To’atele aufai pisinisi ua fesoota’i i sui o le Fono mo se fesoasoani


Sui ni isi o le aufai pisinisi sa auai i le iloiloga a le maota o sui i le vaiaso na te’a nei, i le talanoaina o le pili a le faigamalo e fa’aee ai le lafoga e 1% mo pisinisi. [ata AF]
ausage@samoanews.com

A o fa’agasolo ai iloiloga a le Fono Faitulafono i le taimi nei, e talanoa ma iloilo ai lafoga eseese ua fa’aulu e le faigamalo a Lolo ma Lemanu e aofia ai le lafoga e 1% mo pisinisi, ma le fa’amoemoe ina ia maua ai se tupe fa’aopoopo mo le faigamalo, ua fa’amaonia mai ai le fesootai atu o ni isi o le aufai pisinisi i afioga i Senatoa ma Faipule, e talosagaina ai se fesoasoani i tulaga o lafoga ua fuafua le malo e fa’aee i pisinisi ma oloa.

 

O lea fesoasoani e pei ona taua e ni isi o afioga i Senatoa ma Faipule i le Samoa News i le vaiaso na te’a nei, o le toe silasila toto’a lea i tulaga talafeagai o nei lafoga, ma le gafatia e le atunu’u lautele pe a fa’atusatusa i le tau o le soifuaga o lo o i ai.

 

O auala o lo o fa’aaoga e ni isi o le aufai pisinisi e fa’aoo atu ai a latou talosaga i afioga i Senatoa ma Faipule, e aofia ai tusi o lo o tusia ma tufatufaina atu, atoa ai ma fesootaiga i luga o imeli.

 

Na taua e ni isi o le aufai pisinisi le tulaga pagatia o le a i ai tagata fa’atau, pe afai ae pasia e le Fono Faitulafono lafoga eseese e pei ona fa’ataoto e le faigamalo. O le taimi e pasia ai lafoga nei ma fa’aee atu i le aufai pisinisi, ona fa’aopoopo lea e le aufai pisinisi i luga o le tau o oloa ma a’afia ai tagata fa’atau.

 

O lagona fo’i ia na fa’aalia e ni isi o Senatoa ma Faipule i le taimi o iloiloga e fesiligia ai lafoga fa’ae’e a le malo.

 

E pei ona molimauina i soo se taimi o iloiloga a le maota o sui i le 2 vaiaso talu ai, e le o misi lava le auai o ni isi o sui o le aufai pisinisi, e fa’afofoga i taualumaga o iloiloga taitasi, atoa ai ma lo latou fia fa’afofoga i le itu o lo o aga’i i ai finagalo fa’aalia o afioga i Faipule.

 

Na taua e se tasi o Tina faipisinisi i le atunu’u e fa’apea, e ui i le laititi o lana pisinisi ma tau fa’aolaola, na te lagolagoina lava le agaga o le malo ina ia fa’aee ni lafoga, peita’i, e le o le maualuga lea o le lafoga e talitonu o ia e tatau ona fa’ae’e e le malo, ae tatau ona fuafua le lafoga i le malosi e gafatia e pisinisi.

 

Mo se fa’ata’ita’iga o le lafoga o le 1% lea ua fuafua mo pisinisi, e le lagolagoina e lona tagata faipisinisi lea lafoga.

 

Mo le lafoga o oloa e 7%, i lona talitonuga ua fai si maualuga, ae tatau ona tuu mai i lalo i le 2% e amata atu ai.

 

O le to’atele o le aufai pisinisi o lo o latou fesiligia si’itaga i tau o uta i luga o le Uafu, atoa ai ma le a’afiaga ua molimauina e ni isi o le atunu’u fa’atau, ona o tau fou ua fa’aee i ni isi o oloa talu ona fa’amamalu totogi o masini e su’e ai uta mai fafo.

 

E ui o le agaga o le tulafono e pei ona taua e sui o le Komiti o le Tupe a le malo, ina ia mafai ai e pisinisi latou te le o totogiina i le malo le lafoga pito maualalo ona totogi lea lafoga, peita’i na taua e ni isi o le aufai pisinisi e fa’apea, o le lafoga lenei, o le a a’afia atu ai ma pisinisi o lo o fa’amaoni lava i latou e fa’ailoa a latou tupe maua i le fa’aiuga o le tausaga, aemaise lava pe afai e uma ane le tausaga e leai se tupe fa’asili e maua, lona uiga o le a fa’amalosi lava ona totogi ona o le tulafono e pei ona fuafuaina e le malo.

 

O popolega fo’i na e pei ona fa’aalia e ni isi o afioga i Faipule i le taimi na fesiligia ai tulafono tupe a le malo i le vaiaso na te’a nei, ina ne’i avea le naunau o le malo e fa’aee lenei lafoga ina ia maua ai pisinisi e le o fa’amaoni i le totogiina o le lafoga, ma auala e a’afia atu ai fua ma pisinisi o lo o fa’amaoni i latou.

 

O le la’asaga lona lua o iloiloga a le Senate ma le Maota o Sui o lo o fa’agasolo mo le lafoga e 1% o pisinisi, o le valaauina lea o se iloiloga ma sui o le aufai pisinisi i le atunu’u, mo le fa’ailoaina atu o so latou lagona e tusa ai o lenei tulafono.

Comment Here