Ads by Google Ads by Google

MOLIA: Sui na Taumafai e Fasiotia Obama

O le ali’i o Oscar Ortega lea ua molia nei ona ua mautinoa lava, sa ia taumafai e fana Obama i totonu o le Fale Pa’epa’e, peita’i, ua fa’ailoa mai e lona aiga, ua mae’a ona latou lipotia mai o ia lea, ua le o toe alu atu i le latou aiga.

O le masina o Novema 2011na molia ai Oscar, ina ua ia tafanaina le Fale Pa’epa’e ma lona mana’o ina ia fasiotia ai le ali’i peresetene o le Malo o Amerika, Barrack Hussein Obama.

O lenei ali’i e na’o le 21 tausaga o lona soifua, mai le setete o Idaho, e 17 moliga ua fa’asaga nei ia te ia i le fa’amasinoga, ma e aofia i nei moliga, le fa’aleagaina e lona sui o le Maota sili ona maualuga i le Iunaite Setete o Amerika, o le maota fo’i e alaalata’i ai le fa’aAo o lea Malo atoa, o se aseta maualuga lona tau a le malo o Amerika atoa, ae peita’i, ua ia manatu e fa’aleagaina ma toe fasiotia ai le peresetene o lona malo e fa’aaogaina ai se ‘au’upega malosi.

O ia lea ua foliga mai e fa’aletonu lona mafaufau ma ua tatau ai ona ia tula’i i luma o le fa’amasinoga, peita’i sa saisaitia mai lava o ia ina ua ia fa’ataunu’uina nei solitulafono e fa’asaga i le pulega a le faigamalo a le Malo tele.

I le taimi na ta fanaina ai e Oscar le fale pa’epa’e, sa i ai le susuga le Peresetene ma le faletua i Kalefonia, ae le’i i ai i le maota i lea taimi. Na saisaitia mai le ali’i o Ortega-Hernandez mai Pennsylvania ae le o Idaho i le tusa na’o ni nai aso lava talu mai ona mae’a faia e ia lea solitulafono i le lotoa o le Fale Pa’epa’e i le aso 11 Novema, 2011.

Na fa’ailoa e le loia o lo’o tula’i mo Oscar Ortega i le Associated Press, o lo’o ua fa’ailoa e Oscar, e tete’e o ia i ona moliga uma nei pe afai ae o’o i le taimi e tula’i ai i luma o le fa’amasinoga. I le taimi nei, e tauau o lona fa’asalaga e o’o lava i le olaga atoa i le falepuipui, ona o lana mea na fai.

I lona iloiloga amata ia Tesema, na fa’atonuina ai e le fa’amasino ina ia taofia o ia i le falepuipui e le mafai ona tatala i tua. Ua fa’ailoa mai fo’i e le vaega o leoleo su’esu’e i se latou fa’amaumauga mai le fa’atalanoaina o lenei ali’i, sa fesiligia ai se mafuaga o lo ua ia tafanaina ai le Maota pa’epa’e o le malo, ae fa’ailoa mai e ia, “O lo’o i ai lana misiona e ao ina faia mai le Atua, ia osofa’ia le Maota Pa’epa’e.”

E leai lava fo’i se mea e ono fa’apea ai i latou o lenei ali’i o se tasi o lo’o auai o se sui o ni fa’alapotopotoga fa’aitu’au e afua i lanu ma ituaiga o tagatanu’u. Ua mae’a fo’i ona fa’atonuina ni su’esu’ega i le mafaufau o Ortega pe mata o lo’o afaina lona mafaufau, e ala ai ona fa’apea ona manatu, ina ia le taofia ai o ia e fete’ena’i ai ma ala o le tulafono mo i latou e vaivai o latou mafaufau.

Ina ua mae’a ona tafanaina fa’alua le Maota Pa’epa’e, na maua e ali’i leoleo o le maota lea ni pulufane e lua i tafatafa tonu lava o le Ofisa Autu o le peresetene, o le itu lava lea o lo’o i ai ma le potu moe o le afioga le Peresetene o Amerika.

O le tasi o nei pulufana na tafanaina e Oscar na ta’ei ai le tioata pito mai fafo o le fa’amalamalama, peita’i o le ituaiga o toiata e pito i totonu o le maota e le mafai ona ta’e i so’o se pulufana lea na le mafai ona ati ai lea pulufana ma le fa’aleagaina ai se isi lava mea o le Maota atoa.

Na lipotia mai e le auaiga o Ortega le ali’i talavou ua misi mai le latou aiga ia Oketopa 31, 2011 a’o le’i tupu lea fa’alavelave ia Novema 11, 2011. Na latou fa’ailoa mai, ua tau matau atu e i latou, o lo’o nofo o ia i se vaipanoa o Uosigitone DC lea e i ai le Maota Pa’epa’e. Na i ai se isi taimi muamua atu na molia ai Oscar i le setete o Texas, Utah ma Idaho. I le taimi nei, o le a tula’i o ia i luma o le fa’amasinoga ae o le a iloiloina lona i’uga e le Siuri Tofia.

Aumai: AP; saunia: Leua Aiono Frost