Tele fesili Fa’amasinoga fa’asaga i se ali’i overstayer o loo loka toese


[ata: foa'i]
ausage@samoanews.com

O le itula e 9:00 i le taeao nei lea ua fa’atulaga e molimau ai le Pulesili o le Ofisa o Femalagaaiga a le malo i luma o le Fa’amasinoga, mo le tu’uina atu o le tali i le fesili a le fa’amasinoga lea na fa’atula’i i le vaiaso na te’a nei, i le mafua’aga o le i ai pea o se ali’i mai Samoa i totonu o le teritori ae ua mae’a le pemita e 30 aso na ulufale mai ai i le atunu’u.

 

O le ali’i o Joeita Fa’aaliga lea na fa’asala e le fa’amasinoga maualuga i le toese i Tafuna mo le umi e 28 masina, ina ua ta’usala o ia i le moliaga o le talepe fale i le tulaga muamua i le 2013, na fa’atulaga e toe fofogaina le isi ana fa’asalaga i le aso Faraile na te’a nei, ina ua toe ta’usala fo’i o ia e le fa’amasinoga maualuga i le moliaga o le sola ese mai le toese i le tausaga na te’a nei ao taofia ai o ia.

 

O lana solaaga lea na ia fao fa’amalosi mai ai se ato tupe a se fafine sa nofo i totonu o se ta’avale, i luma o le Ofisa o le Pulega o le Eletise ma le Suavai (ASPA) i Tafuna i le po o le aso 30 Iuni 2016.

 

O fa’amaumauga o lo o i luma o le Fa’amasinoga, o Fa’aaliga na ulufale mai i se pemita e 30 aso i le fa’aiuga o le tausaga e 2012, ma nofo fa’asolitulafono ai lava o ia i le atunu’u seia oo mai i le taimi na ia fa’atinoina ai le ulua’i solitulafono na ta’usala ai o ia i le amataga o le 2013.

 

O le mataupu e fa’atatau i le fa’aauau ai pea lea ona aumau o ia i le atunu’u e ui ua leva ona mae’a le pemita e 30 aso na malaga mai ai, na mafua ai loa ona fesili le afioga i le ali’i fa’amasino sili ia Michael Kruse i le Pulesili o le Ofisa Fa’anofovaavaaia a le Fa’amasinoga, pe na maua mai se tali mai le Ofisa o Femalagaaiga e fa’atatau i le mafua’aga o le i ai pea o Fa’aaliga i le atunu’u e ui ua mae’a le pemita na malaga mai ai.

 

Ae ina ua fa’aalia e le Pulesili o le Ofisa Fa’anofovaavaaia le leai o se fa’amatalaga tusitusia na tu’uina mai i le Ofisa o Femalagaaiga e uiga i lenei mataupu, na vaaia ai loa le si’isi’i o le si’ufofoga o Kruse ma toe tolopo ai le tu’uina mai o se fa’asalaga a le fa’amasinoga fa’asaga ia Fa’aaliga i le taeao nei, se’i tali muamua e le Pulesili o le Ofisa o Femalagaaiga le fesili a le Fa’amasinoga, i le mafua’aga o le i ai pea o le ua molia i le atunu’u ae ua mae’a le pemita na malaga mai ai.

 

Saunoa Kruse e fa’apea, o lo o maitauina pea fa’afitauli i le Ofisa o Femalagaaiga a le atunu’u, ma ua atagia mai ai le avea pea o nei fa’afitauli ma atugaluga i le Fa’amasinoga.

 

A o le i toe tolopo le mataupu a Fa’aaliga mo le taeao nei, na maua le avanoa o le ua molia e fa’aleo ai lana fa’atoesega e tusa ai o lana solitulafono sa faia, o le sola ese lea mai le toese i Tafuna a o taofia fa’apagota ai o ia.

 

Na taua e Fa’aaliga i le fa’amasinoga e fa’apea, mai tausaga o lo o fa’aauau ai pea ona taofia o ia i le toese, ua ia iloaina ai le leai o sona lumana’i e maua i le toese, ma ua tatau fo’i ona toe fo’i i lona aiga i Upolu e tausi ona matua ma saili se isi lumana’i aoga mo ia.

 

E le gata la sa ia fa’atoese i le Fa’amasinoga e tusa ai o lona solia o le tulafono, ae sa ia talosagaina le fa’amasinoga mo se avanoa e toe fa’afo’i atu ai o ia i lona aiga i Upolu e tausi ona matua.

 

Na talosaga le loia a le ua molia ia Douglasi Fiaui i le fa’amasinoga maualuga, mo se avanoa e fa’asala ai Fa’aaliga i se fa’asalaga fa’anofovaavaaia, ina ia maua ai le avanoa e toe fo’i atu ai o ia i lona aiga i Samoa.

 

O le molimau e to’atasi na valaauina e le malo i lenei iloiloga, o le susuga a Iuniasolua Tului Savusa, o i laua ia ma lona faletua na a’afia i le gaioiga sa faia e Fa’aaliga i le po na sola ai i tua mai le toese.

 

E pei ona taua i fa’amaumauga a le fa’amasinoga, e sola i tua mai le toese le ua molia, ae o le taimi lea o lo o avea ai o ia ma se tasi ua Fa’atuatuaina (trustee) e fesoasoani i Leoleo o le falepuipui, ma o le tofiga lea e pei ona saunoa le afioga i le ali’i fa’amasino sili, o le isi lea auala o lo o mafua ai ona sosola pagota i tua, ona o le avanoa o lo o maua e i latou ua taua o pagota ua fa’atuatuaina.

 

I le taimi na tula’i mai ai le fa’alavelave e pei ona a’afia ai Savusa ma lona faletua, sa paka ai le la ta’avale i luma o le Ofisa o le ASPA i Tafuna, ona aga’i atu lea o Savusa e fa’atau mai se la ‘cash power’ ae fa’amuli atu lona faletua i totonu o le ta’avale, e le i umi ona saofa’i Savusa e fa’atali le taimi e fa’atau ai le ‘cash power’, ae fa’afuase’i ona tamo’e atu lona faletua ma fa’ailoa atu ia te ia le se’i e le tagata o lana ato tupe, ma tamo’e ai loa Savusa e tuliloa le ua molia ma ia fa’afeso’ota’iina le Ofisa o Leoleo i le taimi lava lea mo se fesoasoani.

 

Na taua atili e Savusa i lana molimau e fa’apea, na taua e lona faletua ia te ia e fa’apea, a o saofa’i i totonu o le ta’avale, na fa’afuase’i ona savali atu le ua molia ma fa’anoi atu ia te ia, pe mafai ona fa’aaoga lana telefoni e vili ai sana taxi ona o lo o galo lana telefoni i le fale, ma, o le taimi na aapa atu ai lona faletua e aumai le telefoni na fa’afuase’i ai ona se’i e le ua molia le ato ma alu loa i le atoa.

 

Na taua e Savusa i le fa’amasinoga a’afiaga o le mafaufau ua a’afia ai lona faletua, ona o le mae’a ai o le fa’alavelave lea, na toe malaga ai loa o ia i Hawaii ma aumau ai e oo mai lava i le taimi nei, ua le toe fia oo mai o ia ona o le fefe i le fa’alavelave na tula’i mai ia te ia, aemaise ai o lea sa i ai se samala i le ua molia i le taimi na tula’i mai ai le fa’alavelave.

 

O le itula e 9:00 i le taeao nei lea ua fa’atulaga e fa’aauau ai le mataupu a Fa’aaliga i luma o le fa’amasinoga maualuga.

Comment Here