Talitonu le sui fofoga fetalai ua soli Komesina o Leoleo le tulafono


Sui Fofoga Fetalai o le maota o sui, afioga Fetui Fetu Jr. [ata AF]
ausage@samoanews.com

Ua talosagaina e le sui fofoga fetalai o le maota o sui se iloiloga a le maota ma le Komesina o Leoleo, se’i fa’amanino ai le mataupu e fa’atatau i le fa’aaogaina o le tupe na maua mai i le ta’i $10 o lo o ao i le Fale Fa’amasino e fa’atau ai ta’avale fou a Leoleo, ona o lea ua ia talitonu ua soli ai le tulafono.

 

I le taimi o folafolaga a le maota o sui i le vaiaso na te’a nei, na tula’i ai le afioga a Fetui Fetu Jr ma fa’aleo lona fa’anoanoaga e fa’atatau i lenei mataupu, i le fa’aaoga lea e le Ofisa o Leoleo o le tupe e fa’atau mai ai ta’avale fou a le Ofisa, e aunoa ma se fa’atanaga a le Fono Faitulafono.

 

Sa ia fa’amanino i luma o le maota o sui le manino o le tulafono o lo o i ai, e le mafai ona fa’aaoga le tupe lea e fa’atau ai ni ta’avale a Leoleo, se’i vagana ua pasia muamua atu e le Fono Faitulafono.

 

“O le molimau a le Komesina i le iloiloga o le paketi, na manino mai ai lona fa’aaoga o le tupe mai le ta’i $10 o lo o tipi e le Fa’amasinoga mai fa’asalaga o ave ta’avale, e fa’atau ai ta’avale fou a leoleo. Ae o le tulafono o lo o i ai, e le mafai ona fa’aaoga le teugatupe lea se’i vagana ua fa’ataga atu e le Fono Faitulafono, a o lea ua fa’atau ta’avale e aunoa ma se fa’atanaga a le Fono,”  o le saunoaga lea a Fetui.

 

“I lo’u talitonuga ua soli e le Komesina le tulafono. O tupe nei, o tupe a le malo, ae avatu i le Fono le fa’atanaga e fa’aaoga ai, e le faia i ai ni faiga pi’opi’o. O le fa’alua ai lea ona fai e le Ofisa o Leoleo le gaioiga le sa’o lenei o le fa’aaoga o tupe e aunoa ma se fa’atanaga,” o se vaega lea o le saunoaga a le sui fofoga fetalai.

 

E le i fa’atulagaina se aso e faia ai le iloiloga a le maota o sui e tusa ai o lenei mataupu.

 

Ae i luma o le maota maualuga, o le itula e 8:30 i le taeao nei lea ua fa’atulaga e faia ai le iloiloga a le Komiti o le Puipuiga o le Saogalemu Lautele, i lalo o le ta’ita’iga a le afioga i le ali’i Senatoa ia Fa’amasili Mau Jr ma le Komesina o Leoleo, tofa Le’i Sonny Thompson, e fesiligia ai le mataupu e fa’atatau i le fa’aaogaina o le tupe e fa’atau ai ta’avale e aunoa ma se fa’atanaga a le Fono, lea fo’i na vavao ai afioga i Senatoa i le aso Tofi na te’a nei.

 

O le mataupu e fa’atatau i le fa’aaogaina o le tupe lenei, na fesiligia i le taimi o le paketi a le Ofisa o Leoleo ma le Komiti Soofa’atasi o le Paketi a le Fono Faitulafono.

 

Na fesiligia e le afioga a Magalei Logovi’i le tofa Le’i, pe na fa’afefea ona fa’atupe le fa’atauina o ta’avale fou e lua a le Ofisa o Leoleo, ae na fa’amanino e Le’i e fa’apea, sa fa’atupe mai i le teugatupe o lo o maua mai i le ta’i $10, lea o lo o maua mai i fa’asalaga a tagata ave ta’avale o lo o totogi i le fa’amasinoga.

 

E le i toe talanoaina i le taimi o le iloiloga a le Paketi le mataupu lenei. Ae ina ua oo i le tauaofiaga a le maota maualuga, na tula’i ai loa le afioga a Magalei ma ia fa’amanino le mataupu lea, ina ua manino i sailiiliga a le Komiti, o le fa’aaogaina e le Ofisa o Leoleo o le tupe e aumai i le teugatupe o loo maua mai i le ta’i $10 o loo totogi i le Fale Fa’amasinoga, e tatau ona fa’ataga muamua atu e le Fono lona fa’asoasoaina ona fa’atoa mafai lea ona fa’aaoga.

 

Sa ia fa’amaninoina fo’i i luma o le maota e fa’apea - o fa’amatalaga ua ia maua - ua toe fuafua fo’i le Ofisa o Leoleo mo le toe fa’atauina o isi a latou ta’avale fou - e fa’aaoga i ai le teugatupe lava lea.

 

Ae ona o le tulaga e pei ona manino i le tulafono, na talosagaina ai loa e Magalei le tatau lea ona silasila toto’a i ai le maota ina ia mautinoa, e le toe tula’i mai le fa’aletonu lenei i le lumana’i.

 

Na avea felafolafoaiga a afioga i Senatoa i le talanoaina o lenei mataupu, ma itu na faia ai loa se malologa le tumau a le maota, ae sasa’a le fa’autaga a afioga i Senatoa e fa’atatau i lenei lava mataupu, atoa ai ma le valaau o le loia fautua a le Senate ia Mitzie Jessop-Ta’ase e faitau le tulafono ina ia manino i ai le fa’afofoga a afioga i Senatoa.

 

Saunoa le sui peresetene o le maota, afioga Nuanuaolefeagaiga S. Nua, o ia fo’i lea na taitaia le tauaofiaga a le maota e fa’apea, o le tulafono e pei ona fesiligia e le o se tulafono fou. Ae foliga mai o lo o soli e ni isi o vaega a le malo i se auala e matua fa’atamala tele lava, ma o se mataupu e tatau ona tuuina atu i luma o le Fa’amasinoga.

 

Na lagolagoina e ni isi o afioga i ali’i Senatoa le fautuaga ina ia tu’uina atu le mataupu lenei i luma o le Fa’amasinoga.

 

Na taua e le afioga a Fa’amausili, o se tasi na malolo litaea mai i le Ofisa o Leoleo e fa’apea, ua leva ona i ai le tulafono, ae le o mulimuli ai le Ofisa o Leoleo. Sa ia taua fo’i le fa’aaoga e le Teutupe ma le Faatonu o le Ofisa o le Paketi o le malosi ua tuuina atu ia te i latou e faia ai fa’aiuga ina ia le amanaia ai le tulafono.

 

Na talosagaina e le afioga i le ali’i senatoa ia Muagututia M. Tauoa le tatau lea ona valaau faapitoa le Komesina o Leoleo ina ia oo atu mo sa latou feiloaiga, ina ia fa’amanino ai tulaga e pei ona atugalu i ai finagalo o afioga i Senatoa, ma mafai ai ona malamalama le atoaga o lenei mataupu. Na lagolagoina e le afioga a Tuiagamoa Tavai ma Magalei le tatau lea ona valaauina se iloiloga.

 

Saunoa Satele Galu Satele e fa’apea, afai e le taofia le fa’aletonu e pei ona tula’i mai, o le a fa’aauau pea ona tula’i mai i le lumana’i.

 

O le agaga o afioga i Senatoa e pei ona latou finauina ai lenei mataupu, e le o tete’e i le fa’atauina o ta’avale fou mo Leoleo, ae o lo o naunau i latou ina ia fai le mea amiotonu ma mulimuli i le tulafono.

Comment Here