Ads by Google Ads by Google

Molimau pagota na faataga latou e leoleo ona o i le faleoloa

O moliaga mamafa ta’i tolu ia ua molia ai alii leoleo o le toese e to’alua, o lo o faavae lea i luga o molimau a pagota o lo o taofia i le toese i Tafuna,.

O le Aso Faraile na te’a nei na taofia faapagota ai alii leoleo e toalua, o Rocky Tua ma Fiti Aina, ma tutula’i ai i luma o le Faamasinoga Faaitumalo i le taeao ananafi.

O lo o tuuaia Tua ma Aina i moliaga o le fesoasoani e faasosola pagota i tua, faataga pagota e sosola i tua, faapea ma le aafia i faiga faaalatua ao avea ma tagata faigaluega mo tagata lautele.

E tusa ai ma faamaumauga a le faamasinoga o lo o taua ai e faapea, o le suesuega faasaga i lenei mataupu na afua mai i se osofaiga a Leoleo Suesue o le Vaega a le CID sa faia i le toese i Tafuna i le aso 20 Iulai 2012 ma maua ai i totonu o se potu o lo o loka ai pagota ni fagupia.

Na maua foi i suesuega ni faamatalaga e faatatau i pagota o lo o tutuli e nisi o leoleo o le toese e faatau mai pia i faleoloa.

O le aso 23 o Iulai 2012 na tofia ai loa le alii leoleo suesue ia Det. Poutoa I’amanu Jr, na te suesueina lenei mataupu.

Na ta’ua i faamaumauga a le faamasinoga, le molimauina o le alii pagota o Tagaleoo, na alu e faatau i se faleoloa i le po o le aso 19 o Iulai 2012, ae o le aso na soso’o ai, na osofai ai e leoleo ia le toese  Ina ua suesueina lea alii pagota, sa ia ta’ua, na tu’uina atu e Tua ia te ia le fa’agana e alu ai e fai mai sana faatau i le faleoloa. 

Sa faailoa foi e le isi alii pagota o Ofoia i leoleo e faapea, na tuu atu e Tua ia te ia le ki o le sela, ma faatonu o ia e tatala le sela ina ia mafai ai ona alu Tagaleoo i le faleoloa e faatau mai pia, pepa faitelefoni, pepa keke ma apainu.

E faapena foi i le molimau a le alii pagota o Tei e pei ona taua i faamaumauga a le faamasinoga, o Tua sa fai lana faatonuga ia Tagaleoo e alu i le faleoloa e fai mai lana faatau,

O le tupe na faaaoga e fai mai ai le faatau e pei ona taua e Tei, na aumai i le isi pagota o Maosi Fualaau, ae sa nana i tua o le fale e fai ai lotu a pagota ia le faatau ma le faamoemoe e piki i se taimi.

O le alii pagota o Tei na pikia le faatau sa nana e Tagaleoo, ona ia avea lea o le pepa fai telefoni, pepa keke ma apainu ia Tua, ae o fagupia na faatonu o ia e Tua e taofi sei alu atu Fualaau.

Na taua e Tagaleoo e faapea, i le taimi lona lua na toe alu ai i le faleoloa, sa ia vaaia ai foi le isi pagota, o Raponi Sefo Siaulaiga, o lo o i ai i le faleoloa.  Ina ua fesiligia Siaulaiga, sa ia faamaonia ai le tuli o ia e Tua i le faleoloa, ae ua galo le taimi ma le aso na alu ai.

Sa taua foi e Tagaleoo le tuli o ia e le alii leoleo o Aina e faatau mai ni pia i le faleoloa e ui ua galo ia te ia le taimi ma le aso, pau le mea o lo o ia manatua, o Aina ma isi pagota na inu i pia na faatau mai.

O le faaiuga o le vaiaso nei lea ua faamoemoe e toe valaau ai mataupu a Tua ma Aina, e faatulaga ai le aso e faia ai le la ulua’i iloiloga i luma o le alii faamasino o John Ward II.

E ta’i $15,000 lea ua faatulaga e le faamasinoga e totogi ona faatoa mafai lea ona tatala i laua ua molia i tua mai le toese, ma o le taimi nei, o lo o taofia pea i laua i le toese sei vagana ua totogi tupe ua faatulaga atu e le faamasinoga.