Na tapunia le Polokalama o Pesepesega o le Kerisimasi a le malo i le po o le Aso Faraile na te’a nei, i le momoli aloaia mai o Faamanuiga o le Kerisimasi ma le Tausaga Fou mo le atunu’u atoa, e le afioga i le Lutena Kovana ia Faoa A. Sunia, lea na fai ma sui o le malo e saunoa i le tapunia o lea faamoemoe taua.

E le gata sa ia faafetaia matagaluega uma a le malo sa tofu sao mo lenei faamoemoe, ae sa ia momoli mai sa latou tuu alalo e tusa ai o se aga e lei tau tamalii i le silasila ma le tapuaiga a le atunuu, ao faafiafia le malo mo po e tolu i lana polokalame.

“Aua e te faitauina ni mea e lei atoatoa pe sa vaivai foi ona faatino, o a ni taga ua le faaaloalo i lau maimoaga le atunuu, faamagalo le malo ma ona tagata faigaluega, ae ia maua e Amerika Samoa uma se kerisimasi fiafia ma se tausaga fou manuia,” o isi ia vaega  o le saunoaga faaiu a le afioga i le Alii Faalagia.

Na felanulanuai faafiafiaga ma pese sa alo atu i ai le malo, mai lava i le po o le aso Lulu na tatala aloaia ai lenei faamoemoe, seia  oo atu i le po o le aso Faraile na tea nei ina ua tapunia.

Na molimauina i faafiafiaga uma a matagaluega ma ofisa eseese a le malo le momoli mai ai o le agaga o le kerisimasi ma le tausaga fou o lenei tausaga.

Na taua e Faoa i lana saunoaga faaiu le taua tele o le tofu sao o tagata uma i le faamatagofieina o lenei faamoemoe.

Sa ia taua, e ui i se naunau mai o le malo e faatino lana polokalame masani lenei, peitai e le mafai ona faataunuuina pe ana faapea e le lagolago i ai tagata faigaluega ma o latou taitai.

Na oo le saunoaga a le afioga i le alii lutena kovana i aiga ma uo ua afe moe la latou faigamalaga, ona o le malaga saua a le oti, lea ua mafua ai ona faavae aiga ma loimata, ao agai mai i le faamanatuina o taimi faaiu o lenei tausaga.

O lana fautuaga i fanau ma aiga, ia tausi mavaega na tuu mai e tuaa ua afe moe le faigamalaga, ina ia avea ma meaalofa sili mo le kerisimasi ma le tausaga fou i lenei tausaga.

“O lau faamafanafana i aiga ma uo ua motusia mafutaga ma matua, talia fautuaga sa tuu alalo mai ai tuaa, asoa i lou ua ma ia avea o lau meaalofa sili lena mo lenei kerisimasi, ia manatua a latou mavaega ma tausi i faataitaiga sa o latou tuuina mai,” o le saunoaga lea a Faoa.

O le po anapo na tatala aloaia ai le polokalama masani o Pesepesega o le Kerisimasi a le Vaega o le Arts Council, lea e maua ai le avanoa i au faafiafia mai ekalesia, autalavou, aoga faapea ai ma aufaipese e faaalia a latou taleni ma pesepesega mo le kerisimasi o lenei tausaga.

E silia i le 30 aufaafiafia ua lautogia mo lenei faamoemoe, ma ua faamoemoe e maea i le po o le aso Lua o le vaiaso nei lava.

Saunoa le faatonu o le Arts Counsil ia Leala Pili Elisara, o le agaga o lenei polokalame, ia mafai ona momoli mai e aufai pese eseese nei le agaga o le kerisimasi, ma ia faailoa mai e ala i taleni ma pesega.

Ao lei faataunuuina lenei faamoemoe, sa mafai ona asia ma pasia e le komiti pese a aufai pese taitasi o le a faafiafia mo po e tolu o lenei polokalame, ina ia mautinoa e o gatasi ma le autu o le faamoemoe.

O lenei foi polokalama o lo o tatala atu ai le avanoa i aiga ma uo ina ia agai mai latou te molimauina lenei faamoemoe taua.