Molia se Grandmother i le fa’ao’olima

O le Grandmother lea o lo o tuuaia i lona faapologaina o lona grandson e 11 tausaga le matua e ala i le faaaoga o ona lima e fasi ai o ia, o isi fo’i taimi ua ia faaaoga fasi laupapa, laau po o sipuni au u’amea e sasa ai foliga, o le ulu po o le tino, ua molia nei e le malo i le solitulafono o le faaooolima.

 

E tusa ai ma faamaumauga a le faamasinoga, ua fai si umi o tupu lenei faafitauli, ae na faatoa ripoti e le aiga i le Ofisa e Puipuia Fanau (Child Protective Service-CPS) ina ua alia’e mai le faalavelave lata mai i le aso 24 Setema, 2013, ma logo ai loa e le CPS le Ofisa o Leoleo mo le suesueina o lenei mataupu.

 

Na faaalia e le tamaititi na aafia i le sui o le CPS e faapea, ua faatele ona fasi e lona grandmother o ia, o nisi o taimi e sasa ai lona ulu, o ona foliga ma lona tino, e ala i le faaaoga i ai o se fasi laau, fasi laupapa 2x4 poo le sasa foi o ia i le sipuni au u’amea o lo o asu ai meaai i le latou aiga.

 

Na taua e le tamaititi i leoleo e faapea, na amata fasi mai lava o ia e lona grandmother ina ua faatoa latou nonofo ina ua 10 ona tausaga, ma faaauau mai ai lava seia oo mai i le masina o Setema.

 

I le aso 18 Setema 2013 e pei ona taua e le tamaititi na aafia i leoleo, na sasa ai o ia e lona grandmother ina ua le alu e fai feau, ona faaaoga lea e le ua molia se laau e sasa ai le ulu, tino ma foliga o lona grandson.

 

Na taua e le tamaititi, sa i ai manu’a tuga i lona tino e mafua mai i le fasiga lea o ia, peitai e le’i manatu lona grandmother e ave o ia i le falema’i, ae sa faaauau pea ona ia sasa o ia.

 

O le aso 22 Setema na toe sasa ai fo’i e le ua molia lona grandson i se laau, ina ua le maua matua tauloto sa a’o, ma unaoa ai le nofoi a le na aafia, ma le mafai ai ona saofa’i i lalo.

 

Sa mafai ona pu’eina e leoleo ata o manu’a sa i le tino o le tamaititi na aafia, ma o nisi o nei manu’a o ni manu’a fou, ae o isi o ni manu’a ua leva ona i ai i lona tino e pei o lona ulu faapea ai ma lona nofoi.

 

Na toe manatua e le tamaititi na aafia le isi aso na fasi ai o ia e lona grandmother, o le aso tonu lava lea o le faauuga a lona uso matua i le aoga tulaga muamua i le tausaga lava lenei, lea na faatele ai ona ta e lona grandmother lona ulu i le laau ina ua leiloa lana moa sa faa fagafao, ma e ui na ta’e lona ulu i le fasiga lea o ia, ae sa le’i mana’o lona grandmother e avea o ia i le falema’i mo togafitiga, ae sa faaauau pea ona ia sasa lona ulu i le laau.

 

O le isi aso e pei ona faamatala e le tamaititi na aafia i leoleo, a’o ia tulei le taavale pepe (stroller) a lona tei laititi i lona lima e tasi, sa otegia ai o ia e lona grandmother, i le mafuaaga ua le faaoga ai lima e lua, peitai sa ia fai i ai, e mafua ona le faaaogaina le isi ona lima ona o lo o tiga.

 

Na avea lona tali atu ma itu na ita ai lona grandmother, ma aapa atu ai i le laau ua sasa ai lona tauau ma manu’a ai, ona faaaoga lea e lona grandmother se kulimi (cream) e nini ai le manu’a sa i lona tauau ae le’i avea o ia i le falema’i mo ni togafitiga.

 

Na taua e le tamaititi i leoleo e faapea, o le matuia tele o le fasiga lea o ia e lona grandmother, na mafua ai ona tau pogisa lana vaai, ae faafuasei loa ona ia faalogoina le leo se tamaitai o valaau atu i lona igoa, ma faafuase’i ona ia faalogoina le fusi atu o ia e lea tamaitai, a’o faaauau pea ona sasa o ia e lona grandmoher.

 

Ina ua fesiligia e leoleo nisi o molimau mai le aiga e uiga i lenei faalavelave, sa latou faamaonia ai i leoleo lo latou vaai tino o fasi e le olomatua le na aafia.

 

Na taua e le isi molimau lona vaai tino o sasa e le ua molia le ulu o le tamaititi na aafia i se kiu piliati ma manu’a ai lona ulu, ona taofi lea e le ua molia le tamaititi na aafia e le alu i le aoga, ona o manu’a sa aafia ai lona tino.

 

Ina ua fesiligia e leoleo le ua molia e tusa ai o lenei mataupu, sa ia ioeina ai lona faaaogaina o se kiu piliati e sasa ai lona grandson ma manu’a ai vaega eseese o lona tino. Sa ia ioeina fo’i lona taofia o ia i le fale e le aoga, ona o manu’a sa aafia ai lona tino, na te le’i aveina fo’i o ia i le falema’i mo ni togafitiga.

 

Sa auina atu le tamaititi na aafia i le falema’i mo togafitiga, ma faamaonia ai e le foma’i  Dr. Lucy Goh manu’a i vaega eseese o lona tino.

Comment Here