Paepae: fa’amalamalama tulafono eseese tau ta’avale afi


[ata: SN]
ausage@samoanews.com

Ua fautuaina e le afioga i le ali’i Senatoa mai Alataua, afioga Paepae Iosefo Faiai le Komesina o Leoleo, tofa Le’i Sonny Thompson, ina ia fa’atulaga ni polokalame a lona Ofisa e faia ai ni fa’asalalauga fa’alaua’itele i luga o le ala ata a le malo, le KVZK-TV, e fa’amalamalama ai i le atunu’u atoa tulafono eseese e fa’atatau i ta’avale afi.

 

O ni isi o ia tulafono e aofia ai tulafono mo le fa’apogisaina o ta’avale (tint), tulafono o ituaiga mafa e fa’aaoga e ta’avale, tulafono o moli, ma le anoanoa’i lava o le mau tulafono e fa’atatau i ta’avale afi e tatau ona silafia e le atunu’u.

 

O lea fautuaga mai ia Paepae na tuuina atu lea ia Le’i i le aso Gafua o le vaiaso nei, i le taimi na fesiligia ai e afioga i Senatoa ia Le’i i le mataupu e fa’atatau i ta’avale leoleo fou, lea na fa’atau mai i le tupe o lo o maua mai i le ta’i $10 o lo o totogi e tagata o lo o solia tulafono tau ta’avale afi i le fa’amasinoga, e aunoa ma le tuuina mai i le Fono Faitulafono e pasia atu ai lona fa’aaogaina.

 

Na fa’ailoa e Paepae ia Le’i e fa’apea, o lo o ia te ia kopi o tulafono uma lava tau ta’avale afi, ma o lo o manino lava fo’i tulaga o le tulafono, ae tatau i lona Ofisa ona fa’alauiloa atili i le atunu’u mo lo latou silafia.

 

O ni isi o mataupu fou ua i luma o le fa’amasinoga i le taimi nei, lea o lo o tu’uaia ai ni isi o tagatanu’u i lo latou umia fa’asolitulafono o vaega o fualaau fa’asaina, na afua mai ina ua taofia e Leoleo ta’avale a i latou nei, ona o tu’uaiga i lo latou le usitaia lea o tulafono tau ta’avale afi, e pei o le leotele o le mafa o le ta’avale, pogisa o tioata, aemaise ai fo’i ma moli fa’aopoopo o lo o i le tino o le ta’avale.

 

O isi molimau sa valaauina i le iloiloga e aofia ai le Teutupe a le malo ia Ueligitone Tonumaipea, ma le Faatonusili o le Ofisa o le Paketi ia Catherine Saelua.

 

Na fia iloa e Paepae mai ia Saelua le uiga o le teugatupe e taua o le DPS Law Enforcement o lo o pulea e le Ofisa o le Kovana, lea fo’i o lo o fa’atulaga mai ai le vaega tupe e $200,000 i lalo o le Polokalame Faapitoa a le kovana. Na fa’amanino e Saelua e fa’apea, o le teugatupe e pei ona fesiligia, e ui lava o loo i le ofisa o le kovana ae o lo o i lalo pea lava o le malosi o le Komesina.

 

Na toe fesili Paepae ia Saelua pe fa’aaoga e le Komesina se tupe mai le vaega tupe lea, ae na tali Saelua, o lea lava, e mafai ona fa’aaoga e le Komesina i soo se taimi na te mana’omia ai.

 

Na vave ona fa’auilavea le afioga i le Komesina ma ia taua ai e fa’apea, e leai se malosi o ia te ia na te fa’aaogaina ai soo se tupe, sei vagana ua fa’amaonia muamua mai e le Kovana.

 

“I lo’u talitonuga o lo o i ai, ou te le sau i le fono pe a ou mana’omia se tupe, o mea uma lava e ui aga’i i le Kovana. A na i ai se malosi e fa’aaoga ai e le Komesina tupe, ua leva na sii totogi o Leoleo,” o le saunoaga lea a Le’i e tau fa’amanino ai le mataupu.

 

Ae na toe saunoa Paepae e fa’apea, o le aano moni ua mafua ai ona ia fesiligia le mataupu, ua mafuli tele le malo i le tatala o lea teugatupe fou ma lea teugatupe fou, a o lea lava e le o sa’o le fa’aaogaina o tupe. I lona talitonuga, e tatau lava ona ave sa’o tupe nei o lo o fa’apogai i le Ofisa o Leoleo e fa’atonutonu mai e le Ofisa o Leoleo ma fa’aaoga tatau ai.

 

I le tulaga o ta’avale, na fesiligia ai e Paepae ia le Komesina poo fea o i ai le ta’avale sa fa’aaoga e le Komesina o Leoleo ua mavae atu, le afioga Save Liuato A. Tuitele. Saunoa Le’i e faapea, e taunu’u atu ua leaga le ta’avale o lo o fesiligia, peita’i o le taimi nei, ua mae’a ona toe fa’aleleia ma o lo’o i le lotoa a le Public Works.

 

Saunoa Paepae e fa’apea, e le tatau i soo se Faatonusili ona filifili i le ta’avale e mana’o ai, ae tatau ona vaavaai i le ta’avale talafeagai e mafai ona fa’aaoga i galuega a lana matagaluega, ae le o le ta’avale e fa’aaoga mo na o ia lava.

 

“Na alu atu fo’i le CPO fa’atau lana ia ta’avale fou ina ua le mana’o i le ta’avale na alu atu o lo o i ai se fa’aaoga e le isi Fa’atonusili. E le tatau ona toe tulai mai lena tulaga i le lumana’i. E tatau ona fa’atau ta’avale e aoga mo le matagaluega, ae le na o le Faatonusili,” o le isi lea fautuaga a Paepae.

 

I le mataupu e fa’atatau i Leoleo fou e to’a 8 ia sa folafola e le Komesina, e tiute i aoga eseese pe a toe a’e aoga, na fesili fia malamalama ai le afioga a Paepae, pe ua fa’ataunu’u lea tulaga e pei ona folafola i le amataga o le tausaga.

 

E mafua lea tulaga ona na saunoa Paepae e fa’apea, ua uma lelei le 2 vaiaso talu ona a’e aoga o asiasi i le aoga maualuga a Leone, na te le o vaaia ai lava ni Leoleo o tiute ai. Sa ia taua e faapea, o se tasi o maliliega e pei ona faia e le Ofisa o Leoleo ma le Ofisa o le CJPA o lo o auala mai ai le alagatupe fesoasoani mai le Feterale o lo o totogi ai Leoleo fou na fa’atoa fa’auu mai i le Vasega lona 25 a Leoleo fa’atoa mae’a atu nei, o le galulue lea o Leoleo e puipuia le saogalemu o fanau aoga mai le a’afia i Fualaau Fa’asaina.

 

Na fautuaina e Paepa ia Le’i e usita’i i le tulafono, ina nei le sa’o le fa’aaogaina o le tupe ona tula’i mai ai fo’i lea o se fa’aletonu i le lumana’i.

 

Na fa’ailoa e Le’i lona malamalama lelei i le tulaga e pei ona fesiligia i Leoleo, ae o le fa’afitauli o lo o i ai i le taimi nei, e le o lava Leoleo e fa’atinoina le auaunaga i le atunu’u. Sa ia taua le isi Vasega Fou mo Leoleo lea ua amata fa’agasolo i le taimi nei, e taumafai ai e fesoasoani i le manaoga o lo o tula’i mai.

 

Ui o lea, o lo o fai lava ma asiasi Leoleo i aoga eseese e aofia ai aoga maualuluga ma aoga tulaga muamua, ona o le taumafai lava e mata’itu le saogalemu o fanau aoga mai le a’afia i fualaau fa’asaina.

 

Ae na saunoa Paepae e fa’apea, “Pau le fautuaga, ia usita’i i le fa’aaogaina o le tupe a le feterale. Ina ne’i maua mai e le Feterale e le o usita’i lou Ofisa i le fa’aaogaina o le tupe, ona faia lea o se faaiuga e toe fa’afo’i ai le atunu’u. A o lea ua lagona atu lou mafatia i le le lava o Leoleo.”

Comment Here