“Leai ni nofoa ma ni laulau, pepe moli toe le ola ea malulu”

Na faafofoga ma le toto’a le afioga i le kovana sili ia Lolo Matalasi Moliga ao faailoa atu i ai e sui o Ofisa ma Aoga eseese i le motu o Ofu ma Olosega/Sili, ni isi o faafitauli o lo o fetaiai ma i latou mai le tele o tausaga, e aofia ai le leai o ni nofoa ma laulau e faatino ai galuega, pe moli toe le ola le ea malulu, ae o totonu i isi vaega o le ofisa e pupu solo, e foliga mai e le o se ofisa e ono tautua ai le mamalu o le atunuu.

E le o aofia ai i faafitauli nei le fiu e talosaga mai i Faatonusili o a latou Matagaluega ua mavae atu i manaoga ma mea e ao ona faaleleia, ae uma ane lava lea nofoaiga ma lea nofoaiga, e leai ma se mea e faia.

“E oo lava foi i se computer ma se initaneti, na pau le masini o lo o mafai ona matou faaaogaina o le ‘fax’ ae le mafai ona faia ai ni fesootaiga faainitaneti e pei ona i ai outou i Tutuila,” o le saunoaga lea a le faletua ia Eseta Papalii o lo o faauluulu i ai le Ofisa o Auaunaga ma Tautua Lautele i Ofu i le alii kovana, ao faafofoga le Faatonusili o lea Matagaluega, le tofa ia Taeaoafua Meki Solomona.

Na faailoa mai foi e Papalii i le Samoa News e faapea, o isi faaletonu o lo o feagai ma le latou ofisa o le le lava o tagata faigaluega e faatinoina le auaunaga i le Luanuu.

I le falemai i Ofu, o se tasi lea o nofoaga sa maitauina le tele o faafitauli o lo o fetaiai ma i latou i le taimi nei, e pei o le le lava o vailaau mo togafitiga, silia ma le tausaga o pe le ea malulu i totonu o potu e togafiti ai gasegase, atoa ai ma le le ola o moli i le tele o taimi.

“O lo o lava tagata faigaluega e faatinoina la matou tautua i le taimi nei, pau le tulaga o lo o manaomia e leai ni vailaau, e le mafai foi la ona togafiti gasegase pe a sulu mai, afai foi e taofia se gasegase i totonu o le falema’i, seiloga e tatala uma faamalama ma faamatala le faitotoa ona faatoa sau lea o se ea i totonu ona ua silia ma le tausaga o pe le ea malulu, ua fiu foi e talosaga e lei faia lava i ai se galuega,” o le saunoaga lea a se tasi o tamaitai faigaluega e faauluulu i ai le falemai i Ofu.

Na fa’ailoa mai i le sui o le Samoa News, ua silia ma le tolu masina talu ona pe moli, ae o le tausaga na tea nei na toeititi lava atoa le tausaga o fai ma motusia le eletise i totonu o potu e togafiti ai mai.

O totonu o le potu lea e taofia ai gasegase, e tolu moega o lo o i ai, ae o le faalo o le potu o lo o i ai se pu tele lava ua silia ma le tausaga talu ona i ai.

I le Aoga Tulaga Muamua i Ofu, o lo o manaomia le faaleleia o fale taele, ma o lea galuega o lo o galulue ai le Faalapotopotoga o le Eletise ma le Suavai (ASPA) atoa ai ma le Matagaluega o Galuega a le malo mo le faaleleia o ni isi o vaega o lo o faaletonu.

E faapena foi i le ofisa o le malae vaalele i Ofu, lea o lo o galue ai le afioga Leama Misiuaita, o lo o i ai foi manaoga e moomia le faaleleia e pei o le toe faafouina o totonu o le ofisa, tuu i ai ni laulau ma ni nofoa ma ia faigofie foi mo le tautuaina o le atunuu.

I le silia ai i le 28 tausaga o tautua Leama i le malae vaalele i Ofu, sa ia taua ai i le Samoa News e faapea, e manaomia le toe faaleleia o le ofisa atoa ai ma le malae vaalele, aua o le isi lea malae vaalele lelei mo feoaiga aemaise ai o le atinae o le turisi pe afai ae lelei ona toe fou.

Ua fautuaina e le alii kovana sili faatonusili o matagaluega o lo o tulai mai ai faaletonu nei i Ofu ma Olosega/Sili ina ia saili ni auala e faaleleia ai ofisa ma ia tali manaoga o ofisa nei

Saunoa le faatonusili o le Matagaluega o Auaunaga ma Tautua Lautele e faapea, e 10 nofoa ma laulau ua ia sauna e faaee i luga o le MV Sili i le isi ana malaga o le a sosoo ai nei mo le taliina lea o le manaoga o lo o tulai mai i le ofisa i Ofu.