Ads by Google Ads by Google

Mu se Vaega LBJ - Latalata Fale’aiga

O le ta tonu o le 12:39 ae fa’ate’ia le to’atele o i latou sa tausami latou ‘aiga o le aoauli i totonu o le Fale’aiga o le Falema’i i le tamo’e mai i totonu o se tina ma alaga  “Tu’u uma a outou mea’ai ma a outou laulau, fa’amolemole ae o ese atu mai le nofoaga atoa lenei, ona ua sasao le afi i totonu o le ogaumu.”

E le’i toe i ai nisi na fa’atali, ae ua talia le vala’au ma usita’i, aua e le fa’atali le tane kesi se’i ma’ona se tasi.

O nai matua ua feoa’i i nofoa fa’ata’avalevale, na vave tapena ese mai le nofoaga o le fale’aiga, ae toso e latou fanau aga’i i le pito i luma. Ua taofi fo’i le laina sa mae’a asu a latou mea’ai, ua toe tu’u, ae o ese mai fa’avave, peita’i, o le tusitala sa i ai, ua maua le avanoa e molimauina ai lea fo’i mea ua tupu, ma ua tapu’e ata o i latou ua fa’anatinati mai i fafo mai potu uma o le falema’i.

Ona o le umukuka o le isi lea itu o le falema’i e soso’o tonu lava ma le potu o le Boiler lea ua sasao ai le afi, sa vave ona avea’i mai i tagata i le falea’iga ma le aufaigaluega ina ia o ese mai totonu o le umukuka.

O nisi o le aufaigaluega i le fale ta lavalava a le falema’i, o i latou ia sa latou fa’avave ane e ta’i le fa’aga’au mai paipa vai tetele a le tineimu o i ai lava i autafa o le fale’aiga, ma ua vave ai ona fa’ao’o le vai e tineia ai le afi na sasao ane i luga.

E le’i va’aia tele se tau asuasu, aua sa sasao le afi, ma sa le mafai fo’i ona fa’atagaina se tasi e toe fa’alatalata atu i le nofoaga o le ogaumu lea. Na va’aia le taufetuli mai i fafo o tagata sa i totonu o potu e tulata i le fale’aiga ae ua le ‘aumaia i fafo ma’i. Ona o le boiler e tupito i le isi itu pito i le auvai o le falema’i, sa na’o le potu fa’i nifo sa fa’atonuina tagata sa tatali talavai e o ese mai ma aga’i atu i luga i le pakaga o ta’avale.

E tusa ai ma se tala a se tasi o tina sa tatali lana talavai, “Ia e sili lava le usita’i, i te’i ua fa’atotope atu se tasi i lea fo’i mu ona o le fa’alogogata, ae o lea na sau e fai le talavai nifo!”

Na va’aia le galulue fa’atasi o tina o le potu taga lavalava, aufaigaluega a le Umukuka, o leoleo o le falema’i, ina ia vave ma lelei ona fa’ataoto le fa’aga’au mo le suavai e tineia ai le mu. E ui ina e tatau ona o ese mai le to’atele mai lea nofoaga ua sasao ai le afi, ae ua le o ese tina nei, ae taulamua i le taumafaiga e tape le sasao a’e o le boiler, ia mafai ona toe fa’aauau galuega mo le maota gasegase i le latou fo’i matata e ao ina fa’atino.

Ina ua mae’a ua tau toe to’afilemu mai lea tulaga, sa le toe fo’i le to’atele sa i fale’aiga, ae ua fa’asasa’o loa e toe saili se isi fale’aiga mo le aoauli.