E lua loli fuimu tetele ma taavale leoleo e lima na tali atu i le faalavelave lea na faatamaia ai se vaega o se maota a se aiga i se afi, i luma tonu o le paka i Onesosopo i le taeao ananafi.Pe tusa o le itula e 11:00 taeao na tulai mai ai lea faalavelave ma logoina ai loa le Ofisa o Leoleo mo se fesoasoani.E tusia lenei ripoti e le’i mafai ona faamaonia mai e le Vaega Fuimu o le Ofisa o Leoleo le mafuaaga o le mu, ona o lo o faaauau pea a latou suesuega e tusa ai o le faalavelave na tulai mai.Ae tusa ai ma ni faamatalaga na tuuina mai e ni isi o molimau i le Samoa News na taua ai, o le afi na amata mai i le fogafale pito i luga o le fale, ma faafesootai ai e le aiga le Vaega Fuimu mo se fesoasoani.Na taua e se sui o le aiga e faapea, e tulai mai le mu ae o lo o faagasolo galuega mo le toe faafouina o le fogafale i luga o le latou fale, lea e tusa ma le $10,000 le tau atoa o le galuega na amata mai i le amataga o le masina na te’a nei.Na taua e ni isi o le aiga le faateia o i latou ina ua latou vaaia le asu uliuli e sau mai le pito i luga o le fale, ma latou vaaia ai le sasao o le afi i le pito i luga.O le fogafale i lalo e nonofo ai le ulugalii e ana le fale ae o le fogafale i luga e nonofo ai le la tama teine, o lona toalua ma le la fanau e toatolu, ma o le itu e laki ai, e leai se isi na manu’a pe na maimau se soifua ona o lenei faalavelave.Na taua e se sui o le aiga e faapea, e tasi le taavale fuimu na muamua taunuu ma amata loa le galuega i le fuiina o le mu, ae silia i le afa itula ae taunuu le loli lona lua.E ui sa poloka le auala peitai e le i umi se taimi na poloka ai ae toe kilia le ala i le tautua sa mafai ona ofoina atu e malu o le malo, ao molimauina ai le toulu malosi o uaga i le aso ananafi.O se taimi o i luma o le a mafai ona tuuina mai ai se ripoti mai le Ofisa o Leoleo e tusa ai o le mafuaaga o lenei faalavelave.