Ads by Google Ads by Google

Onosa’i I Mea Tiga

Vaega: 129

 

Alo maia, o le a toe fa’aauau atu la tatou tala mo lenei aso. Ua toe taliu mai i fanua le malaga a Filipina ma lona to’alua o Roger, ae ua tu’u le tama o Ali’ioaiga e amata ona tiute e tautua ai i le Malo e ala i le Vaega’au.

 

O se fa’amavaega sa fai ma loimata lea fa’amavaega, peita’i, e tasi lava le manatu o Filipina, ia fai le mea ua loto i ai Ali’ioaiga, aua a fa’apea e fai le mea o lo’o mana’o  ia i ai, o lona uiga, e le taunu’u i se taunuga  manuia fuafua a si ana tama e to’atasi. O le ala fo’i lea, e le tele lava se tala a Roger, aua ua ia iloaina, sa le i i ai i tausaga ma aso e tele i le tausiga o lona atali’i, ua na o Filipina lava.

 

O se fiafiaga sili lea mo le aiga atoa, ae maise ai o Lilo ma Luisa, ua lagona e loto fiafia ina ua toe feiloa’i ma toe feva’aia’i. Ua uluola la aiga o le afioga i a Lilomaiva, ua fanafanau ma uluola, o fa’amanuiaga ia a le Ali’i mo Lilo, ona o lo’o tusi pea i fautuaga ma tima’iga a si ona tina o Malia a’o le i maliu.

 

“Lilo si a’u tama, o lea ua e tausia le aiga, ia tausi ma le alofa, ia tausi ma le filemu, ia e maua le loto tele i mea uma, ia e alofa i nai ou tuafafine o Filipina ma Luisa ma na i a la fanau, ma ia fa’amuamua i lou loto ma lou mafaufau le tausiga o Fa’afeagaiga, o lo’o ta’ase ma fa’afalelemalu ona o le Atua ma Lona finagalo, ona manuia lea o au taumafaiga uma,

 

“Ia e alofa i so’o se tagata o lo’o mo’omia se fesoasoani, fa’amafola atu i ai ou lima, ae ‘aua e te alofa fa’apito na o oe ma lau fanau, e leai Lilo, ia e tausi le filemu i totonu o le aiga, ona nonofo fealofani lea o fanau, o le mea sili lea ona taua,

 

“Ia fa’amafola atu ou lima i lea ua mo’omia le fesoasoani, ma ia e foa’i ma lou loto atoa, ona manuia lea o mea uma e te faia, o a fo’i uiga o Loleta, ia e fa’asa’osa’o mea uma, e i ai fo’i taimi sa ou tu’u atu ai ni fautuaga i lou tama ona o lo’u loto ita,

 

“Lilo, e le manuia ia faiga, ae o le tina na te talia ma le onosa’i mea uma, aemaise ai o le tu’u atu o fautuaga lelei i le tama o le aiga, o se tina lea ua sili ona lelei ma fa’aoaina e le Ali’i i manatu ma mafaufauga lelei e manuia ai aiga ma maua ai le nonofo fealofani, Lilo, si a’u tama, e le o se faiva e faigofie, o le tausiga fo’i o le aiga, e le faigofie, ae ia e loto tele, ia e talia ma le onosa’i mea tiga  uma, ona foa’i mai lea e le Atua manatu ma mafaufauga lelei ia te oe e fa’afoe ai mea uma o le aiga.”

 

Fai mai, o lea ua toe fa’asolosolo nei i ai mafaufauga o Lilo, ina ua tu’umuli le fa’amalamalamaga a le Faifeau, lea na o’o ane ma le matai o lo latou aiga. Ua lagona le loto fa’afetai o Lilo i le Atua i lea taimi, aua o le a le aoga e maua ai mea uma, a lea ua tali mai le Ali’i, o le a avea si ona afafine la’ititi o Onosa’iimeatiga, e fai ma taulaga mo le Ali’i, e ala i Lana galuega.

 

O lea la ua fa’ailoa nei e Lilo ma Loleta i a Filipina ma lona to’alua, ma o lea fo’i o lo’o au ai Luisa ma si ona to’alua o Vesi, fai mai, a fai fai tala, ua fetagisi, o loimata o le fiafia ma le olioli. A’o le taimi lea, o lo’o fealua’i Onosa’iimeatiga ma tilotilo ane i si ona tama ma lona tina, fa’apea si ona aiga ua potopoto nei.

 

Fai mai le tala, na muamua lava maua le feiloa’iga a le Faifeau, ma le Fa’afeagaiga o lo’o tausia le nu’u, ma na folasia ai loa i malae le mana’oga o le Faifeau, o lea la ua mafua ai ona o’o ane i le maota o Lilomaiava ma lona aiga, ona o lona manatu ua talafeagai Onosa’iimeatiga mo le galuega.

 

E faia pea...