I le aga’i atu ai i le lona tolu lenei o tausaga talu ona tatala le polokalame o lo o a’oa’oina ai le gagana Samoa i fanau aoga i le taimi o le tuuaga o aoga, ua molimauina ai le aoga o lenei polokalame mo fanau aoga, aemaise ai o le fesoasoani tele i le a’oa’oina lea o le gagana Samoa moni i fanau aoga laiti.

E 4 vaiaso lea ua fa’atulaga e le Ofisa o aoga a le malo e fa’ataunu’u ai mo le tausaga lona tolu lenei le polokalame o le Aoga Samoa i Afioaga (ASIA), lea o lo o fesoasoani ai susuga i Faifeau ma ni isi o matua i le fa’amautuina lea o le gagana i mafaufau o fanau aoga.

I se fonotaga sa faia i le vaiaso na te’a nei a le Ofisa o Aoga, susuga i Faifeau fa’apea ai le mamalu o matua o lo o fesoasoani i le aoaoina o fanau aoga i lenei polokalame, sa latou molimauina ai le tele o le fesoasoani o le polokalame mo fanau aoga.

Na taua e le susuga Rev. Iakopo Seumalo o Lauli’i e fa’apea, talu ona amataina mai lenei polokalame, ua molimauina le tele o le polokalame i fanau aoga a le latou nu’u, fa’apea ai fanau mai isi nu’u o lo o autova’a atu e auai i lenei aoga.

“O le tausaga na te’a nei, sa molimauina ai le tele o le fesoasoani o lenei polokalame i fanau aoga, o ni isi o fanau e vaivai i ni isi o mataupu e pei o le Numera ma le tusi lima fo’i, o isi tamaiti ua oo i le Vasega 5 ae o le Numera fa’atoa oo i le Vasega 2, peita’i o le suiga lea ua i ai, ua to’atele fanau ua fiafia i le gagana ma ua amata fo’i ona siitia lo latou iloa i auala o lo o aoaoina ai le gagana”, o le saunoaga lea a Rev. Seumalo.

Ae na taua e le susuga i le ali’i Faifeau ia Rev. Faataa Elesaro mai Petesa Tai e fa’apea, o ni isi o fanau o lo o auai i le latou polokalame, sa molimauina i le tausaga muamua le televave o le nanu atoa ai ma le tautala i le gagana fa’aperetania, ae vaivai tele i le tusitusi ma le faitau tusi, peita’i o le taimi nei, ua tele le suiga ua o o i ai lo latou silafia i le gagana Samoa.

Na taua e le Tina ia Sina Samau, o ia fo’i o se tasi o faiaoga mo le gagana Samoa talu mai le tausaga e 2014, o le isi fa’afitauli sa maitauina i fanau i le tausaga muamua o le polokalame, e le malamalama i latou i le fa’aaogaina sa’o o le gagana, ae ina ua mae’a le tausaga na te’a nei atoa ai ma le tausaga lenei, ua molimauina ai lo latou malamalama i le gagana.

E tusa ai ma faamaumauga mai le Ofisa o Aoga a le malo, e na o le 5 nofoaga sa mafai ona aoaoina ai fanau e to’a 615 ina ua fa’atoa tatalaina le polokalame a le ASIA i le tausaga e 2014, i le vai tuuaga tele o aoga a le fanau, peita’i o le tausaga na te’a nei, e le gata ua fa’aopoopo le aofa’i o nofoaga o lo o fa’atautaia ai aoaoga i le 9, ae ua si’itia fo’i le aofa’i o fanau aoga ua auai ma a’oa’oina i le polokalame i le aofaiga e to’a 1,223.

O le tausaga lenei e pei ona saunoa le Faatonusili o Aoga ia Vaitinasa Dr. Salu Hunkin-Finau, ua fa’aopoopo le aofa’i o nofoaga o fa’atinoina ai le aoaoina o le gagana i le 13, ae lei iloa tonu pe to’afia le aofa’i o fanau o le a lesitalaina o lenei tausaga.

Saunoa Vaitinasa e fa’apea, o le taua o le polokalame lenei, o le taumafai lea ina ia fesoasoani i fanau aoga ina ia malamalama i le latou lava gagana, ina ia fesoasoani ai ia latou suesuega i totonu o aoga.