Onosa’i I Mea Tiga

Vaega: 127

 

Alo maia, o le a toe fa’aauaua atu la tatou tala. Fai mai ua matutua le fanau a Lilo ma Loleta, o lea fo’i ua fai aiga teine matutua o Mataniufeagamaleata ma le teine o Ataataotaulelei, o lo’o totoe ai nei la le tama’ita’i o Alofaiso’osetasi, le tama’ita’i o Onosa’iimeatiga ma le tama Tiaseu.

 

Fai mai le tala, ua alu nei le malaga a Roger, Filipina ma le la tama o Ali’ioaiga e momoli Ali’ioaiga i le nofoaga o le a galue ai, ae maise fo’i se i feiloa’i ma uso o lona tama. O le mana’oga lea o le toeaina o Roger, ia feiloa’i ona uso i si ona atali’i, aua ua maliliu uma o latou matua.

 

Fai mai le tala, ina ua alu le malaga a Filipina ma lona aiga, e le matu loimata o le lo’omatua, ua pei ua agaleaga i si ona tuagane ma si ona uso ae maise o tamaiti. Ua fa’atoa va’ai lea o Filipina i se lalolagi ua sili ona tele ma mata’utia, aua ua tu lau’ele’ele nei le va’alele i Kalefonia, ae na iloa lelei lava e lana tama o Ali’ioaiga le pala’ai o lona tina, fai mai, e le mamulu ‘ese le lima o lona tama.

 

E alu lava le malaga, ae e viga lava i lana tama, e toe fo’i i Samoa, ae ua ‘ata Ali’ioaiga ma fa’amatala i lona tama. Ua a’apa ane nei Roger ma fusi atu si ona to’alua i lea taimi, ae ua na o le ‘ata o Ali’ioaiga ma fa’apea ane i lona tina, “Mama, se pei a oe e te le i ti’eti’e i se solofanua a’o e la’ititi.” Ua ‘ata le lo’omatua ma fa’apea ane, “Ali’ioaiga, ia fa’alogo lelei mai lava oe, e mo’i lava sa ou ti’eti’e i le solofanua a si o’u tama, ae sa lagona lava le filemu o lo’u loto, a’o lenei mea, oka, oka e, ua te le iloa fa’amatala, ua matua’i tumu lalo nei.”

 

Fai mai, e tau fa’alala solo taliga o si toeaina o Roger, ae ua alu fa’asolo atoa le fa’aSamoa a Filipina ma lana tama o Ali’ioaiga. E tau fesilisili lava Roger i lona atali’i, po’o a tala a lona tina o lo’o fai i lea taimi ma lea taimi.

 

I le va’ai a Filipina i Amerika, aua fa’atoa tuvae lea o le lo’omatua i Amerika, fai mai, o se va’aiga ua sili ona matagofie i le va’ai, ua pei ua o’o i se isi paneta ‘ese. Ua toe mafaufau mai le lo’omatua i Samoa, ma fa’amautu ai loa i lona mafaufau, e sili lava Samoa, o se atunu’u e filemu ona tagata, o se atunu’u fo’i, e ui ina o lo’o fa’agasolo pea ona suiga, ae e sili lava Samoa i a te ia.

 

Se i o tatou asia le fa’amuli a Lilo ma Loleta, aemaise o Vesi ma Lusia ma le aiga atoa po’o a mai. Fai mai,  ina ua tu’ua e Filipina le aiga, o se fa’alogona gaogao ua o’o nei i a Lilomaiava, ona fai mai le tala, e ‘ese le auau o le tama i si ona tuafafine. E fa’apea uiga o Lilo i lona tuafafine o Luisa, e leai se mea e fa’aletonu ia Lilo, i le tausiga o ona tuafafine.

 

O lo’o taulamua pea i le loto o Lilo ia fautuaga a si ona tina, ia alofa ma ia tausi i ona tuafafine, o ona manuia ia, ma o lona malosi fo’i lea i le tausiga o le aiga. O lea lava la e tausi pea i ai Lilo i fautuaga ia a lona tina o Malia. Na iloa lelei e Luisa uiga ia o lona tuagane, ma ua fai lava ma alu ane i le fale o Lilo ma Loleta latou te talatalanoa ai ma fa’atali mai ai se vala’au mai a Filipina.

 

Ua o’o i se tasi aso, a’o fai fo’i le talatalanoaga a Lilo ma lona tuafafine o Luisa ma Loleta, fai mai, na fa’ate’ia ina ua tatagi le telefoni. Ua tu a’e nei i luga Loleta ma savali atu ua tali, “Filipina, o a mai outou, o a mai outou.”

 

E faia pea...

Comment Here