Ads by Google Ads by Google

Molia se alii mai Manu’a faia o uiga mataga i ni tama’ita’i to’atolu mai Savai’i

E $100,000 le tupe lea ua faatulaga e le faamasinoga e totogi ona faatoa mafai lea ona tatala se alii mai Ofu, Manu’a i tua mai le falepuipui, lea ua tuuaia i lona faia o ni uiga mataga i ni tamaitai se to’atolu mai Savai’i, e ala i le faamalosi lea o laua i faiga faafeusuaiga ae a mumusu ua ia fasi ma folafola i ai lona fasiotiina o i latou.

 

O le Aso Lulu na te’a nei na malaga ai ni alii leoleo se to’alua mai le Vaega o Leoleo Su’esu’e i le vaalele a le malo, le Segaula e aumai ai le ua molia mai Manu’a, o ia lea o Hanipale Malae, ma tulai ai loa i luma o le faamasinoga faaitumalo i le taeao ananafi, ma ua tuuaia o ia e le malo i moliaga eseese e 12.

 

O ia moliaga e aofia ai moliaga e lua o le faiaiga faamalosi; lua moliaga o le faia o amioaga faasotoma; lua moliaga o le faia o amioga mataga faafeusuaiga; tasi le moliaga o le faaoolima mataga; lua moliaga o le tagofia o itutinosa o se tamaitai e le’i faaipoipo i ai; ma moliaga mama e tolu e aofia ai le faaoolima i le tulaga tolu; faia o amioaga e ono lamatia ai le saogalemu o fanau laiti, ma le faamatamata o fanau laiti i ata leaga.

 

O le mataupu lenei na tofu atu i le Ofisa o Leoleo i Fagatogo, ina ua tuuina mai se ripoti mai le Ofisa o Leoleo i Manu’a faasaga i lenei mataupu, ona o ni tama’ita’i se to’atolu o lo o masalomia sa faia i ai e le ua molia ni uiga mataga.

 

O tama’ita’i o lo o a’afia e 27 tausaga le matua o le isi, 20 tausaga le isi ae 15 tausaga le isi, o i latou uma fo’i nei sa nonofo faatasi i le fale a le ua molia ma lona toalua i Ofu Manu’a, ae o isi fo’i taimi e malaga mai ai ma nonofo i le isi o la fale i Tafuna.

 

O le mataupu lenei na alia’e mai ina ua fasi e le ua molia le tamaitai e 27 tausaga le matua i le vaiaso muamua o le masina lenei o Me i Manu’a, ina ua le faia e le tamaitai se ielavalava i tua o lona ofuvae sa ofu, lea na ia tatu’i ma ta po ai foliga o le tamaitai na aafia ma unaoa ai ona foliga.

 

Na taua e le tamaitai 27 i leoleo e faapea, sa toe fasi fo’i e le ua molia o ia i le aso 15 Me, ina ua ia le tuuina atu se ipuvai mo ia, poo lona alu atu fo’i e solo le afu o lona tino, ma ia sasaina ai lona lima i se laau, tu’i ona foliga toe faaaoga pakete sa avatu ai le pauta e fai ai tagamea e ta ai ona foliga ma i’u ina ta’e ai lona mata agavale, ma mafua ai loa ona ia sola ese mai le aiga o le ua molia, ma maua ai o ia e leoleo i Manu’a ma auina atu ai loa o ia i le falemai mo togafitiga.

 

A’o i ai le tamaitai e 27 tausaga i le falema’i, o iina na ia faamatalaina ai le tala e faatatau ia te ia ma isi tamaitai e to’alua o lo o latou nonofo faatasi i le fale o Hanipale, ma o lo o faia i ai e le ua molia uiga mataga faafeusuaiga, e ui na musu le na aafia e fai sana faamatalaga, peita’i mulimuli ane na malie ai loa o ia e tuuina atu lana faamatalaga i leoleo.

 

Na taua e le tamaitai lea e faapea, o ia e sau mai Savai’i, ma o le tausaga e 2004 na taunuu mai ai i Manu’a ma nofo i le aiga o le ua molia, peita’i e leva lava ona taunuu i le aiga ae amata loa ona tauanau e le ua molia o ia la te faiaiga, ma e ui sa musu peitai mulimuli ane sa ia faia loa le mea o lo o mana’o i ai.

 

O isi taimi e fasi ai e le ua molia o ia pe afai e musu, e ala i le ta tu’iina lea o ona foliga poo lona tino fo’i.

 

I le masina o Ianuari 2013, na malaga ai le tamaitai 27 tausaga e asi ona matua i Savai’i, faatasi ai ma le faatonuga a le ua molia, ia sau ma aumai se isi tamaitai e fesoasoani ia te ia i le faiga o feau, o lea na la o mai ai loa ma le tamaitai e 15 tausaga le matua.

 

Na taua e le tamaitai e 15 tausaga le matua i leoleo e faapea, e le’i tele ni aso talu ona taunuu i le aiga o le ua molia ae manao loa le ua molia la te faiaiga, ma o le taimi muamua fo’i lea ua aafia ai lona olaga i ni feusuaiga (tulou).

 

Na taua e le tamaitai lea i leoleo e faapea, o isi taimi e mana’o ai le ua molia latou te i ai faatasi ma le tamaitai e 27 tausaga i totonu o le potu i taimi e faatino ai ana gaioiga mataga ia te i laua, ma o isi taimi e faamatamata ai laua e le ua molia i ata leaga.

 

I le masina o Mati 2013 na taunuu mai ai le tamaitai e 20 tausaga le matua i le aiga o le ua molia, ma faapea ai fo’i ona aafia o ia i amioga mataga a le ua molia.

 

Na taua e le tamaitai e 20 tausaga i leoleo e faapea, na aumai o ia e fesoasoani i le faiga o feau a le fanau e to’aiva a le ua molia ma lona to’alua, ae tutupu ai loa uiga mataga e pei ona ia faia ia te ia.

 

O le taimi muamua lava na mana’o ai le ua molia la te faiaiga sa tagi i lona fefe, ona o se taimi muamua lea ua fai atu ai se tagata ia te ia i ni tulaga tau feusuaiga, peitai sa ia faia lava ona o lona fefe i le ua molia, ma o taimi uma foi la te faiaiga ai ma le ua molia i totonu o le potu, e i ai ma lona afafine e 10 tausaga le matua.

 

O lo o taofia pea i le toese i Tafuna le ua molia e faatali ai le aso lea ua toe tolopo i ai lana mataupu.