Ads by Google Ads by Google

MUMUSU FAITIO NE’I LE TOE MAUA...

SO LATOU AVANOA

Na mumusu nisi o tina o loo aofia ai i le toa 70 o tagata matutua lea na faamuta i le aso ananafi le polokalame sa galulue ai i le Ofisa o Tagata Matutua, le TAOA e faailoa ni o latou finagalo e uiga i lenei mataupu ina ua fesiligia e le Samoa News, ona o le latou talitonuga, e mumusu e fai se tala ina ne’i avea ma itu e le toe maua ai ni a latou avanoa faalua i le isi polokalame fou o loo aga’i mai.

Ae na taua e isi tagata matutua o loo i ai i nisi o Toomaga a le polokalame, e leai se mea o le a taofia ai fua lo latou aia e faaleo ai o latou manatu, ona o lea ua latou mautinoa e le toe i ai se isi polokalame e agavaa ai i latou.

Ae ui i le tala faanoanoa i le faamuta ai o le polokalame sa latou galulue ai, sa vaaia pea le laufofoga fiafia o nai tina ia o loo faamautu la latou Toomaga i le maketi fou i Fagatogo, e ala i le faatau atu lea o a latou galuega taulima ma fai le latou taaloga Bingo i taeao taitasi.

“E le mafai ona toe faia se isi a matou tala poo se faasea i le tulaga ua i ai le polokalame, ina nei le toe maua ai se isi avanoa mo i latou, aemaise ai foi, o loo tatala mai le avanoa mo soo se tasi o i latou e toe fia talosaga atu i le polokalame, ina ia oo atu i le Ofisa ma faatumu pepa,” o le saunoaga lea a Kalasa Matua, o ia lea o loo faauluulu i ai le Toomaga o loo faamautu i le maketi i Fagatogo.

Ae na taua e se tasi o tina matua mai le isi Toomaga, o le fuafuaga e faamuta ai lana auaunaga i le TAOA, o se tala faanoanoa lea mo ia, ona o se tasi lea o auala sa maua ai sina fesoasoani laititi mo si ona aiga.

“E ui lava e na o le tai 4 itula sa ou galue ai i le aso e tasi, ae sa mafai lava ona maua ai se fesoasoani mo a’u ma si o’u aiga, a’o lenei o le a faamuta le polokalame, ou te le iloa la poo fea o le a maua i ai se isi mapusaga,” o le tala lea a si tina matua lea e lei finagalo e faailoa lona suafa.

Na fesiligia o ia e le Samoa News pe moni o loo i ai le isi polokalame fou ua fuafua le TAOA e maua ai se isi galuega mo ia, ae na tali le tina lea, “O se tala faalata lena tala, e le toe maua ni a matou avanoa ona o loo i ai foi le isi lisi o tagata matutua o loo tau saili ni a latou galuega.”

Na taua e le tina lea, e tatau lava i le malo ona fesoasoani e tuu atu se talosaga i le feterale ina ia faaagafua aiaiga mo le polokalame, ae tatala pea le avanoa e faaauau ai ona latou galulue

E lei maua se fesootaiga ma le afioga i le Faatonusili o le TAOA ia Faafiti Tauanu’u e uiga i lenei mataupu, ona o loo malaga i fafo mo nisi o ana fonotaga, ae i se faamatalaga na tuuina mai e se tasi o le Ofisa sa ia taua ai e faapea, o le aso ananafi na faamuta ai le galuega ai latou sa maua avanoa i lalo o le polokalame o loo faatupe mai e le malo tele, e taua o le Title 5.

“O i latou ia ua faamuta a latou galuega, o le ulua’i toa 70 lea ua atoa masina tai 48 sa faatapulaa e galulue ai mo le polokalame, ae o le a i ai foi isi o le a tofia e faatumu avanoa sa galulue ai i latou ua faamalolo,” o le faamatalaga lea a le tagata faigaluega e lei finagalo e faailoa lona suafa.

O le taimi nei, e silia i le toa 100 isi foi tagata matutua o loo i ai o latou suafa i le lisi faatalitali, e pei ona faamaonia mai e se sui o le TAOA e lei manao e faailoa lona igoa.

E ova i le 100 avanoa faigaluega sa mafai ona ofo atu e le TAOA, mo tama ma tina matutua i lalo o le polokalame lenei, ma o nisi o i latou o loo galulue i le lalagaina o mea taulima, galuega faa ofisa, galuega leoleo atoa ai ma galuega teu fale.

Na taua e le tagata faigaluega lea, ao lei galulue nisi o tama ma tina matutua i lalo o le polokalame lea, sa na o le nonofo lava i le fale e le’i faigaluega, ma o se tasi lea o itu o loo taumafai ai se talosaga a le TAOA i le malo tele, mo se avanoa e faaauau ai pea ona galulue i latou nei, ina ia agavaa ai i latou i faamanuiaga o le Saogalemu.

Na taua e le isi tina o loo aofia ai o ia i le vaega lea ua faamalolo, o le a taumafai e saili nisi galuega i totonu o lona aiga e faaalu i ai lona taimi, ma tau saili ai se isi alagatupe mo lona aiga, e pei o le lalagaina lea o mea taulima ma la’u e faatau.