Ads by Google Ads by Google

Naunau Kamupani Suauu fa’aleleia latou sootaga ma Amerika Samoa

E tasi lava le auala ua mafua ai ona tatala le lala o le Kamupani Suauu mai Fiti, le Pacific Energy (PE) i Amerika Samoa, o le fa’aleleia atili lea o le latou sootaga ma le faigamalo a Amerika Samoa i so o se auala e o o i ai le latou tautua, e aofia ai ma le auina mai o le suau’u i le teritori, e pei ona taua e le Pulesili o le PE ia Richard Champion i se sauniga e tatala aloaia ai le latou lala fou i Utulei.

 

Na taua e Champion i lana saunoaga e fa’apea, o le faanaunauga autu a le PE o lo o i ai, ia oo atu i le faaiuga o le tausaga ua malosi ma lelei le aga’i mai o le suauu i Amerika Samoa, aua o le isi lea tulaga e mafai ona fesoasoani ai i le tamaoaiga o le malo.

 

I le fa tausaga talu ai e pei ona taua e Champion, na ausia ai e le PE ni isi o tulaga maualuluga i lana tautua i totonu o Fiti, e pei o le leai lea o ni fa’alavelave matuia sa tutupu ma a’afia ai ni isi o le aufaigaluega, leai ni fa’alavelave e pei o se suau’u e masa’a i luga o le sami, po o ni loli foi e feavea’iina tane suauu e aafia i ni faaalavelave matuia i luga o le alatele.

 

Na fa’aiu lana saunoaga i lona faamautuina i finagalo o le auvalaaulia, o le faamoemoe o le PE, ia faaauau pea ona avea atumotu o le Pasefika ma o latou aiga moni e aofia ai ma Amerika Samoa.

 

O se tatalo puupuu na saunia e Rev. Ioane Evagelia na valaauina e tatala aloaia ai lenei fa’amoemoe, lea fo’i na auai le afioga i le Lutena Kovana ia Lemanu Peleti Mauga faapea ai ma ni isi o sui o le kapeneta, sui o kamupani suauu laiti i le atunuu, faapea ai ma sui o le komiti faafoe o le suauu i le atunu’u.

 

O le ofisa autu a le PE i Utulei na fausia e le Komiti Fa’afoe e vaavaaia Tane Suauu i le atunuu, i lalo o se vaega tupe fesoasoani e $1.5 miliona, lea na fausia e le konekarate a le Paramount Constructions, i lalo o le taitaiga a le afioga Papalii Laulii, e pei ona taua e se sui o le kamupani ia Taulapapa Willie Sword.

 

O le agaga autu na mafua ai ona fausia le ofisa tutotonu lenei, e le gata ia maua ai le avanoa e faia ai aoaoga mo le aufaigaluea i soo se auala e faaleleia ai la latou tautua i le atunuu, ae mafai ai foi ona saunia auala e foia ai ni faafitauli e ono tutupu mai i le teritori i tulaga tau suauu, e pei o le masaa o se suauu i luga o le sami, po o se loli suauu foi ua aafia i se faalavelave i luga o le alatele.

 

O sui o le Komiti Fa’afoe o le Suauu sa auai i lenei sauniga taua e aofia ai Alo Dr. Paul Stevenson o le taitaifono, faapea ai le afioga Utu Abe Malae ma Mrs Amy Letuli e totino o le Komiti.

 

Na fa’afetaia e le afioga Lemanu le PE ona o le agaga e faaleleia atili la latou faiga paaga ma Amerika Samoa, e ala i le auina mai o le suauu i le teritori. Saunoa Lemanu e fa’apea, o le taua o le ofisa fou ua fausiaina, e mafai ai ona faatino ma faaleleia le tautua a le kamupani mo le atunuu atoa ma le malo.