

 

Sa ia fa'ailoa mai, "E foliga mai e tou te le'i fa'aaogaina lo outou tofi i le malosi'aga e tatau ai. Sa tatau ona outou faitauina a'u tusi na fa'ao'o mai ma toe siaki lelei le tulafono o lo'o tusia mai o lo'o a'afia i le fa'asea. Ona fa'ato'a faia lea o lenei iloiloga, ae leai ma se tasi o outou o lo'o faia se fesili e tusa o le aia a tagata o lo'o aofia i le vaia'ai tonu o le a fa'atu ai le faleoloa. O le mea ea e tou te le fa'aaogaina tusitusiga o lo'o aumai ia outou e tusa ai o le fa'atulagaga o lenei Komiti?"

 

Ina ua mae'a lana 2 minute ona fa'asolo lea o galuega a le Komiti ae moeletoa i lea mataupu se'i toe taga'i le Komiti fou i tusitusiga nei e fa'asagatau i le mana'oga o lea faipisinisi e fa'atu le faleoloa e maua ai fo'i galuega mo nisi o tagata o le atunu'u.

 

GALUEGA TAU FA’ATUTU - A’AFIAGA GATAIFALE & SIOMAGA

 

O le amataga o galuega tima'i a le Coastal Zone Management po'o i latou o va'aia toto'a le Apitagalu ma le Gataifale o le atunu'u, ua latou aumaia uma ai vaega o tautua e valu o lo'o nafa ma le va'ava'aia toto'a o le Gataifale ma ona a'afiaga mai mea eseese e fa'atutuina i Laufanua o le atunu'u i lona aotelega atoa lava.

 

O le aso Gafua na te'a nei sa fa'atasia ai i latou i le Gov. Lee Auditorium i Utulei mo le semina mo Pulenu'u ma Leoleo nuu lea e va'ava'aia o latou afioaga i so'o se mea e fausia, ma e sainia fo'i e i latou nei pemita talosaga mo fale uma e fa'atutu.

 

O le vaega o le Soil and Conservation a le Malo tele sa auai, faapea ma sui o le ASPA, Paka ma Malae Ta'alo a le malo, DMWR, ASEPA, Historical Preservation, Public Works ma le PNRS.

 

O le vasega o Pulenu'u sa latou fa'asolo i vasega e tolu sa fa'atautaia ai le semina. E tala noa lava le sui latou i le vaega o auaunaga a lana matagaluega o lo'o faia mo le lautele, ma ia mautinoa fo'i o fautuaina tagata uma pe afai o le a matauina e i latou e ono lamatia le soifua o tagata i vaitau leaga e a'afia ai le atunu'u.

 

Na fa'ailoa e le vaega a le ASPA, afai o lo ua mae'a fa'aaoga laina o le Sewer po'o le suavai lafoa'i i totonu o lou afioaga ae mamao ese mai lou fale mai so'otaga o lea laina, e fautuaina le tagata pe sili ai ona suia le tulaga o lou maota o fia fausia. Ina ia fa'aitiitia ai le tupe fa'aalu a lou aiga e ta'i ai paipa mo le suavai lafoa'i.

 

O nisi tulaga fale ua mana'omia ona fa'atutu latalata tele i le sami, ae ua iloa mafuie ma le tele o galulolo. E tatau ona fautuaina e fausia fale ia mamao mai le apitagalu, ia usita'ia ai fo'i tulafono tamau a le Malo.

 

O mea uma fa'apea e ao ina mataituina e le vasega o pulenu'u ma leoleo nuu, aua e tatau lava ona alu asiasiga a i la'ua i fale o lo'o fausia i le latou afio'aga, ma talanoa i ai e ao ina faia pemita pe afai e le o faia se pemita.

 

"E matou te le o taofia galuega ina ia le faia, ae ao ina mautinoa e taofia e i matou pe afai e le o uia ala o le tulafono tau fausaga o fale ma eleele o lo'o fa'atu ai lou fale. Afai e faitio mai se tasi, ae ua mae'a ona talosaga lau pemita. Lona lua pe afai o i ai se fa'afitauli tau alavai ma tafega i aso timuga, ina ne'i toe a'afia lou aiga ae ua mae'a ona fa'aalu atoa le tamaoaiga i le fausaga o lea fale, ae leaga le tulaga o iai,” o se fa'apupulaga lea a le sui mai le ASPA.

 

O le tala mai a se tasi o ali'i Pulenu'u, "O le aoga ia o lenei fonotaga, ua iloa lelei ai le mea e ao ina faia. O a'u lava fo'i e pa'u i ai nisi o galuega ua vave ona saini le lima, ae le'i matua alu e va'ai le galuega ma le tulaga ua fausia ai, pe ua amata fo'i le galuega ae o lea fa'ato'a faia mulimuli le pemita."

 

O le a fa'aauau pea lenei so'otaga ma le fa'apupula atili o galuega e ao ina mataituina e ali'i pulenu'u.

 

KONEKERESI MO TA’ITA’I UMA - SAILI AUVA’A A NOA!

 

O le fe'au taua mai le Failauga fa'apitoa Dr. Noel Wudroffe, na fa'atasia ai le vasega o ta'ita'i o Ekalesia eseese na mafai ona maua le tala'ave o lea fa'asoa taua mai lenei Faife'au Fa'atala'i mo le Congress - World Borderless Networking, lea sa fa'atasia i le Gov. Lee Auditorium i le aso Lulu o le vaiaso na tea, "Ia nofouta i tatou uma, afai ae avea'i tu'usa'o mai se fe'au fa'apitoa mai le Lagi i le lalolagi, e tele na'ua suiga tetele e tutupu i le Lalolagi, ina ia nofouta ai tagata uma, o lo ua auina mai le finagalo o le Atua, e ala fo'i i ana fa'ailoilo!"

 

E pei ona faailoa mai, o i latou na o'o mai ma le fe'au o ave fe'au mataala i latou, peita'i e le lava ona fa'alauiloa le latou fonotaga fa'aleaoaoga e aoga tele i taita'i o Ekalesia, Taitai o Malo ma ulu fo'i o aiga ta'itasi. "O lenei vaega ua tatou maua i maota i lenei aso, ua lava ma totoe mo le fa'amoemoe o le fe'au taua. Ia outou o atu ma fausia agaga ia matata'u i le Atua soifua, ia iloa e i latou, ua mautinoa lava e i ai le fe'au fa'apitoa e aumaia sa'o mai le lagi e pei ona fa'ailoa i le Faaaliga 18: E matua ogaoga fo'i mea e tutupu i le lalolagi, aua e le 'aumaia so'o ni fe'au tu'usa'o mai le Atua i tagata uma i le lalolagi."

 

O le tima'iga i lea aso, "Soia tou te fa'amanuia atu i tagata, o le mea lea e faia e le Atua i tagata uma lava, tagata lelei po'o tagata o leaga, ae tatou o e amata fausia ia mautu le fa'amoemoe o tagata ina ia le fano ona o mea faigata e o'o muamua mai a'o le'i o'o mai le fe'au tu'usa'o mai le Lagi a le Tama."

 

O le fe'au lea sa pau i a'ai o finagalo o ta'ita'i lotu sa auai, ma ua toe taliu fo'i le aumalaga ma le failauga fa'apitoa e uia Samoa, Niu Sila ma Ausetalia ma toe fa'ata'amilo mai i Amerika.

 

O i latou sa auai, o le Tina o le atunu'u Cynthia Moliga ma le vasega o fa'afeagaiga sa latou iloa lenei semina. E maua lea lauga ma isi uma upu fa'amalosi i le laina o feso'ota'iga fa'ainiteneti : www.congresswbn.org.

Comment Here