Na fa’afetaia e Senatoa ma Faipule se lagona na faailoa e le Fa’atonusili o le Matagaluega o le Soifua Maloloina i le vaiaso na te’a nei, i le leai lea o se fuafuaga a le matagaluega e fa’amalolo le silia i le to’a 100 tagata faigaluega o lo o totogi i lalo o se vaega tupe mai le feterale, lea na maua i ripoti o le a fa’amalolo i latou nei.

Saunoa le afioga i le Faatonusili ia Motusa T. Nua i luma o le komiti soofaatasi a le Fono e fa’apea, o le mataupu lea e vavao ai le atunu’u fai mai o le a fa’amalolo tagata faigaluega e lata i le to’a 200 a le Soifua Maloloina, e le sa’o, e le o i ai fo’i se agaga o le matagaluega e fa’amalolo alo ma fanau a le atunu’u o lo o galulue i le polokalame fou lea a le matagaluega.

O le vaega tupe lea e maua mai i le feterale o lo o fa’atino ai le polokalame o asiasiga i aiga (home visit) e pei ona saunoa Motusa, e to’a 163 i latou o lo o galulue ai i le taimi nei, e ui e na o le to’a 47 le aofa’i sa’o lava o tagata e tatau ona fa’a faigaluega, peita’i o le fa’afitauli, e le taitai lava le to’a 47 lea e fa’atinoina le galuega, o le mafua’aga le na manatu ai loa e fa’a faigaluega le isi to’atele e fesoasoani i le fa’atinoina o le galuega, ae totogi uma lava i lalo o le vaega tupe mai le feterale.

“O lo o galulue pea le matou matagaluega ma le vaega a le feterale o lo o fa’atupeina le polokalame, i le tau sailiina lea o se isi vaega tupe fa’aopoopo ina ia fa’aauau ai pea le polokalame mo le lumana’i, ae le o i ai ni tagata faigaluega ua fa’amalolo,” o le saunoaga lea a Motusa.

Na fa’afetaia e sui o le Komiti Soofaatasi a le Fono le ali’i Fa’atonusili, e tusa ai o galuega lelei e tele o lo o fa’atinoina i le atunu’u, e le gata o asiasiga mo tagata matutua i nu’u ma aiga, ae faapea fo’i i isi tautua o lo o maua ai e le atunu’u le fesoasoani.

O le tautua mo Manu’a, o le isi lea faafitauli na taua e Faipule mai le Itumalo o lo o fetaia’i pea ma Manu’a i le tele o taimi, e le gata e le lava vailaau ae le lava fo’i vaega e fa’atino ai le auaunaga e pei o ta’avale ma masini.

Na fesili le ali’i faipule ia Vesi T. Fautanu ia Motusa po o i ai se fuafuaga e faaopoopo ni isi foma’i ma ni ta’avale mo Manu’a, ae na saunoa le ali’i fa’atonu, o loo vaavaai lava i ai i le fa’aleleia atili o tulaga e pei ona fesiligia, ae mo le taimi nei, o lo o tulaga lelei pea lava le tautua mo Manu’a.

“O lo o faaauau pea lava le polokalame lea e auina mai ai gasegase mai Manu’a e togafiti i le falema’i i Fagaalu, o isi nei o tautua fa’aaua pea a le matagaluega mo le itumalo i Manu’a,” o le saunoaga lea a Motusa.

I le tulaga o le tatalaina o se lala o le Fale Faamama Toto i Manu’a, na saunoa ai Motusa e fa’apea, o lo o faia pea feutanaiga ma se tasi o kamupani tua mo le fa’atinoina o lea auaunaga i Manu’a, pau le faafitauli, e fai lava si taugata o le tupe e fa’atino ai, peita’i o lo o i ai le faanaunauga ia tatala pea lea tautua mo Manu’a

Na fesili Magalei Logovi’i ia Motusa po o ia mauaina le totogi e $73,000 o lo o fa’ailoa mai i le paketi a lana matagaluega, na tali le ali’i fa’atonu e leai.

O le isi lea fa’afitauli e pei ona maitauina e le Fonno, e le o Fa’atonusili uma o lo o aofia i le si’itaga o totogi e pei ona faia e le ali’i kovana.