O se ave pasi i se pasi mai Leone, lea ua tuuaia na lavea ma maliu ai se tama e 72 tausaga le matua i Nuuuli i le taeao sesegi o le Aso Toona’i na te’a nei, na tulai i luma o le Faamasinoga Faaitumalo i le taeao ananafi.

Ua ta’ua i fa’amaumauga a le fa’amasinoga e fa’apea, o le tama ua maliu, o Tufue Malele Notise Forsythemai le afioaga o Leone, o ia fo’i o se leoleo ua malolo litaea mai le Matagaluega o Leoleo.

I faamaumauga a le faamasinoga o lo o taua ai, o le igoa o le ave pasi o Reino Esera, ma o lo o molia o ia i moliaga e fa, e aofia ai le moliaga mamafa e tasi o lona faafoeina o se taavale ua mafua ai ona o’o le maliu i se tagata, ave taavale faatamala, le faatinoina o ona tiute o se ave taavale, faapea ai ma le moliaga o le le alu lemu o lana ta’avale, a’o kolosi se tagata i luga o le ala kolosi.

Ina ua oso i fafo Esera mai le sipi a leoleo na momoli atu ai o ia i le fale faamasino i le taeao ananafi, sa savali sa’o atu ma feiloa’i atu i se fanau aoga sa tutu i fafo o le fale faamasino ma la toniga aoga.   Na vaaia le tagi o Esera a’o feiloa’i atu i tamaiti aoga ia e to’alua, lea na mulimuli ane manino i le Samoa News, o nai ona alo ia e toalua.

O moliaga ua tuuaia ai Esera na afua mai i le faalavelave lea na tupu i Nuuuli i luma tonu o le faleoloa o le CBT, faafesaga’i ma le Laufou, ina ua taia e le pasi sa ia faafoeina, se tama matua na kolosi i le ala kolosi,  ma maliu ai, i le te’a laititi o le 6:00 i le taeao.

Sa faataunu’uina se lotu fa’aleaiga mo Tufue i le maota gasegase i Faga’alu i le te’a o le 8:30 i le taeao lava o le Aso To’onai.

I faamaumauga a le faamasinoga o lo o taua ai e faapea, ina ua taunuu le alii leoleo ia PSO Mareko Fale, o ia lea sa gafa ma le suesueina o lenei mataupu, i le nofoaga na tupu ai le faalavelave, sa ia vaaia le tumutumu o tagata i luma o le CBT, ae i le taimi lava foi lea, sa ia vaaia ai se tagata o lo o taatia i luga o le alatele.

Na taua e molimau sa i ai i le nofoaga na tupu ai le faalavelave, e toeitiiti lava taunuu Tufue i le isi itu o le auala ae taia loa o ia i le pito o le pasi ma lelea ai.

Na taua e le isi molimau e faapea, a’o tutu i luma o le CBT, sa ia vaaia le ua maliu o ia kolosi le auala, ao agai saoasaoa atu le pasi mai sisifo e aga’i i sasa’e, ma ia vaaia ai loa le taia i le pito o le pasi o le tauau o le toeaina.

Na taua e se pasese a le pasi e faapea, ina ua oo mai le pasi i luma o le Laufou Shoppiing Center i Nuuuli, sa ia vaaia ai le ua maliu o ia kolosi le auala, peitai sa mua lava ona matamata i se ata video o lo o ki i totonu o le pasi, ae faafuasei loa ona ia faalogoina se pa’o, ma ia vaaia ai le ua maliu o taatia mai i luga o le auala.

Ina ua fesiligia e le alii leoleo ia Esera e uiga i le faalavelave sa tupu, sa ia taua ai e faapea, ina ua oo mai le pasi i luma o le Laufou, sa faafuasei ona moe a’o alu pea le pasi, ma faafuasei ai ona ia faalogoina se pao, e foliga mai o se tagata ua taia i le pasi.

Na tu le pasi ae oso i fafo ma ia vaaia ai Tufue o lo o taatia mai i luga o le auala, o lea na ia taumafai ai loa e fesoasoani i ai.

E $15,000 le tupe lea ua faatulaga e le faamasinoga e totogi ona faatoa mafai ona tatala le alii ave pasi i tua mai le toese, e faatalitali ai taualumaga o lana mataupu, peitai afai e tatala o ia i tua, e i ai poloaiga e ao ona usita’i i ai, ma o nisi o ia poloaiga e aofia ai lona usitaia o tulafono uma a le malo, aua nei ona toe solia se isi tulafono.

Ua poloaina o ia e aua nei ona taumafai e sola ese ma le atunuu, a ia tuuina atu ona pepa malaga e taofi e le malo, ma ia auai i soo se taimi e valaauina ai lana mataupu i luma o le faamasinoga.

O le vaiaso fou e toe fa’auau ai iloiloga o lenei mataupu.