Ads by Google Ads by Google

Molia se Tama 53 tausaga i lona faia uiga mataga i se tama’ita’i


[ata: archive]

E 3 moliaga mamafa lea ua tu’uaia ai e le malo se Tama e 53 tausaga le matua, e mafua mai i le fa’alavelave lea o lo o tuu’aia ai o ia i lona taumafai lea e fai ni uiga mataga i se tama’ita’i e 17 tausaga le matua.

 

O moliaga mamafa e pei ona tu’uaia ai e le malo le susuga a Mukesh Chand poo “Bob” fo’i e pei ona iloa ai e le to’atele e aofia ai lona faia o uiga mataga fa’asotoma, faia o gaioiga mataga fa’afeusuaiga, fa’apea ai ma lona tagofia o itutinosa o se tama’ita’i e le fa’aipoipo i ai.

 

E pei ona taua i fa’amaumauga a le fa’amasinoga, o le fa’alavelave lenei sa tula’i mai i le fale a le ua molia i le aso 7 Aperila 2017, a o i ai le tama’ita’i na a’afia i le fale o le ua molia, e fesoasoani lea i lona afafine i le kukaina o meaai mo tagata matutua.

 

E pei ona manino i fa’amaumauga a le fa’amasinoga, e uo le tama’ita’i o lo o tu’uaia na a’afia ma le afafine o le susuga a Bob, ma sa moe ai le tama’ita’i na a’afia i le fale o Bob i le po o le aso 6 Aperila, ma le fa’amoemoe e fesoasoani ai i le kukaina o meaai mo tagata matutua i le aso e sosoo ai.

 

Pe tusa o se taimi o le 3:00 ina ua fa’atoa mae’a tapenaga a tama’ita’i mo kuka e pei ona fuafuaina, na manatu ai loa le tama’ita’i na a’afia o le a alu e moe, ae talu ai o le malulu o le ea i totonu o le potu a lana uo (afafine o Bob), na mafua ai loa ona moe o ia i luga o le nofoa o lo o i totonu o le potu malolo.

 

Na taua e le tama’ita’i na a’afia le fa’ateia o ia i se taimi o le taeao ina ua ia fa’alogoina se tagata o lo o tago atu i lona nofoi (tulou) ma ona ogavae, ae ina ua ia ala i luga, sa ia vaaia ai Bob o loo ia faia atu nei uiga ia te ia, o lea na ia tula’i ai loa ma tamo’e aga’i i le faletaele o loo i le isi pito o le fale.

 

Na taua atili i fa’amaumauga a le fa’amasinoga e fa’apea, e leai ma se isi sa i ai i le taimi lea i totonu o le fale, se’i vagana ai lava Bob ma le tama’ita’i na a’afia, ae o loo moemoe uma le fanau a Bob i le taimi lea.

 

Na toe savali atu le ua molia i le vaega o lo o tu mai ai le tama’ita’i na a’afia ma una’i o ia aga’i i le puipui o le fale, ona ia taumafai lea e kisi atu i ai, soso’o ai mal ona tagofia o ona itutinosa i le taimi lea, ae ua na o le tu fa’amalo o le tama’ita’i na a’afia i le fefe tele ina ne’i fai e le ua molia se isi mea leaga e sili atu ia te ia.

 

Na una’i ese e le tama’ita’i le ua molia ma maua ai loa lona avanoa e tamo’e ai i le atoa i totonu o le faletaele, ona ia lokaina lea o le faitoto’a ae nofo ai i totonu ma le fefe ma tagi, e fa’atali ai le taimi e feala mai ai ni isi o lana fanau.

 

Na taua e le tama’ita’i na a’afia i leoleo le fesili atu o le ua molia ia te ia, e ta’u atu se numera o se telefoni e mafai ai ona la feso’ota’i, ae sa ia tali atu i ai e leai sana telefoni o i ai, o le taimi fo’i lea na ia alu ai loa ma fafagu le afafine o le ua molia e sauni loa mo le kilivaina o kuka i tagata matutua.

 

Na taua i fa’amaumauga a le fa’amasinoga le fa’amatala e le tama’ita’i na a’afia o le mea sa tupu ia te ia i le isi ana uo, ina ua fa’ailoa atu e lana uo lea lana fuafuaga o loo i ai, o le alu lea e eva i le fale o le isi a laua uo, le afafine o Bob.

 

O lo o teena e Bob tu’uaiga fa’asaga ia te ia ina ua tofu atu lana mataupu i luma o le fa’amasinoga maualuga, ma o lo o tumau pea tuutuuga o lo o tatala ai o ia i tua ina ua mae’a ona ia totogi le tupe e $20,000, e fa’atali ai lana ulua’i iloiloga lea ua fa’atulaga e faia i le masina fou o Iuni.