Ads by Google Ads by Google

MUA LE SATANI TUUGA FAUTASI MUAMUA

O ai o le a sola ma le siaumupini tuuga fautasi 2012?

O le sola ai o le Sa o le Satani mai le afioaga o Nuuuli ma le mua o le ulua’i tuuga fautasi o le fu’a o lenei tausaga lea na faia i le faaiuga o le vaiaso na te’a nei, ua tulai mai ai loa se fesili tele i finagalo o le au matemate o le atunuu, poo ai o le a sola ma le siamupini o tuuga fautasi o lenei tausaga.

O le tuuga i le faaiuga o le vaiaso na te’a nei na faamanino ai e le Satani nisi o manatunatuga na nunumi i mafaufau o le to’atele, ina ua maua le avanoa o le Satani e motu ese mai ai ina ua faatoa amata le tuuga, ma sau ai lava  seia oo mai i le tini.

O le Aeto mai Pago Pago na mauaina le tulaga lua, o le Fuao mai Vatia i le tulaga tolu, Matasaua mai Manu’a i le tulaga fa, Iseula mai Fagatogo i le tulaga lima, Samoana Sharks i le tulaga ono, Fetu o le Afiafi mai Fagaalu i le tulaga fitu, Fealofani Samoa III mai Fagasa i le tulaga 8, ma le Paepaeulupoo mai Aua i le tulaga iva.

O se tuuga na matua faateia ai le to’atele, ina ua finau mai lava le Satani mo le tulaga muamua i ni nai minute talu ona amata mai le tuuga, seia oo mai lava i le tini o loo tumau pea i le tulaga muamua.

E tusa ai ma faasalalauga na tuuina mai i luga o le alaata a le KVZKTV, e le’i faapaina le fana a  le komiti ae ua tau fai tulioso mai va’a, ma le toe mafai ai lava ona toe taofi ae ua faaauau mai ai loa le tuuga, peitai ina ua maea le tuuga sa toe faamanino mai ai e le taitai komiti o le tuuga fautasi ia Tusi Suiaunoa e faapea, sa lelei lava le amataina mai o le tuuga e le’i i ai foi se faaletonu na tulai mai e pei ona taua.

E tusa ai ma le faaiuga sa faia e le komiti ma kapeteni o fautasi uma ua lautogia mo le tuuga i lenei tausaga, o le taeao nei o le a faataunuuina ai le tuuga lona lua o le sisiga fu’a, lea o le a tutu’u ai vaa e tolu na pito i tua o le tuuga sa faia i le aso Toona’i na te’a nei, faatasi ai ma le sa a le afioaga o Fagaalu e sailia ai le tu 8 e oo atu i le 11, ae o vaa e ono sa pito i luga i le tuuga muamua, o le a tuu faatasi ma le fautasi o le Tolotolo o le Tama Uli mai Salelologa i Savaii i le tuuga faaiu i le aso Lulu o le vaiaso nei, ma sailia ai loa le siamupini o lenei tausaga.

Ae i le polokalame o le fu’a lea ua tuuina mai, o loo taua mai ai le toe tutu’u uma o fautasi e 11 i le tuuga i le aso Lulu o le vaiaso nei.

E le’i toe maua mai se isi fesootaiga mai le komiti o tuuga fautasi i le taimi na tusia ai lenei ripoti, pe o le tulaga sa’o lea o le a i ai le tuuga pe o loo tumau lava i le faaiuga tuai ua uma ona pasia, o le tuuga lona lua e tatau ona faia i le aoauli nei.

O se tasi o fautasi na faateia ai le toatele o le Sa a le Fealofani Samoa III mai Fagasa, lea na tulaga 8 i le tuuga muamua na te’a nei, ae o tausaga uma lava e maea ai se vaa fou a le afioaga o Fagasa, e tatau lava ona mua.

O fautasi ia o loo taua mai i le polokalame o le a aofia i le tuuga i le aso Lulu o le vaiaso nei e aofia ai le Paepaeulupoo, Aeto, Matasaua, Satani I, Fealofani Samoa, Iseulaolemoana, Fuao, Fetu o le Afiafi I ma le II, Samoana High School Sharks ma le Tolotolo o le Tama Uli.