Ads by Google Ads by Google

Molia se ulugalii i le sasaina o le la tama teine

O le ulugalii lea na o la au to’alua i le sasaga o le la tama teine i le faaiuga o le vaiaso, ua molia nei e le malo i moliaga o le fa’ao’olima i le tulaga tolu ma le fa’atupu vevesi i nofoaga faitele, ae o lo o fa’aauau pea su’esu’ega a leoleo e uiga i lenei mataupu, pe i ai nisi moliaga e ono toe faila faasaga i le ulugalii.

E le o faalauiloaina igoa o le ulugalii ona o puipuiga lava i lalo o le tulafono mo le teineititi o loo aafia i lenei mataupu.

Ae tusa ai ma fa’amaumauga a le fa’amasinoga, o lo o taua ai, na oso le ita o le tama i lona afafine ina ua otegia atu e aua nei toe faia lana amio o le sola ma le latou aiga, ae le usitai le teineititi.  Na tali lenei tama’ita’i i le tama, e leai se isi e mafai ona taofia o ia mai le faia o le mea e manao i ai.

Na avea le tali lea a le teineititi ma itu na to’atama’i ai lenei tama, e pei ona taua i fa’amaumauga a le faamasinoga, alu atu loa ua aumai le faga’au ma sasa le tino o lona afafine seia o’o lava ina manu’a.

Fai mai leoleo, e lei nofonofo ai iina le fafine, ae na oso atu foi na ia ma lana seleulu ua ‘oti le ulu o lana tama, ma tu’u atu ai foi ma lana po i le gutu o lana tama, i le fa’alogogata.

Fai mai leoleo, na saisai e le tamaloa lima o lona afafine ae fa’aauau ona ia sasaina o ia i le faga’au, ae ina ua maua le avanoa e alu atu ai le teineititi ma feiloa’i ma nisi o tagata, sa ia fa’ailoa i ai le mea na tupu ma fa’afesootai ai loa e i latou ia leoleo, ma talosagaina ai foi ma se fesoasoani a le EMS, ma auina atu ai loa le teineititi i le falemai mo togafitiga.

Na taunu’u leoleo ma fesiligia le ulugalii e tusa ai o le fa’alavelave  ua tupu, ma taofia ai loa le tamaloa i le falepuipui, peitai e lei taofia le fafine, ona o lo o i ai le la fanau laiti i le fale.

O lo o molia fo’i le fafine i le fa’ao’olima i lona tulaga e tolu.

E $200 lea ua faatulaga e totogi ona fa’atoa mafai ona tatala le tama i tua mai le toese, ae o lona afafine ua auina atu  i se tasi o latou au aiga, e faatalitali ai taualumaga o lenei mataupu.

O le tolu ai lea o mataupu faapenei ua tulai mai i luma o le faamasinoga, e aofia ai sauaga i fanau. O le mataupu muamua na tulai mai i Vatia ina ua saisai e se tama lona afafine ina ua maea ona ia sasaina lona tino i le laupapa 2x4, ona o le le usita’i, ae o le isi mataupu na tulai mai i Pago Pago i le 2009 ma a’afia ai se ulugalii ma le la tama e 3 tausaga le matua, lea na sasa e le tamaloa i le faga’au, saisai ona lima ma loka i totonu o se potu e le fafagaina.

O mataupu uma nei ua maea ona faia i ai faasalaga a le faamasinoga maualuga ma o loo tuli faasalaga a i latou na molia e le malo.