Ads by Google Ads by Google

Pasia afioga Faipule Paketi malo mo le tausaga tupe fou

Afioga i faipule o le maota o sui i le taimi o le latou tauaofiaga ananafi  [ata AF]
E le i iloiloina le Paketi a le Fono Faitulafono
ausage@samoanews.com

Ua pasia e le maota o sui le pili mo le fa’asoasoaina o le paketi a le malo mo le tausaga tupe fou 2018, e ala i le palota fulisia e 19-0 i le taeao ananafi, e ui e le i talanoaina e le Komiti Soofaatasi o le Paketi a maota e lua le tupe fa’asoasoa a le Fono Faitulafono.

O le paketi a le malo mo le tausaga tupe fou 2018, ua fuafuaina i le aofai e $395.2 miliona, tusa lea e 4% ua maualuga ai nai lo le paketi o le tausaga tupe tuai lenei 2017, i le aofaiga e $380.4 miliona.

Na aofia uma sui mamalu o itumalo taitasi i le tauaofiaga a le maota o sui i le taeao ananafi, ina ua toe taliu mai i fanua ni isi o afioga i Faipule sa toesea ona o ni isi o tiute fa’alemalo aemaise ai talavai i falema’i i fafo.

O le Taitaifono o le Komiti o le paketi a le maota o sui, afioga Vailiuama Steve Leasolagi na tula’i ma fa’atu le mau ina ia tuuina atu loa le pili mo lona palotaina ina ia pasia, i le mae’a a lea o le faitauga fa’atolu sa gafa ma le Failautusi a le maota.

Na taua e Vailiuama le mae’a aloaia lea o le galuega sa alo atu i ai le Fono Faitulafono, i le iloiloina o le paketi a le malo mo le tausaga tupe fou, o le mafua’aga fo’i lea ua manatu ai e tuuina atu loa lenei tulafono mo lona palotaina ina ia pasia.

Sa ia taua le leai o se vaega e le i oo i ai sailiiliga a le Komiti Soofa’atasi i le taimi na fesiligia ma iloilo ai paketi a ofisa taitasi, ma ua manino fo’i tulaga uma e fa’atatau i le paketi a le malo.

E le i taua e Vailiuama i lana saunoaga le paketi a le Fono Faitulafono e le i iloiloina e le Komiti Soofaatasi, a o lea ua pasia e le maota o sui le pili mo le fa’asoasoasina o le paketi.

O ni isi o afioga i Faipule sa leotele le fa’aleoina o le latou palota ioe ina ua valaau e le Failautusi a le maota o latou suafa, o ni isi sa tau le lagona le fa’aleoina o le latou palota, ae o isi sa na o le lue o latou ao e fa’ailo atu ai a la latou palota.

A o le i fa’alauiloa e le Fofoga Fetalai ia Savali Talavou Ale le fa’aiuga o le palota, na muamua ona fautuaina afioga i Faipule, ina ia tausisi i tulafono a le maota, e ala i le fa’aleo o le palota ioe, ae le o le lue mai o latou ao.

“E leai se palota e ta’u o se lue o le ao. Fa’aleo mai lau palota i le ioe poo le leai,” o le saunoaga lea a Savali, ma ia fa’ailoa ai, e 19-0 le aofa’i o le palota ua pasia ai le pili o le paketi a le maota o sui.

Sa tau fesiligia e ni isi o faipule tulaga o le paketi i le taimi o folafolaga a le maota o sui, peita’i na vave ona fa’auilavea le afioga i le Fofoga Fetalai ma ia fautuaina le tatau lea ona taoto ni isi lagona e uiga i lenei mataupu, o lea ua mae’a galuega a le maota.

Na taua fo’i e le Fofoga Fetalai e fa’apea, o le isi lea tulaga taua sa talosagaina ai afioga i Faipule ina ia auai i taimi o iloiloga o le paketi, ina ia latou silafia ai tulaga e fa’atatau i tautua ma auaunaga a matagaluega taitasi, aemaise lava i tulaga o le fa’aaogaina o seleni.

E tusa ai o faiga masani, o le a tuuina atu e le Failautusi a le maota o sui se fa’aaliga i le Failautusi a le maota maualuga i le taeao nei, e fa’ailoa ai le pasia e le maota o sui o le latou pili o le paketi.

Na maua le avanoa e fesiligia ai e le Samoa News ni isi o afioga i Faipule i so latou finagalo, e fa’atatau i lo latou pasia lea o le pili o le paketi ae le i talanoaina e le Komiti Soofaatasi le tupe fa’asoasoa a le Fono.

Na taua e se tasi o afioga i Faipule e le i finagalo e fa’ailoa lona suafa e fa’apea, o se tulaga fa’anoanoa tele pe a vaavaai atu i le auala o lo o fa’atino ai galuega a le Fono Faitulafono, o le tau solomua lea i Ta’ita’i o le Fono le folafola i Fa’atonusili ina ia auai uma i taimi o le iloiloga o le latou paketi, a o lea ua oo atu i le taimi e iloilo ai le paketi a le Fono ae malaga le Peresetene o le Senate i fafo.

“E tatau i le Fono Faitulafono ona savavali i le tulafono, aua o i matou o lo o fausia le Tulafono. I lo’u fo’i taofi e tusa ai o lenei mataupu, sa le tatau ona palotaina e le maota o sui le pili o le paketi se’i vagana ua mae’a ona iloilo le tupe fa’asoasoa a le Fono, peita’i o lea lava ua fa’agasolo le galuega e aunoa ma le faamalieina o le isi itu o le galuega,” o le saunoaga lea a se tasi o Faipule.

Ae ui i le finagalo fa’aalia o lea faipule i le tatau lea ona taofi le palotaina o le pili o le paketi se’i iloilo muamua le paketi a le Fono, ae sa molimauina lava le leotele o lana “ioe” i le taimi na palotaina ai le tulafono i le taeao ananafi.

O le aso Faraile na te’a nei na fa’atulaga e iloilo ai e le Komiti Soofaatasi le paketi a le Fono Faitulafono. Ae pei ona taua i se ripoti a le Samoa News i le vaiaso nei, na toe tolopo lea iloiloga ina ua finagalo le maota maualuga e faatali le talanoaina o le paketi a le fono sei toe taliu mai i fanua le afioga i le peresetene o le Senate, Gaoteote Palaie Tofau sa toesea i atunu’u i fafo.

O lea suiga e aunoa ma le logoina o le Fofoga Fetalai ma le maota o sui, na tau tula’i mai ai ni finagalo fa’agaulemalie i le maota o sui i le aso Faraile na te’a nei.

Na taua e le afioga a Magalei Logovi’i, o le taitaifono o le Komiti o le Paketi a le maota maualuga e fa’apea, o le aso ananafi ua faatulaga e faaauau ai le talanoaina o le paketi a le Fono, fuafua lea i le taunu’u mai o le peresetene i le po o le aso Gafua na te’a nei.

E le i fa’ataunu’uina lea iloiloga e pei ona fuafuaina. Ao lea fo’i ua pasia e le maota o sui la latou pili mo le paketi. Lona uiga i se isi fa’aupuga, e le toe tau mana’omia le iloiloina o le tupe fa’asoasoa a le Fono.